|
Hiendy 家訪交流室 ( 2010年10月號 之二 )
編輯 & 圖片: Pepsiman
文字: 豬賓賓
他不是學友,也不是黎明,而是..... 呢幾句說話,係某年的報張上用來介紹一位新進歌手的。而我哋今次家訪嘅對象,相信唔需要借助什麼名人去介紹,因為Hiendy應該無乜人唔識佢.... 。佢... 曾經創下三日換咗套機嘅紀錄... ;佢... 曾經為套器材有更好嘅聲音,將套機寄去老遠嘅日本摩改... ;佢... 亦係首批玩倒AQ Diamond HDMI線嘅人.... 。講到呢道,我諗大家都估到佢係邊個,他不是誰人,正是BOY哥... 。
朝聖之旅
原本筆者收到order要專訪BOY哥嘅時候,只不過係得Pepsiman與本人、及聯同揸車嘅kleehkg版主三人。但係消息唔知點解會流傳咗出去,個個異口同聲話要去見識一吓BOY哥嘅影音組合,所以就由原先三個人,最終加埋hkp1196, canon.hk, cyberken及蒲東,一行七人驅車前往東涌展開今次嘅朝聖之旅。
我淨係想打吓機啫...
我哋一行人去到BOY哥屋企已經晚上八時有多,趁住拍檔影相之際,筆者就同BOY哥傾下計先。其實BOY哥一直無諗過會玩影音,故事可以起源於三年前一部PS3講起。當時BOY哥買部PS3都係想收工可以安坐家中打吓機,輕鬆一吓。點不知買咗部機返屋企先發覺部老爺電視機原來無HDMI輸入,咁就迫不得已去買返部高清電視機(其實PS3都有色差線同埋光纖輸出嘅,相信係乘機買新電視嘅藉口)。就於某日,BOY哥於旺角某連鎖電器店買完電視行出門口之際,竟然撞番一個佢十幾年無見嘅老朋友,言談之間得知呢位老朋友原來係開影音店的,仲相約BOY哥揾日上去鋪頭吹下水咁話。就係咁,BOY哥抱住上去見識吓嘅心態就到咗朋友間影音鋪喇。正所謂三句不離本行,言談間老朋友總會講關於影音之事,BOY哥只係鍾情於打機,本是風馬牛不相及,但係朋友依然好熱情地俾咗一條Nanotech#302電源線BOY哥試,叫佢返去插落部 PS3度,包有驚喜咁話添(呢D朋友真係至毒)。
BOY哥心諗:超!咪又係電線一條,有幾犀利啫!不過既然朋友送到,一試無妨啦。
點知唔試由自可,一試嚇壞咗,畫面靚到不得之了。原本淨係想打吓機嘅BOY哥,就係因為一條電源線,而踏上呢條影音嘅不歸路!
沒有你還是愛你
自從BOY哥見番呢個影音店老板朋友之後,就不斷俾佢毒害。BOY哥漸漸建立起一套影音組合,而Pioneer旗艦AV Amp LX-90及BDP LX-91更是佢嘅至愛。玩玩吓,BOY又覺得套Pioneer組合玩到悶悶哋,想轉下口味,咁隨之然將部Pioneer LX-90 AV Amp出售,換入Onkyo SC-5508 AV前級,同埋Onkyo MC-5500九聲道後級。點知套機返咗嚟,BOY哥對新機有點不滿。
BOY哥說:Onkyo老實講唔係唔好,音樂味重過Pioneer而且聲厚,但包圍感始終差D,分析力同LX-90差幾遠,同埋覺得Onkyo部後級唔係好夠力。
喇叭BOY哥就一定唔會換,所以套Onkyo組合只可以跟咗三日就放出公海了。當靜咗落嚟嘅時候,BOY哥始終對Pioneer LX-90嘅聲音念念不忘,所以就再次購入LX-90 AV Amp,同佢再續前緣…..。為求聲畫上有更大突破,BOY哥不惜工本將LX-90 AV Amp同LX-91 BDP寄去日本一間名為[地獄之聲]嘅公司摩改,兩部改裝費加埋差不多要三萬港幣,仲係唔連運費添,但係為咗一聽終極靚聲,BOY哥甘願一試。之後BOY哥更加購入Pass Labs X-350.5兩聲道後級增強功力,旗艦組合就係咁樣誕生咗喇!
講到呢道,都係時候介紹下BOY 哥嘅器材:
AV Amp: mod. Pioneer LX-90, PC: KHARMA Grand Reference
BDP: mod. Pioneer LX-91, PC: KHARMA Enigma Signature, HDMI: AQ Diamond X 2, ALTO-Extremo NeoFlex 磁浮墊
Front Speaker: Focal JMLab Diablo Utopia, SC: Tara Labs RSC Air 1
Center Speaker: Focal JMlab 1000 BE, SC: AQ CV-8
Rear Speaker: Audio Master
Power Amp: Pass Labs X-350.5, PC: AET SCR EVO, RCA: Tara Lab M1
電源處理: Light Speed XH-1
Subwoofer: Velodyne DD10, PC: AET HCR EVO
TV: Philips 9703, PC: AET HIN EVO
輔助器材
男人都要買鑽石!
幾個大男人,上到BOY哥屋企好似小朋友去咗花花世界一樣,不斷睇,不斷影,又不斷嘩嘩聲…..,已經完全唔記得咗試機呢回事。BOY哥就提議試下條純銀全人手製造嘅AQ Diamond HDMI線。
BOY哥表示:呢條線聲靚音場闊,顏色更加靚到不得了,就以功夫熊貓為例,胡貴長老的翡翠宮玉柱係藍色底色,仲要係彩藍色,先前係睇唔出,柱上條龍翡翠綠原來通透非常咁話!
我哋一連試咗幾套戲,大家都睇到目瞪口呆,一條價值五千多元全人手打造嘅HDMI,果然貴得有道理(寫稿期間已得知本網其中一版主,亦是當日有份參與家訪成員之一,已按捺不住購入一條自用)。爆完一輪之後我哋就聽歌輕鬆吓,聽Susan Wong嘅Killing Me Softly及張學友嘅祝福,各人都認為在聽過好多AV Amp系统中,呢個組合於聽歌方面係最好嘅一套,但係右前置後面因有側牆關係,聲音有點唔平均。
BOY 哥表示:遲啲間屋會裝修,啲影音架生都會從新擺位,聲音應該會更上一層樓。
時間已經到咗九點幾,各人都未食飯,所以就結束呢次家訪醫肚去勒。
後記....
在專訪BOY哥之前,筆者都有諗過,BOY哥玩嘅,件件都係神兵利器,會唔會係一個財大氣粗,難於相處嘅人呢?而事實剛好相反,其實BOY哥言談有禮,有問必答,仲相約眾人有時間再上去玩過,最後再次感謝BOY哥嘅熱情款待。
家訪交流室又到此為止喇,下次再見,拜拜!
下期預告:
投入大銀幕世界的馬糞兄
|
評分
-
25
查看全部評分
-
|