不負責任比較，膠好、卷好定CD好？

zelo

前排終於入咗部開卷機，聽咗一陣心血來潮想玩吓比較，三個音源 CD機、黑膠同開卷，同時比拼結果會點？軟件方面我選擇咗用當舖去做比拼，因為我有齊one step版本黑膠、一套開卷帶同埋隻玻璃CD，開卷帶同One Step版黑膠同屬一個發行商 AudioNautes Recording，玻璃CD就係Proprius出品，三套軟件都話係用母盤直刻，咁樣睇軟件方面應該算公平。



三個音源分別係Gryphon Ethos CD player、AMG 盤+AS Axiom臂+DSAudio Grandmaster EX頭+Odin Gold臂線、Techinic RS-1500 開卷機，睇牌面黑膠方面係完勝，對比起其他兩個絕對係超班馬，但結果係咪一面倒？



我首先聽黑膠，依隻黑膠本身壓碟好靚，碟面超靜，用上GMEX頭，音色非常細緻，高音靚到不得了，黑膠還原係無可挑剔，層次感非常好，音像立體，淨係依幾樣我覺得套碟非常超值，絕對值得收藏。

之後試玻璃CD，依隻碟我第一次聽係喺音技毒氣房，當日event 完咗之後，我係即場買嘅，依個版本可以話贏晒我手上咁多隻CD版本，係我咁多隻玻璃CD入面音効最好一隻，同黑膠播放有所不同，音効絕對精準，高中跟黑膠版本平分春色，不過對比下，CD聲効比較冷同生硬，欠缺一啲活力。

最後我再用開卷帶播放，依套帶分上下卷，係10寸 2 tracks 15 ips版本，格式算係非常高，音樂一開始已經覺得密度非常高，所有嘢係好連貫，極富音樂感，場面拉闊咗起碼三成，所以好有現場感，還原度非常高，尤其鼓聲方面，另外兩個版本係做唔到，不過高頻方面就唔及另兩個版本。

簡單比喻，聽玻璃CD嘅感覺似係坐喺戲院聽音効，速度快、精準非常過癮。聽黑膠就似現場聽錄音，比較有肉地，現場感濃烈，可以感受到樂手有來有往咁演奏。開卷帶就似坐喺餐廳入面，一路嘆住洒一路望住台上表演，感受到樂手嘅熱情同演奏技巧，係令人心身都溶入現場。

三套比較下按價值算，黑膠版算係超值，其次係玻璃CD，最貴係套開卷。但以表現計，開卷其實係最超值，我部唔知幾多手RS-1500開卷機已經係老爺機，RCA頭都已經有生鏽，電源線係連機身嘅黑雞線，我仲要用降壓牛再搭上白兵拖板，接線仲係用對EWA-IC25平線（廠都應該執埋），結果居然可以同另外兩套系統分高下，可以講性價比真係超高。



一般人會覺得開卷麻煩，其實黑膠都唔容易，開盤只係上帶回帶多啲功夫，其實唔係太複雜，回完帶按play基本上冇任何嘢要攪，只要你唔去揀歌，我自己就通常一碟到尾，所以我完全冇問題，唯兩點比較麻煩係軟件選擇真係唔多，同埋放存卷帶比較麻煩，屋企濕度高就要整部防潮箱放帶。
總括嚟講，我都係會選擇黑膠為優先，開卷帶需然好聲好玩，但普及性始終唔高，不過我都會繼續玩。

Sa683s

同時有三個老婆，簡直係實力和硬實力嘅最佳表現

momei

理論上開卷錄音帶是最好聲。因為他是一比一從母帶抄過來，（CD 和黑膠都是一張張壓出來的）。
開卷錄音有兩個大問題。第一就是現在很難買到新的開卷錄音機来播放。第二就是能夠買到的開卷錄音帶是非常少，而且很貴。多年來已經沒有唱片公司用開卷帶來錄音。買得到的都是舊錄音，但音質可能已經變差了，因為母帶的磁粉已經部分脫落。文中提到的Jazz at The Pawnshop 已經是五十幾年前的錄音，不知道唱片公司賣開卷錄音帶時有沒有附上明確說明它是從原版的模擬錄音母帶抄過來，還是從後期的數碼化錄音母帶還原模擬(Analog)錄音再抄過開卷帶的。
*其實黑膠和原始的模擬錄音母帶的音質相差也很多，了解黑膠的製作過程和重播的問題就知道。很多年前我和Reference Recording 的老總Tam Henderson 有書信來往。他送我的一隻單曲test pressing (聽text pressing 後修改刻製父母盤的缺點才大量印碟) 他附上說明話test testing的音質和母帶仍然差很遠，左右聲道音量是差了2db。

banjo

照咁睇, 黑膠個平衡點係攞得最好.

momei

大家如果了解黑膠的製作過程，就會知道cutting engineer是要將從母帶輸過來的音樂，根據RIAA標準，調整了高低音才將它刻落lacquer 盤。重播時，唱針拾到的訊號也要根據相反的 RIAA還原。這方面就會產生兩個問題。第一，cutting engineer 用來調教RIAA 的設備，是否同重播時的RIAA 設備百分百一樣呢。第二， 唱針拾到的高低音訊號如果不是百分之一百， 但是重播的RIAA 就當它是百分百來還原，那麼重播的音色和原本母帶的是否有差別呢。
製作黑膠另一個特別要求是要將低音放到中間，音槽的兩邊平衡，唱針才能track 得到。這樣，黑膠的低音定位就與現場是不符的。
舉一個例子，Sheffield 的直刻碟，King James Version, 重播時就聽到套鼓是在中間，但睇返錄音現場拍的照片，套鼓是在左上方的。