前言
在各位細看小弟既分享之先, 小弟必須要說明本人或Wilson’s Audio Lab與Rockna並無任何關係, 只是因為好機想純粹以用家角度分享. 此分享純粹非常個人超簡單觀感, 並不客觀, 不喜易插, 感謝.
話說小弟都同班熟客由2017年頭話想換CDP, 話左2年半終於行動. 當中試過少量一體機, 同埋R2R / chips解碼, 但係R2R既感覺好深, 果種厚潤真實感真係好有黑膠味, 由此開始就決定要買R2R解碼. 一位借我R2R解碼既知心好友知道我鍾情於R2R解碼, 所以就介紹我到Volent搵Ben Sir去試下部Rockna. 話部Rockna係完全唔同聲底, 應該係我想搵既取向黎. 於是我就上去搵Ben Sir試下機.
係Ben Sir到試部Rockna, 一開聲真係好通透, 好高速度, 高頻伸延度真係好唔錯. 唔洗幾耐就知係我想搵既聲音, 所以只係試左幾首曲目就已經有想比錢決定買既感覺.
簡單介紹
等左大約2星期左右, 當收到機之時真係好開心, 因為第一次玩分體CD機(CDT+DAC), 而唔係一件過(CDP), 而且仲要買一部對小弟而言唔平既機(無錢一炮過買只可以做銀行分期還款), 果種興奮程度真係好多年都未試過了!
此機既功能或者相關就唔講啦, 大家上網都清楚睇到. 但係有一點一定要講, 呢部機既內部電源接線方法好直接, 先由IEC插座直接駁到火牛, 而火牛都分開成3隻, 而且當中沒有任何線路板, 呢個簡單有效既方法可能做就左好聲既原因之一. 再加上使用上單支線, 不過就無寫係咩線黎, 點都會對聲音動態好有幫助. 但係用左普通IEC濾波插座就有機會令到聲音動態下降.
聽感
由於小弟都係初玩CDT+DAC, 自然就沒有足夠經驗去匹配線材, 都要不斷嘗試先體驗得到當中分別.
AES線, 電源線, 都嘗試過由最入門級既Fantasy到最頂級既週年系列, 從中不難發現Rockna都係極度中性, 高密度, 聲音異常開揚, 微動態充足, 生猛. 換線既最大分別在於能力上既高低影響, 影響亦都非常明顯. Rockna果種真實感好強, 強到已經唔可以用文字黎形容, 可能小弟第一次用貴機所以感覺特別強烈吧, 但係自己一直都未試過係屋企聽過. 另外就係分析力好高, 但係果種高分析力唔係話平常解碼機果隻D聲分得開但係連貫唔到既感覺, 而係一口氣超連貫咁做哂成件事, 而且係話你知佢好淡定, 仲有大把能力係手果隻. 可能因為咁, 佢既高頻仲有些少貴氣, 係貴價機先做到既果種貴氣, 真係一試難忘, 再聽傾心 !
小弟試聲通常都會用到呢隻CD - “The Greatest Video Game Music”, 錄音雖然唔係特別好, 但係要播得好絕對唔易, 小弟一直都係以呢隻CD作試線之用. 成隻碟既主題都係遊戲既主題曲或插曲, 重新編制同時改為倫敦交響樂團演奏. 所以不論機器或者線材都有極深遠影響, 如果有其中一PART唔全面, 就好難得到當中神韻, 變得毫無生氣, 亦難以還原戰場上果種看似死寂, 實際在低處暗潮洶湧.
當中以第3曲” Modern Warfare 2 Theme”, 絕對係試聲首選 ! 銅弦樂, 敲擊樂, 什麼都有, 而且要同時出到超低頻果種漲力, 中頻既感染力, 高頻既清澈通透又觸摸得到既質感, 絕對唔易! 但係Rockna於呢方面絕對係好輕鬆就做得哂, Rockna仲可以比你聽埋平時聽唔到既背後聲音, 最緊要係我想要乾淨得黎有音樂感, 音場寬廣但質感細緻緊密, 高密度得黎不失分析力, 就算聽咩歌都可以有優異表現!
總括而言, Rockna對小弟來說雖然昂貴, 但聲音質素最少能滿足我十多年要求, 計落都係超值. 以不到HKD$5萬既身價換來接近全能表現絕對係超值, 如果換上知名度高既牌子, 定必引來6位數字的售價.
題外話
Rockna呢部R2R解碼原來就有音量控制功能. 小弟試過將Rockna直接駁去後級會更好聲, 分別都明顯的, 只係接駁前級之後既低頻力量會有明顯提升, 有得有失. 如果大家既解碼都有類似功能, 不妨一試, 可能試出新天地.
Fuse對呢部機都有超大影響, 建議配合低頻量感較多, 線條清晰, 動態比較大既FUSE會有更好發揮. 小弟正為此機研發Fuse, 希望能夠盡量發揮Rockna最大效能吧~~~
|