DS Audio SC-001簡單使用報告

zelo

琴日收到依個DS Audio嘅新玩具，依個名為SC-001唱片掃早喺幾個月前發表，老實講依啲唱片掃市面五花八門，都應該冇乜特別，之不過HiFi友（尤其玩黑膠嘅）都係鍾意玩啲小配件，情形就好似買護膚品咁，咪來來去去都係護膚，點解啲人又會試完又試、買完又買？講到尾都係身痕。不過依個黑膠掃係有少少特別，佢加多咗個聲波震動功能，聲波震動技術唔係咩高科技，但應用喺依方面應該算係第一次，據產品說明，依個毛刷可以做到每分鐘約11000次振動頻率，睇個數值好似好大，以為使用時會好震，但開住又唔覺得喎，成件產品都係用上金屬外殼，拎上手都有啲重量感，外觀同造工係靚嘅，日本人喺外觀設計確係有一手。







機身後面有兩個螺絲位，用附件工具拆開再入兩粒3A電就用得，按住手把上個掣見到綠燈代表開住，如果見到紅燈就代表將要換電。



同場我用另一品牌Ramar唱片掃比較，Ramar已經算係非常高質嘅唱片掃，効果出名顯著，當然佢個價格亦都非常高，仲要排大隊長龍等收貨⋯⋯按平常習慣，每次落碟我都會先用佢掃一次碟面，理論上碟面都應該好乾淨，就唔信邪用SC-001再掃多次，之後睇睇個掃，又真係唔知啲麈喺邊度彈出嚟，見到仲有些微嘅麈粒黐住個掃，成件事就係咁神奇…





至於聽感，對比起之前碟面確實靜啲，我共試咗三隻碟，使用前後係有少少分別，依個掃應該會成為我黑膠日常用具。我只想講個掃其實只係一件小小配件，佔整套黑膠系統好少部分，靚唔靚聲係睇你套系統tune得好唔好，依個掃唔可以起死回生，不過可以錦上添花，對追求極致嘅燒友，依個掃係幾好玩嘅，我本身係DS Audio硬粉，係好鍾意依個品牌，我自己係十分支持嘅，所以點都會有少少偏私，值唔值得買就自己衡量啦。

racewong

信你. 入貨