Steven的PMC組合

pepsiman

Hiendy 家訪交流室 ( 2011年1月號 之一 )

編輯 & 圖片: Pepsiman & Steven
文字: 豬賓


               Hiendy 家訪交流室於2011年再同大家見面，首先祝各位新年快樂... 事事順景... 今年勝舊年... 今次我哋家訪嘅對象Steven (網名eosteven)，佢雖然年青，但係已經玩過唔少機種；入行三年依然高燒未退... 不如我哋一齊睇吓佢又入咗啲咩新玩具啦....




分久必合?!

               Steven嘅萬毒根源其實係源自三年前，當時購入PS3，一心想玩HD AV Amp... 點知去到鋪頭試機先知入門AV Amp聽歌佢唔收貨，之後就比sales老點買咗部無高清音效解碼的Cambridge Audio 540R AV Amp... ，及Monitor Audio喇叭。玩玩吓大家都知乜事，Cambridge Audio 540R兩頭唔到岸... AV無高清音效解碼，聽歌又不及兩聲道擴音機。而此時Steven發覺自己都係比較鍾情聽歌，亦知道聽歌玩兩聲道先係王道... 所以就換咗Creek Evolution合併擴音機和CD機一套西裝及PMC書架喇叭用嚟聽吓歌。過咗一排，唔知點解Steven又身痕(不過相信大家都知道係點解！)，決定加返套AV組合，咁就添置咗Yamaha 863加Panasonic BD30，同埋KEF subwoofer同surround喇叭仔。Steven買嗰時就好興奮... 買咗返嚟就發覺無乜癮... 套新AV都係擺多過玩，平日都係聽歌多過睇戲，睇戲有聲就算，最後套野就變成屋企其中一件「傢俬」了（又多一條鯊魚仔？）...

          鍾情聽歌，而且成日身痕的Steven，將大部分資源投放於玩兩聲道裡面，頻頻換機，希望能夠揾倒佢喜歡嘅聲音。繼試過Creek西裝之後，Steven亦玩過Naim西裝，Melody胆機，Meridian前後級及Aloia CDP等等..... 喇叭方面就升級為PMC LB1 Signature，佢非常喜愛此喇叭，其他器材經歷多番轉變，這對喇叭仍然圪立客廳之中，更令Steven一直鍾情PMC喇叭，以至日後換上一套PMC喇叭。

         Steven換來換去，其實一直鍾情英國器材的柔和、舒服和豐富音樂感，不過真係可能換到有啲攰，一心以為Meridian和PMC組合可以安頓下來，點知過咗一排佢口味有所轉變，愛上高分析力，氣勢洶湧澎湃的聲音。另外佢又忽然奇想，不如玩下多聲道聽歌。首要佢要有一部有兩聲道前級質素嘅多聲道前級，於是就係二手市場慢慢等待佢嘅獵物出現喇。無幾耐，Steven就揾到一部上一代旗艦級AV processor - Krell HTS 7.1，及後再入手Bryston C-4BSST兩聲道後級，Adcom GFA-7300五聲道後級，再添置PMC TB2SM-C+中置喇叭，和升級比較冷門的PMC TLE1S subwoofer(提到呢隻十仔，確令筆者同汽水佬流晒口水，聽歌睇戲樣樣皆宜，真估唔到雙六吋低音單元能夠有如此表現)，一於儲齊一套PMC喇叭。佢嘅多聲道系統就基本成形喇。人人影音分家，佢就二合為一，真低死！

三打三!!!

           可能大家都有個疑問，一部上代AV前級，玩AV又無高清音效解碼，用嚟聽歌又好似唔係好正中，一套兩聲道前後級加AV Amp就咁放棄咗，Steven呢個決定會唔會冒險咗啲呢？Steven就咁講：聽歌同睇戲都係一站式，非常方便。初時換咗部Krell之後，因為部Krell無HDMI輸入，亦都無高清解碼，所以就用咗一條光纖接駁PS3到Krell，出嚟嘅效果已經比有高清音效的Yamaha 863完全唔同，質感強咗好多，聲音結像立體，低音充滿力量，動態勁強，包圍感亦增强咗好多，睇戲時聲音好埋身，但又好有層次，刺激非常。Steven續說聽歌方面的轉變：之前Meridian夾PMC喇叭，係一貫傳統英國聲，以柔和、舒服帶來的音樂感；Krell加Bryston夾PMC就是平衡、細膩帶來的音樂感，取向上雖然與前者有所不同，但係比較起其他方面，Meridian前後級完全被比下去；Krell加Bryston的超高嘅分析力，而且高密度質感，出嚟嘅聲音質素起碼高幾班。Krell HTS 7.1曾經係旗艦機種，質素當然不容置疑。

