入門貴氣的體驗：Fono Acustica Allegro USB 線

史的墳

2019，一個對各位朋友o黎講係非常特別既一年，而對小弟o黎講都係一個好有挑戰性o既一年。

2020，44歲，20年！玩o左 Hi-Fi 及 AV 大大話話已經20年，可以話短唔短，話長唔長，但仍然在不停咁學習中。早兩年利用自己於 I.T. 上的知識向 CAS Hi-Fi 鑽研。攪o左幾年，試過無數咁多種配搭，亂打亂撞，交o左唔少學費，差唔多每一樣都親自俾錢嘗試，終於搵到自己想要的，朋友們又認可的聲音。

響 2020 年，我希望除左響 Hiendy，更可以帶俾各位朋友，用唔同角度，分析同報告各種 Hi-Fi、AV、同 CAS 產品，同時更分享玩意，及以一位「試食員」身份分享美食及所見所聞。做唔到第一手都希望做到第一批，希望各位在2020年繼續支持。


Instagram：stephen.is.here

好，賣完所謂自我「廣告」，就講返今次o既主角，前o個排肥槍話代理雅詠 send o左一條來自西班牙的Fono Acustica USB o黎想Hiendy俾下意見。咁o岩我個日上去見到，肥槍就問我有冇興趣試下。就係咁我就將佢帶返屋企，試o左佢三晚。



大家都知道我係CAS死忠，差唔多乜o野野有關CAS o既我都會試同買，目的都係想令到我套 CAS 更上一層樓。

呢條Fono Acustica Allegro USB線，係屬於呢個牌子o既入門級別。咁入門級別到底又係有幾「入門」呢？我試呢條係1.0m，MSRP就大概港幣萬零蚊。萬零蚊一條線算唔算貴？如果真係玩 Hi-Fi o既話，呢個價錢就中規中矩，我絕對接受到囉！



合金製程，配方和比例都係佢o地自己研發出來，好秘密咁話。如果大家都知多D details，可以去佢個牌子網頁睇下。睇返條線，屏蔽都做得相當唔錯，金工可以話係好出色，廠方佢地話在銀銅導體的外層加上了Teflon絕緣屏蔽處理以及軟質導管包住。金橙色的接頭與線身，燈光打落去都好吸引。



外型就講到咁多，實際聽聲先係最實際。

今次試線我用o既當然係自家器材，source 個邊我將條 USB 插去部 QNAP HS-453DX USB2.0 輸出，中間加粒 ifi iSilencer 降低 EMI，另一邊就直接接到 Weiss DSP502 Streamer，而 DSP502 再以 24/96，用 AES 接到 Grimm CC1 主時鐘作「洗水」，再用 AES 接到 Weiss Medus DAC，RCA 去 Kondo Overture PM-Iii。喇叭就 Kaiser Chiara。

QNAP 方面，我今次用上 QNAP 自己開發o既 Music Station 作軟件輸出。



首先隨手 random 揀o左聽下方皓玟 – 你是你本身的傳奇，一開始的鋼琴聲，動彈帶點通透，密度不錯，但尾音略略收得太快，失o左D餘韻。方皓玟人聲相對推得較前，像直響我皇帝位前三、四呎左右；密度以呢個價位算係不錯。聲音帶點點甜美，不過份收飾。跟住我試下利用 DSP502升頻到 24/192輸出，密度再高一 D，但鋼琴的微動態就少o左，人聲推得更前，不耐聽。轉返 24/96 就舒服好多。



再試一下A Star Is Born - Soundtrack（美版），- I'll Never Love Again (Extended Version)，Lady Gaga 人聲表現與方皓玟差唔多，的空間感氣氛不錯，場面都做到一個小型 Hall o既規模。一開頭的呼吸聲都尚算清晰有感情。



最後試埋Star Wars Episode IV - A New Hope，The Throne Room - End Title，號角聲及鼓聲都算交到貨，不會一合奏就亂晒籠，分隔度都合格，每件樂器位置清晰。Hall 規模亦有，但不是太大。聲音帶點高貴甜美，少少修飾o左尾音部份。



總結，以一條該牌子的「入門」產品o黎講，個人聽後感收貨有餘。價錢上，可謂襯得起佢個身價，亦可與同級牌子爭一日之長短。

期待之後有更多呢隻牌子線材試下，等我再有機會「聞」下呢陣貴氣！！

vhs

bigpun1975

原來同你差唔多