Cambridge Audio AZUR 752BD 使用後報告

ice_man

  小弟由LD年代一直係Pioneer fans, 奈何近期冇咩有睇頭嘅旗艦機種，所以被迫轉會。近年好多師兄首選可能都係O記，而佢地正面同埋吹捧嘅報導真係多不勝數，所以其他牌子嘅藍光碟機就好似比較少人討論，情況都幾特別，係咩野原因導致咁嘅情況本人就不作任何猜測與評論了。其實入手Cambridge Audio AZUR 752BD之前小弟都係OPPO BDP-103嘅用家，而事實上OPPO藍光宇宙盤又真係唔錯嘅，不論係設計、外形、功能、用料以及價錢都非常之唔錯，所以小弟之前都入手O記就係咁解，但入手後發覺並唔完全係自己杯茶，唔係太啱自己嘅口味，於是開始諗諗換其它牌子嘅藍光碟機，而近期除左OPPO、Marantz同Cambridge Audio就好似冇咩野中高檔嘅BD機種可以選擇，而因為發覺Cambridge Audio上一代嘅751藍光碟機有唔錯嘅口碑，於是就親自去舖頭睇睇部751BD同752BD再作決定。
  
  相信好多師兄都知道，Cambridge Audio AZUR 752BD係由OPPO BDP-103作基礎而改良出來嘅，但價錢就相差一倍有多，原因何在呢？小弟從各方面收集左一啲資料可以同大家分享吓。視頻方面其實兩款機大家都同樣使用Marvell Qdeo晶片，對應3D同埋能夠升頻到4K畫面，兩組HDMI輸出，另外仲有兩組HDMI輸入，同時為照顧Android手機用家更支援MHL功能，只需要透過HDMI接駁手機就能夠將手機上面嘅AV訊源傳送到電視同埋音響系統播放，但用料上752BD相對BDP-103就選用左更高級嘅零件，所以影像上有一定嘅分別。而聲音方面Cambridge Audio就更特別為Azur 752BD引進高階嘅音響嘅技術，透過新開發嘅Anagram TechnologiesQ5音訊升頻技術來提升音質，752BD內置左Wolfson WM8740 24bit/192kHz嘅24bit DAC晶片，而且係用左五粒咁多(每粒為二聲道，合共十聲道)，當中四粒Wolfson 8740 DAC係用黎進行7.1聲道嘅解碼，另外一粒就用作兩聲道嘅解碼，再用上Analog Devices ADSP-21261 32 bit SHARC DSP晶片以Anagram Technologies嘅Q5專利系統就提供左24bit/192 kHz嘅升頻解碼功能，從而令解碼出黎嘅模擬波形更加順滑，減低鋸齒波形嘅失真，出黎嘅音效就唔會再感到有數碼嘅聲音，感覺會更加自然更接近黑膠碟嘅味道，结像力同音場亦相對地大大提升。據說音質仲非常接近同廠嘅Azur 740C純CD機嘅水平，另外仲有三種數位濾波器(Digital Filter)俾你選擇(Linear Phase、Minimum Phase同埋Steep)，咁你話Cambridge係唔係對一眾發燒友好有誠意呢？
  
  資料搜查左一排亦都唔算少，早前終於有機會去親身感受一吓752BD嘅效果，同場以OPPO嘅BDP-103同埋Cambridge Audio嘅AZUR 752BD作AB比較，先講畫質752BD嘅比較清晰銳利同埋係2D畫面時更有立體感，分別都幾明顯。至於聲音方面，分析力明顯比BDP-103高幾班，音埸更廣闊，音色更圓潤更清晰通透，雖然價位上都會令人幾鬥爭，但感受過752BD嘅效果最終都係接左752BD返屋企。