        Steven唯一有少少唔滿意嘅係PS3用光纖比Krell解碼，未能享受高清音效，亦有違原本當Krell係多聲道純前級的用意，未能玩盡部Krell。有一次，網友Smallear到Steven屋企作客，而且仲帶埋部Oppo BDP-83 SE NuForce版本去毒佢，Steven今次終於有機會試下佢的理想玩法 - 就係用有高質素高清聲效解碼的Oppo BDP-83 SE NuForce解碼後，用RCA去連接到Krell；出嚟效果睇戲雖然無咁埋身，但係聲音嘅資訊、質感就提升咗好多，聽多好多聲音，音樂感亦隨之而來，Steven非常滿意出嚟嘅效果。因為Steven平日睇Blu-ray多數都係睇音樂會，著重音樂感，所以之後就購入聲音比較溫和、細膩的 Philips BDP9500用嚟取代部PS3喇。估唔到之前Steven抱住一個博一博嘅心態嚟個影音合一，出嚟嘅效果異常地好，所以Steven就喺Krell與Bryston同一套PMC喇叭呢個組合度「暫時」停落嚟喇。


我聽歌，但我唔用CD…..

          Steven已經無用CD嚟聽歌嘅習慣，取而代之係CAS以及黑膠碟。Steven將CD rip嘅檔案、上網買嘅檔案和到處同朋友分享嘅檔案全部放晒落電腦，經由network傳送到Logitech Transporter解碼播放，用智能電話選歌。一手操控上千隻CD，唔使行嚟行去換碟，極之方便。Steven其實都幾睇好CAS嘅前景，佢話CAS同CD其實都係Digital，如果解碼一樣，理應聲音差唔多，但係CAS在制式上可播放嘅資訊就大得多，播High Resolution嘅音樂檔案與有30多年歷史的CD比，就如Bluray與DVD比，資訊越多，音聲越細緻，質感越好，越接近真實聲音。但係現今可買到嘅High Resolution嘅音樂檔案寥寥可數，係一種發展上嘅阻力，希望日後能加以改善。

       係黑膠呢個玩意上，Steven 其實都迷上好一段日子，不過由於呢個玩意比較麻煩，一直未敢去玩。不過半年前終於毒發，買入唱盤，佢覺得黑膠音色自然，密度高而且有質感。而眾多嘅音樂之中，古典音樂係佢愛聽嘅曲種，筆者於家訪當日親身去感受一吓黑膠碟古典音樂嘅聲音，果然係有一種難以型容嘅魅力，唔怪得好多人都話，唔玩過黑膠，都唔算真正玩過HiFi啦。


器材列表:

Turntable: Clearaudio Champion
Cartridge: Clearaudio Aurum Classic
Tonearm: Rega RB250 + Expressimo Heavyweight (IC: Clearaudio Quint)
Phono: Pro-ject Tube Box Phono (IC: Audioquest Diamondback)









CAS: Transporter (PC: Kharma Matrix, IC: Harmonic Technology Truth-Link XLR)
Bluray player: Philips BDP9500 (PC: CSE L7R, IC: Gotham 11001 RCA x8, Coaxial: Apogee Wide eye)





Pre amp: Krell HTS 7.1 (PC: Kimble PK10 Gold)





2 ch power amp: Bryston C-4BSST (PC: PS Audio Xtream Statment, IC: Apogee Wide eye XLR)



5 ch power amp: Adcom GFA-7300 (IC: Gotham 11001 RCA x5)



Main speakers: PMC LB1 signature (SC: Gotham 50150)





Center speaker: PMC TB2SM-C+ (SC: Gotham 50150)



Surround speakers: KEF 2005.2



Subwoofer: PMC TLE1S (PC: Oyaide Tunami, IC: Gotham 11001 RCA x2[for Stereo], Sommer Carbokab XLR[for Surround])





Projector: HITACHI PJ-TX100





Screen: 80" LEEMC electric white mat



TV: PHILIPS



Power Conditoner: Shunyata Research Hydra 6

Media player: HDPRO-DMB X1


玩AV之天敵

         啲人成日話「鑽石廳」係玩AV嘅天敵，有啲搞得唔好嘅，就會搞到喇叭對皇帝位嘅擺位嚴重大細邊；有啲如果想兩邊平衡，就會搞到一邊有個空間多咗出嚟，真係令人頭都大埋。Steven住在天水圍某大型私人屋苑，客廳同樣係鑽石型，但佢就諗咗個方法，使到原本嘅劣勢變成優勢，比張相大家睇吓可能會易明啲…..



