近排啲預算較為鬆動, 想搵部新Dac嚟取代用咗多年嘅Oppo Dac, 目標係Soulnote D3+Z3 或Eso 嘅 N-01XD+G01X, 但Soulnote遲遲未有得示範, 而Eso已經係3年前嘅產品, 好難買得落手, 想等後繼機, 於是搵咗部平平哋嘅Dac嚟過渡.
聽過R2R啲Dac, 聲底太柔爆唔起, 唔係好啱, 見到Gustard有部X26pro, 內籠線路走得幾靚仔, 又幾夠料, 於是走去搵威馬嚟試聽, 聽咗幾首歌就即時俾低銀兩, 連埋部外置鐘C-18一齊攞走.
駁埋個鐘煲咗成個星期, 發覺聲音好有驚喜, 動態同密度都夠哂充沛, 樂器同人聲充滿質感, 線條修得好靚, 分析力恰到好處, 音場定位整齊有深度, 當播放快歌同交響樂時, 聲效氣勢澎湃, 成浸Hi-End味出哂嚟, 如果有機會盲聽測試, 實會估唔到, 係部國產Dac.
如果唔駁鐘齋Dac嚟出聲, 音場會較窄同冇咁扎實, 分別都幾大, 估唔到外置鐘, 居然係咁重要, 而且隻鐘係貴過部Dac.
如果有朋友想搵部兩皮嘢左右嘅Dac, 而又鍾意聽啲高動態嘅音樂, 例如快歌, 協奏曲或交響樂, 我一定會推薦呢套X26pro+C-18嘅組合, 絕對係物有所值.
|