自俱樂部開幕以來， 一直忙到死， 係時候要開始寫報告了。
但有個問題我諗左好耐， 今次俱樂部入面 大部份既器材我都未玩過， 得對Genesis Maestro 與 Nottingham Annalog, Nagra VPS 喺屋企搬過去。 件件器材都咁想寫， 應該由邊件開始寫起呢。
坐在房內聽著YG SONJA 2.3, 望著這兩條大柱, 心諗不如就由佢開始吧.
講起依兩條柱, 就要由俱樂部開張開始講起...
俱樂部器材設置初期概念, 喺鎗王工作室入面套組合上, 在喇叭一環, 我一心諗住使用既喇叭就係YG SONJA 2.3. 原因無他, 就是新一代YG的中性, 快聲, 與及喺SONJA XV, 2.3 與 HAILEY 2.3才出現的 BilletDome 高音單元,
只要你聽過這個高音, 你一定會驚訝於佢既超高解像力, 點解我咁講, 咪就係因為當我一次聽SONJA XV時, 我真係聽到起雞皮, 如果之前既1.3係代表1080P的話, 這一代BILLETDOME就好似一次過跳級升到8K一樣.
睇番佢官網, 話佢既BilletDome高音單元使用十四層物料而成, 而大家可以見到單元面既倒Y, 係一層只有30mg, 名叫AirFrame既鋁質框架.
當然有這樣的提升, 除了BILLETDOME既功勞, 仲有YG最引以為傲既BilletCore單元, 喺SONJA 2.3上, 用左四隻中音, 四隻低音單元. 而依幾隻BilletCore中/低音單元完全係YG自家出品, 成個單元既組件與安裝都係YG 自己攪掂.
好肋, 初步講左佢既技術層面後, 係時侯要講下依兩支咁有氣勢既SONJA 2.3係點運到HIENDY俱樂部啦. 如果你地有留意開YG喇叭, 一定知道佢既喇叭組合技術, 以這對SONJA 2.3為例, 一對喇叭, 共有六個木箱, 因為每隻喇叭都分別由三件組件合併而成. 而每件都要兩個男人先可以搬得起. 所以一對喇叭就有六大箱了.
而我今次都係第一次睇住輝煌影音東哥組裝SONJA 2.3, 我初頭以為將這三件組件疊起就可以.
原來佢每個接合面都有兩條好長既六角鏍絲貫穿整個接合位, 令到這六大件頭安裝完成後, 好似變左一體喇叭一樣穩陣。 {不過東哥話由於Sonja 始終都係組合式喇叭， 所以要等一星期左右， 等佢既接位完全定晒後先會發揮到十成功。 依家啱啱裝起既Sonja, 最多只能發揮到六七成功力咋。｝。
東哥仲話等佢喇叭穩定後， 佢會再上黎幫手調節Sonja既（前傾角度）。 因為佢既前傾角度對放音場既深闊高低有著好重要既關係。
睇埋佢既背面， 就會見到佢有四組喇叭插。
東哥叫我將喇叭線插喺上面紅銀插位， 千萬不可插落下面對綠藍插。 因為 喺底部綠藍色既喇叭插只係負責低音， 而個分音器就放喺中間果一節入面。 如果你對喇叭線只接綠藍色插位， 咁你只會聽到佢既低頻。 除排你玩Bi-Amp 推Sonja. 否則正確接駁係要插番上去紅銀插位。
好肋， 終於都介紹完對Sonja 2.3特點， 係時候可以聽歌啦。
喺俱樂部既工作室， 推動這對Sonja 2.3係使用Nagra HD PRE + Danish Audio Design: LITTLE BIG MONO POWER AMP.
訊源就用番Nottingham Annalog + Sumiko Starling, 唱放係 Nagra VPS.
線材就使用了香港品牌CFM 與 Argento Flow系列。
對SONJA經過成個月既煲練, 大致已經進入穩定, 係時侯要幫佢擺下位了. 
唉, 一諗到到幫佢擺位就頭痛, 每邊四佰幾磅, 一個人去推佢真係推到出晒汗. 好彩有好多老友過黎幫手. 否則一條友真係好難攪. 講番對SONJA既擺位, 我間工作室12.5尺闊 X 19尺深, 理論上咁大對SONJA放喺依間240尺左右既房間, 一定BOOM到九彩.
好在工作室內用左一隻由香港人設計既擴散吸音板L'Ombre Acoustic, 依塊板既特點係前級擴散, 後面吸音. 真係一塊攪掂晒.