            Steven將鑽石廳平面嗰邊放影音櫃，前置及中置擺放於兩側及櫃面，後中置就放响鑽石型底部嘅尖端，後置就放响廳的兩側。平日Steven自己聽歌睇戲嘅時候，就會加張皇帝椅响廳中間，有朋友嚟就會將張梳化搬拖出至與影音櫃平衡；咁做不單指前置與皇帝位嘅距離唔會大細邊，而後置同後中置亦有適當嘅距離去營造空間感，實在係一個非常聰明嘅做法。


捨命陪君子!

           好多會員可能都知道Hiendy有兩大毒窟，一個位於土瓜灣，一個位於葵涌，分別係由粗口版主及汽水版主操控住，上親去嘅網友都非死即傷，血流成河(荷包大出血)。Steven年幼無知，竟夠胆上汽水人屋企想一試投影機之毒，結果當然….. 咁啱Timmy大師搬屋想升級器材，有一隻電幕與投影機出售，Steven 想試一試投影機在佢家裡效果如何，但暫時唔想投資太多金錢落去，所以就從 Timmy手上接上了機與幕。今次我哋家訪其中一個重要任務，就係要幫Steven安裝投影機及投影幕。由於Steven中嘅投影毒實在太深，我哋上星期某日收工後立即趕往Steven家中，三位版主冒住比人拉嘅情況下去裝機，因為裝到投影機嘅時候，已經係晚上十點幾架喇(有圖為証)，幸好各人都安然無恙，並且玩到當晚十二點幾先結束今次家訪添。




後記....

           原本今次家訪嘅任務應該是更加艱鉅，原因係Steven自從吸過投影機毒之後念念不忘，經常問汽水人入邊部投影機CP值最高，而汽水人亦準備好將自己部舊三菱投影機、投影幕及十米HDMI線帶去家訪一解迷茫少年之苦，點不知臨出發前收到Steven已經按捺不住，全面收購咗Timmy的投影組合，家訪行動才得以簡化。Steven嘅新年願望係希望將對後置換埋做PMC DB1，咁就正正式式PMC一家團聚喇！


      
        再次多謝大家收睇家訪交流室，今次係咁先，拜拜！

下期預告:

一間獨立影音室的誕生

jj4044

強！

timmywan

文筆生動

hkbomberman

真正器材當埋傢俬襯屋, 用睇兩者兼得, 正!

avmilk

好詳細...讚!!!
d相影得好有心機, 增加了觀賞樂趣!!!

gundamfix2005

Steven Hing,
隔了兩三個月真係唔同晒，仲玩埋投投

chrisclw

睇情況，有人好快由720p 升去 1080p.....

eosteven

多謝三位版主咁夜都黎幫我裝機, 而且到深夜都比我捉住唔比走
半夜三更鑽天花板都無人投訴,我諗以後爆機都好安全啦

eosteven

Steven Hing,
隔了兩三個月真係唔同晒，仲玩埋投投
gundamfix2005 發表於 2011-1-14 11:53

無乜分別呀, 係多左投投, 搬過下位jar ma
不過你上次黎好多野都未set好, 又無比你聽黑膠

eosteven

睇情況，有人好快由720p 升去 1080p.....
chrisclw 發表於 2011-1-14 12:01

    你講邊個?

eosteven

好詳細...讚!!!
d相影得好有心機, 增加了觀賞樂趣!!!
avmilk 發表於 2011-1-14 11:39

多謝讚賞
多謝幾位版主

chrisclw

你講邊個?
eosteven 發表於 2011-1-14 12:10

你話呢?

eosteven

個平面圖整得好有心機, 好準確

eosteven

你話呢?
chrisclw 發表於 2011-1-14 12:15

應該唔係我
Timmy就梗啦

pepsiman

個平面圖整得好有心機, 好準確
eosteven 發表於 2011-1-14 12:18

    跟美聯提供嘅比例圖畫....

cyberken

豬賓文筆越來越好,可以投稿....

bigpun1975

回復 16# cyberken


    其實steven同百事佬幫咗我好多

chhanthony

專業級嘅服務，大師級嘅家訪報告

bigpun1975

多謝三位版主咁夜都黎幫我裝機, 而且到深夜都比我捉住唔比走
半夜三更鑽天花板都無人投訴,我諗以 ...
eosteven 發表於 2011-1-14 12:06

    揾我哋做實驗....

是嗎

真係好正，投投毒....到呢..