  回家後駁好線就即時試機，畫面真係相比BDP-103更有立體感、層次感亦更豐富、而暗位亦更清晰。跟住就試音效，先播CD碟以audioquest Vodka HDMI作數碼輸出，由Onkyo TX-NR5010來解碼，分析力唔錯，音場都算廣闊，跟住再經RCA以內置嘅Wolfson 8740 DAC來解碼，再以Anagram Technologies嘅Q5進行24bit/192 kHz升頻，再經audioquest入門級嘅RCA信號線Sidewinder連接Onkyo TX-NR5010，一開聲就有耳目一新嘅感覺，可以話係兩個完全唔同嘅世界，音場變得超廣闊，人聲更甜更圓潤，音效果然非常獨特出眾！跟住再以播SACD碟以HDMI線作DSD數碼輸出，由Onkyo TX-NR5010來解碼，分析力比CD來得好，音場亦比播CD時廣闊得多，非常清晰細緻同埋銳利。再以RCA信號線連接Onkyo TX-NR5010，音場好似相比經HDMI時就冇咁廣闊，但效果就比較自然、感覺舒服一啲，比較耐聽。播放SACD以HDMI作數碼輸出再經由廣音機來解碼，或者以內置嘅Wolfson 8740 DAC來解碼，再以Anagram Technologies嘅Q5進行24bit/192kHz升頻，經RCA信號線連接廣音機，呢兩種方法可以話各有長短。

  至於遙控器方面我個人黎講就覺得OPPO有質感同就手一啲。雖然752BD多左個遙控器插座，但對我黎講作用不大，所以並冇使用過。

  遲啲有時間的話將會試埋雙HDMI輸出嘅效果...

總結：
優點:
● 畫質：清晰銳利，於2D畫面時感覺更有立體感。
● 音質：分析力高，音埸廣闊，音色圓潤通透。
● 24bit/192kHz升頻效果極佳。
● 支援Android手機的MHL功能

缺點：
● 價錢略高
● 外形略嚴普通一點，如高度能加高一點感覺會更高級。
● 遙控器手感一般。
● 韌體更新比較慢
● 欠缺手機App

Part 2：測試dual HDMI輸出效果

(註：呢編文章絕無針對個別品牌及型號，只係純粹分享個人用後嘅感覺，同埋想分享一吓兩部外表相近同埋以同一基礎開發嘅機種嘅主要分別。)


送走OPPO BDP-103




Cambridge Audio AZUR 752BD開箱










Cambridge Audio AZUR 752BD接線
接上Audioquest VODKA HDMI線及LAN線


接上Audioquest Sidewinder RCA線及Wireworld Silver Electra電源線


所有的接線


預備進行測試














752BD的內部圖片及遙控器










日後將會測試雙HDMI輸出效果

rklpoon

Thx for sharing, wait for your further report.

kelvinchow8

超期待 ......

chinovince

講解詳盡, 圖片豐富, CHING 好夠專家水準!

JL0330

恭喜哂　　好詳盡的分享，期待你進一步分享

iwantbd

請問752價錢多少

Gary33

恭喜

hp2210

好想知HDMI聲音個PART同103有幾大分別

ice_man

iwantbd 發表於 2013-5-2 14:13
請問752價錢多少

師兄, 唔好意思實際價錢唔太方便講了...

居士

想問下，有師兄提及752 播bd 時有甩咀現象，係咪呢？？

cedricfkt

多謝師兄提供資料......

ice_man

居士 發表於 2013-5-2 15:53
想問下，有師兄提及752 播bd 時有甩咀現象，係咪呢？？

呢樣野應該絕大部份機都會發生啵，只要係部AV amp set番個time delay就得...

cedricfkt

可唔可以同105比較....103好似唔同級數.......因為我想入其中一部....

iwantbd

ice_man 發表於 2013-5-2 15:28
師兄, 實際價錢就唔方便講囉，你預2x105再多啲咁上下啦...

用部咁“2X105??"同103 比

5知係你“高B"??!!

定......預算這裏的人“低B“

iwantbd

chinovince 發表於 2013-5-2 14:09
講解詳盡, 圖片豐富, CHING 好夠專家水準!

直頭............長过D“膳“

iwantbd

cedricfkt 發表於 2013-5-2 16:33
可唔可以同105比較....103好似唔同級數.......因為我想入其中一部....

真正“用，睇“过两部机！有几人呀


睇....價格.....752同105  同是萬元級！


要比同級比！！

大ken

樓主應該打錯啫
估計係2 x 103既價錢

ryanenen

大ken 發表於 2013-5-2 16:53
樓主應該打錯啫
估計係2 x 103既價錢

  可吾可以用 3 x  Lx 55比?

ice_man

iwantbd 發表於 2013-5-2 16:39
用部咁“2X105??"同103 比

5知係你“高B"??!!

師兄, 打錯字，成日將103同105搞亂左...

ice_man

iwantbd 發表於 2013-5-2 16:42
直頭............長过D“膳“

師兄, 都係分享吓啫....