香港樂繽紛 -5 午後膠遊 Acoustical Systems Astellar

zelo

今期冇約腳夜晚出動，唯有夜繽紛改為樂繽紛，

近日知道AS個黑膠盤Astellar已經到咗代理showroom，仲已經裝好有得試聽，我見今日有時間，兼且代理搬去九龍灣showroom咁耐都未上過去，就約咗今日下午過去八吓。
一入到門口仲未定神，已經有條友‘攝’我，跟住做過埋嚟睇、埋嚟揀手勢詔我過去，見到依個動作即刻回憶返晒嚟，想起當年好景…（大家知我講乜，唔好扮嘢～）



一入到毒氣房，我真係有啲被嚇窒，房入面放滿黑膠盤，一對Ocean Way Audio大喇叭，夠哂氣勢，但點都唔夠主角吸睛，AS個Astellar黑膠盤實在太突出，拍住其他盤佢個體型完全比下去，好似航空母艦喺隊艦隊咁，特別突出。



見到個盤播緊歌，我都唔客氣，即刻坐低聽吓，個盤裝咗兩支臂，一支係親生仔Axiom，另一支係Triplaner U12，今日主要係用支Axiom配Kondo IOXP頭，臂線只係用緊SME線，再配上老闆珍藏Denon升壓牛，咁嘅陣容其實已經不得了，音効非常之好，個盤播碟時好穩定，音質絲滑，背景極之寧靜及好有層次感，配上Axiom基本上係將隻黑膠所有訊源抽乾，分析力極強，唔經唔覺坐低已經聽完一面碟，因為真係聽得好舒服。



講返個盤，金工真係一流，眼見係分開三層，每一層有佢自己任務，底層係負責兩個摩打嘅防震，中層系負責platter、頂層係負責唱臂，佢係汽浮加磁浮，汽浮負責四邊腳平水。盤身只有三個轉數掣，所有開關全靠另一部黑色子機，所有電源、氣泵都係靠佢出，基本上只需按一粒掣就可以，子機上另外有兩個掣，據講係將來upgrade用，估計係玩電，因為寫住AC同DC，機身接線非常簡潔。







睇落個盤構造好簡單，但玩開AS臂應該知道，佢啲產品係好多細位要調教，支臂我之前已經領教過，真係set到嘔血，不過成個顯著，呢個盤都一樣，聽講都set咗好耐，入邊好多細位要注意，所以間房我都見到一地血。

至於臂板方面，聽講個黑膠盤可以放五支臂，落order時要預先通知廠家將會用咩臂，送貨前會先幫你教定位、開埋窿，如果唔係之後就要拆返塊板俾廠搞。另一得意之處係任何臂裝好後，如果想移去主臂位只需拆咗臂板上四口螺絲，直接轉換過去就用得，唔需要重新調教支臂。

依個盤可以定為人生目標之一，我個人就真係好喜歡，不過只有望住流口水，因為都真係幾貴…個價跟AF1P咁上下，但依度好多隱形富豪，一定買得起有餘。

呢編嘢只係非專業發噏風寫幾句，有咩寫錯唔好見怪，有問題請直接問代理，技術嘅嘢我真係識條鐵。

jjtiger

Zelo師兄，無事出街小破財呀，特別係毒氣室，
更加係少去爲妙
家訪都係一樣

jerrytck

堅！🐭😮

zelo

jjtiger 發表於 2024-3-15 10:53
Zelo師兄，無事出街小破財呀，特別係毒氣室，
更加係少去爲妙
家訪都係一樣  ...

冇事嘅，睇吓自己個荷包就會免疫。

jjtiger

zelo 發表於 2024-3-15 11:42
冇事嘅，睇吓自己個荷包就會免疫。

你個荷包脹卜卜就緊係冇事，難為我個又乾又硬化

zelo

jjtiger 發表於 2024-3-15 12:04
你個荷包脹卜卜就緊係冇事，難為我個又乾又硬化

我個荷包全部係賬單緊係漲。

jjtiger

咁都俾你兜得返