升級畫面的利器 - 中村製作所 - NZT-0600

chrisclw

一開始相信好多人都好似我咁，對電源處理器嘅認知都只係局限於兩聲道上。通常電源處理器係可以幫助兩聲道喺聲音上有明顯改善，因為電源對於兩聲道嘅器材影響都幾大，尤其係電源中的雜訊，可以令成套系統由好聲變衰聲！但由於投影機或電視，基本上屬於數碼系統，電源中的雜訊理論上不會有太大的影響。所以當我收到呢部中村電源處理器時，解藥堂Jason話叫我用喺投影機嘅時候，一開始我都覺得應該冇咩料到。


既然借得電源處理器返嚟玩，無理由唔喺兩聲道系統上試玩吓！由於呢部電源處理器功率唔太高，唔能夠插合併機試，加上Jason話部電源處理器未煲過，所以只好插部DAC同部NUC，一邊煲一邊聽吓歌仔。初初頭一、二個鐘，真係唔覺得有太大分別，只是背景比平常靜啲，於是只熄咗部合併機等DAC同NUC繼續煲吓佢。由於工作關係，之前都不停出差，所以就任由部NZT-0600一直煲咗幾個星期。直到手上工作告一段落後，終於有時間真正試吓部NZT-0600。一開始試梗係要聽吓歌仔啦，一開聲已經覺得比之前分別大咗，背景比之前更加靜，在同一音量下其他細節都比之前更明顯，果然有啲料到！但自問自己套兩聲道系統非常入門級，所以費事再班門弄斧，於是就決定將部NZT-0600搬去插投影機同藍光機。

要比較畫質，我個人喜歡先用一些認受性高嘅參考測試藍光碟作比較。


從Super HiVi-Cast嘅畫面比較中，可以睇到經NZT-0600處理過電源後，投影機播放嘅畫面在黑位雜訊控制上明顯地好咗幾多，但同時整體畫面銳利度也有輕微提升。








試完Super HiVi-Cast之後，馬上試吓本地演唱會藍光碟，因為通常演唱會一般畫面上嘅後期製作比較少，雜訊通常都比較多啲。


果然，經過NZT-0600處理個電源後嘅畫面，黑位雜訊比冇用電源處理器嘅畫面乾淨好多，而且畫面明顯佢地比較銳利，連衣服上紋理顯然得比細緻！




最後試埋一啲近期嘅荷里活影片，睇吓NZT-0600嘅優勢仲係唔係度。


基本上投影機播放嘅畫面，經過電源處理器處理後，畫質明顯地有改善，但又唔會好似其他畫面優化系統一樣，將導演想表達嘅畫面夾硬地強化然後變成一個版本，這一點我本人比較喜歡，既可以忠於原著但同時可以在畫質上有改善！




其實以街價$8700左右就可以有得到這些改善，個人覺得比以同等價錢買一些高價HDMI或電源來得化算，加上除了畫質上嘅改善之外，因為本身係一個電源處理器，更加可以用在兩聲道嘅訊源系統上，比較有彈性和實際！

wildmanhk

多謝餅主精彩報告，畫面確實係有改善！可惜無錢！

rocmanb

好彩我色盲睇唔到

racewong

中村牛不嬲都有料到.

估唔到佢連AV果邊都咁大影響啫.

westwood

我用 EIZO 27吋 MON 都睇唔出分別
可能我色盲