工作室內掛左32塊L'Ombre Acoustic, 將多餘既低頻吸得一乾二淨. 仲有可以令到成間房既寧靜度有著明顯改善.
而一對SONJA最終選擇放在離後牆大約五尺左右, 側牆就半尺. 咁既擺位先可以令到依間240尺房間食得晒對SONJA既能量.
由我玩屏風到依家， 我都係鐘意用Live 作試音軟件， 原因係Live最多細節， 音場深闊高都好易聽到。 當然要搵張靚錄音既Live好似好困難。 其實外國有好多演唱會既錄音都正到不得了， 無論係大型演唱會或是Jazz club既現場錄音， 經常都有佳作。
好似以下依張David Gilmour@Live at Pompeii.
我買左好耐，唔記得幾錢， 但印象中唔太貴， 都係四五百蚊咁上下， 但齋睇佢既包裝，入面既小冊子， 一盒四張33轉黑膠， 已經物超所值。 依張演唱會既錄音強與樂器的質感與人聲既細緻， 音場係偏向深度， 空氣感唔係太強。 所以要出到演唱會時既氣氛， 就好考器材了。
當我放入DISC 2既SIDE A, 電結他既質感與結象超強咁喺我面前出現, 現場既觀聚歡呼掌聲包圍左整間試音室. 第二首既MONEY既INTRO好正, 唔知佢係咪真係玩緊散紙, D聲音實實淨淨咁喺左後方出現, 咁大對SONJA咁輕易就隱左形.
大家都知我玩屏風玩左好多年, 我鐘意屏風既其中之一就係佢既高度 因為如果你地有機會聽過一D高身既喇叭, 佢既音場凝造既結實感與一般中型座地喇叭係有勁大既分別. 就好似AV系統ATOMS咁, 有天花喇叭與一D模擬ATOMS喇叭既分別一樣.
而兩聲道既音場高度與空間既完整性, 其中一個關鍵就係喇叭的高度. 當然我唔係話半身喇叭做唔到理想音場高度, 半身喇叭一樣可以做到音場高度既完整性, 我只係強調真實感的差異.
聽完D咁ROCK既黑膠, 我就拎張Ballet Music from the Opera出黎試下佢喺古典既表現, 我之前都介紹過依張黑膠, 世紀級名指揮家, 就算唔係發燒友都個個鐘意聽, 頂級錄音, 場面富麗堂煌, 音樂氣氛對面豐富, 管絃樂的質感, 層次, 空間感都極佳, 而我手上的版本只係Analogue Production既REISSUE, 但已經好靚聲, 尤其係SIDE A第二CUT, 喺二樓兩邊既小號, 除左可以測試音場的高度外, 仲可以試埋佢既包圍感. 落針一刻, 我熄燈後只見兩隻藍色猫仔企左喺兩隻, 而耳朵聽到的已經好快將我間工作室幻變成歌劇院, 空間大小, 前後感的深度與高度都好實浄.
最後, 我再拎多張近期大熱既A star is born出黎聽Side B第一，二首 Trust me & Shallow.
依張soundtrack 絕對稱唔上靚聲， 只係一張好普通既Soundtrack, 而這張大碟大部份都係現場錄音， D細節多到你聽唔晒， 每次轉換器材線材都會發覺有D野多左， 又可能有D野少左。
而依張碟最難播既係人聲既感染力及凝聚力, 喺YG SONJA既演繹下, 人聲既立體感唔再單單係只得口型, 你直情好似睇緊戲咁, 強列感受到兩個人在台上對唱. 而中頻既感情唔會好重味精, 我明顯聽到既感染力係出自套NOTTINGHAM與SUMIKO STARLING, 與及Danish Audio Design既THE LITTLE BIG後級.
簡單來說, YG SONJA就有著超強放大鏡的特性, 又係老套D講句, 你比咩野聲底比佢, 佢就出番咩比你.
試完依三隻碟, 我愛死這對SONJA 2.3, 在我的工作室裡, 這是我聽過最好聽的古典管絃樂, 現場感, 質感密度與及感染力, 都遠超我過往既認知. 如果你要我選出當代最爽快, 最直白, 空間凝造力最強的喇叭, 我二話不說, 一定係YG SONJA 2.3.
代理: 駿韻音響
https://www.hiendy.com/hififorum ... =2937406&page=1 |
IP卡
狗仔卡
發表於 2019-7-15 14:28:51
提升卡
置頂卡
沉默卡
喧囂卡
變色卡
顯身卡
發表於 2019-7-15 16:05:42
