建國大典 - 9 飯可以唔食，線材唔可以唔換！

zelo

上期講到試完電源線，又開始去搞接線，始終啲接線用咗多年冇換過，依家換線又容易好多，即菅試吓其他口味，我兩部音源Ethos同DS Audio分別用上Schnerzinger R3 同TS3000，依對線我仲係好滿意，所以冇打算換走，反而前級去後級嗰一組，我一直係用住Stealth Sakra，咁多年都冇變過，所以我先向呢一段埋手，今次有Vyda Silver line同KBL Kimalaya 2，三組線同屬銀線，但表現各有自家優點，Vyda屬乾淨、清晰、速度快而且比較直白，如喜歡高分析無音染，此線實屬不二之選，而且造工都係一流，線身柔軟走線容易，接頭造工非常出色，價錢又合理，想玩有質素銀線真係可以優先考慮。Stealth 就空氣感強同溫和，又係冇乜音染，音色係三條入面比較暖聲。依兩組線因為一直有用住，基本上已經開晒聲所以比較容易掌握，至於條KBL⋯⋯據物流部資料提供，對線應該冇用過超過3個鐘，即係等同新線。此線線身造工都係一流，不過略為硬身少少，初試其實我仲未掌握到組線嘅特性，個音効唔係太接受到，因為能量感太大，而且將所有嘢都放到好大，不過咁…任何器材我都會慢慢再試，用煲線機煲煉咗100個鐘之後再試，好奇怪…條線表現非常平衡，有音樂感之餘，音質嘅比較實淨，而且控制力非常好，用咗之後個低頻亦收個好乾淨，依家好啱我們套機用，原本佢係第一個要叮走，依家反而係最後留低，你要我拆走都冇乜可能。









試完接線，下個位置就係唱臂線，之前一直用住Kondo LS-41，呢條線其實我冇乜投訴，以前屋企玩，呢條線其實啱啱好，音色細緻，人聲表現突出，樣樣嘢唔會太過火，不過去到大地方後我略嫌佢能量感不足，其實我心目中一早已經鎖定咗目標，就係Odin Gold，所以我都即刻訂咗返嚟，不過訂返嚟時間有段小插曲，我落單時太大意搞錯接頭類型，訂咗XLR版，到貨先記得DS Audio係冇XLR input，(DS Audio個唱頭係要靠RCA input頭個接地攞電先可以運作)，原本可以用個轉插解決，但個心總係過唔到，卒之又要拎返去換，來來回回足足等咗成個月，喺呢段真空時間，物流部又送多一條Crystal Van Gogh唱臂線上嚟，據悉依條線應該聽少過4個鐘，其實即係差唔多全新…Crystal線係有佢嘅優點，佢嘅”專屬”高音，我睇都好難搵到其他品牌可以替代，不過條線我覺得比較偏聲，聽女聲、小提琴認真無敵，聽依兩類型音樂真係會起晒雞皮，好似中毒咁會令人欲罷不能，所以最後要拆走係有少少唔捨得。





聽多幾個星期條Odin gold終於到貨，換上Odin Gold之後係有明顯進步，尤其配埋Grandmaster EX頭，有大吸大放嘅効果，分析力同細節喺我套機上係咁耐以來最好嘅，依組線總算冇投資錯誤，Odin Gold高音確實係冇Crystal Van Gogh咁華麗，但係換來更平衡，三頻更飽滿，佢無話聽邊種類型音樂係強項，總之成個通天老倌咁，有咩佢都包晒嚟做，樣樣交足功課妥妥當當，造工方面唔使多講，去到旗艦級冇乜可能唔好，唯一唔好就係價錢貴……線材調整方面大致上係咁，最後都係嗰句，沒有最好，只有更好…



不經不覺原來已經玩咗三個月，記錄去到第9篇，基本上要寫都寫晒，之後就開始慢慢玩，所以今篇係最後一篇，喜歡聽歌嘅朋友，歡迎PM約上我度聽吓歌、吹吓水。

racewong

無理由咁快完喎, 仲有好多線材要毒你呀

remychiu

睇到標題 :  9 飯可以唔食
笑死

zelo

racewong 發表於 2025-9-10 13:22
無理由咁快完喎, 仲有好多線材要毒你呀

俾我抖抖先~~ 放條生路我行

racewong

zelo 發表於 2025-9-10 13:35
俾我抖抖先~~ 放條生路我行

仲有SKOGRAND既線材啱啱到港， 諗住拎去Thomas ＆ 你個竇玩下

zelo

racewong 發表於 2025-9-10 13:44
仲有SKOGRAND既線材啱啱到港， 諗住拎去Thomas ＆ 你個竇玩下

好呀，依條咩線？有冇資料睇吓？

racewong

zelo 發表於 2025-9-10 21:11
好呀，依條咩線？有冇資料睇吓？

https://www.skograndcables.com/skogrand-beethoven

racewong

zelo 發表於 2025-9-10 21:11
好呀，依條咩線？有冇資料睇吓？