本帖最後由 rumor 於 2011-7-8 13:25 編輯
正值hiendy一週年, 想同大家分享吓我被hi-fi玩既經歷. 如果大家都有一d有趣或者難忘既經歷都可以分享吓.
1. 吸塵機.
我剛開始玩hi-fi係我大哥教我既. 當時佢比咗一對 AE 1 書架喇叭比我同一架英國合併膽機比我. 我就出錢買架先鋒DVD機番嚟就開始我既hi-fi路....
當時我好"錫"對喇叭, 一來大哥送既, 二來新玩hi-fi當然當佢係寶. 每個星期都會同佢上吓 old english lemon oil, 又同d單元清潔吓. 有一日我發覺個低音單元有d塵, 又咁arm新買咗部吸塵機. 咁就順手過"順嫂"咁較慢個吸力去吸走d塵, 誰知......"pop"一聲......咁就唔見咗2千銀....
----------------------------------------------------------------------------------------
2. 牆蘇.
玩玩吓我就學人玩美式電源插頭, 我自己唔係電工出身最多係中學學過吓咩叫做"火,水,地". 但為咗好聲又唔識人咁就幾大就幾大, 燒賣就燒賣, 去咗鴨記買咗個美式牆蘇自己換. 我首先打開個總電箱, 見到一排制, 係唔知點簡既情況之下, 就只有park咗個最大既制. 當時已經係下午4:30. 之後就同個牆蘇搏鬥咗4小時, 其間學識咗用口擔著一個有1kg重既電筒.
----------------------------------------------------------------------------------------
3. mud 唔係高mund 咩.
玩吓玩吓, 覺得自己開始有耳仔,識聽野(其實到宜家都係木耳), 又有人介紹r## 同 avbxxx 既網站, 咁就開始我既"玩"hi-fi 旅程. 其間係"半筒水"知識既情況下, 知道 goldmund 有平價版後級, 又聽人講goldmund係音響界好聲既指標. 咁就一路搵吓點可以一親香澤. 咁arm比我見到有人賣"平價goldmund" 後級, 咁就拿拿聲籌錢跟住同買家reserved佢. 交收之後番到屋企, 睇吓, 吓.....Job (goldmund design)........咁又比咗學費啦....
----------------------------------------------------------------------------------------
4. 黑膠.
如果一個未玩過黑膠盤一開始就玩linn lp12, 你估會係點呢? 我可以話你知, 聽一隻lp之前要用2個鐘去set盤, set針. 當時仲要學人玩臂線, 買咗番嚟唔知點換, 又鉗又刀攪到原本條線斷埋個頭仲連住支臂. 最後都係要放下自專心去問人, 師兄就同我講"你連set頭都未識換咩鬼臂線呀, 要換要用六角匙擰鬆咗先架"
----------------------------------------------------------------------------------------
5. 買賣奇緣.
真係一樣米養百樣人. 上網買賣都好多有趣/激氣野. 試個我賣對rca比人點知佢sell番我買insurance, 又試過有條友攪完我一大輪又要幫佢上網print番100頁紙manual點之零晨一點打我電話唔買因為人地平100元. 但有好多都好好傾仲做咗friend. btw, 有時二手佬都幾好, 價錢arm就沙頭角都二話不說24小時內攪掂, 唔使煩!
----------------------------------------------------------------------------------------
6. 熟客....57折.
每個人都有相熟既店舖. 一來招待比生客好好多(又野飲又好聲氣, 有"女"分分鐘叫埋出嚟招乎你 ), 二來任試唔嬲. 但一講到錢, 又係唔係再講感情呢. 我都唔知試過幾多次唔熟唔食既情況. 個hi-fi架我買話就話平通街價錢,熟客至攞到. 佢查實博大霧博你唔格價唔上網唔識人. 其實仲可能貴過walk-in客. 佢心諗上次"lup"唔到你水, 今次仲唔攞番夠本. 最後仲整句:"呢個筍價唔好揚出去呀"........diu......
----------------------------------------------------------------------------------------
7. 二手回收...公價7折.
近排發生. 話說我有日行過二手店見到架p-05,d-05. 我一直都好欣賞esoteric(直到最近, 後話...). 我問個老闆幾銀跟手開聲冇問題比錢送貨番屋企. 聽咗兩日發現點解有吱吱怪聲出現, 時有時冇. 再細心聽原來係個p-05怪叫. 二話不說走出去二手店要求退錢. 誰不知佢話"我幫你攞番去整囉, 一係就7折幫你收番". 我攞架計算機一計....嘩......用兩日唔見成萬幾兩萬..... 咁我話"唔係呀老細, 部機有事唔係人為, 你要我買番去用兩日就入廠". 佢就話"你唔好兇我呀, 我唔受嫁, 你第一次買二手野呀, 出咗門口就7折收番, 係行規嚟架啦....". 好彩有客係佢度試緊野, 唔係我估我今日唔可以同大家係度吹水. 我一於死lur, 最後蝕咗$5k去試聽2日p-05/d-05.
----------------------------------------------------------------------------------------
8. 高科技: 鐵釘中出
真係要搵吓玲玲姐睇吓我八字係唔係同esoteric 相沖. 同我熟既網友會聽過我呢件事.
我一直都好欣賞esoteric, 佢cd機既造功同佢既vrds係國際公認首屈一指. 話說我2010年用咗我既老本買入咗x01-d2. 開頭以為好威同好滿意, 但用咗兩個星期發現....吓......點解xlr細聲過rca咁多架(volum 制 9 點同 11點半既分別). 咁我問番間shop佢地架demo有冇同樣情況啦. 佢第一次答話冇. 我自己就send e-mail 比 esoteric 問, 佢就答"it is a matching problem with your current amplifier, we are sorry". 我之後再走落間shop叫佢試比我聽, 發覺都係有大細聲問題但唔係好似我架咁嚴重. 咁佢同我講攞我架機去佢shop度試. 我就本著hi-fi友"唔怕擔擔抬抬"既精神, 攞住架x-01 d2 由停車場步行300米去到間shop到試, 試咗真係有問題. 咁間shop就安排我換機....
各位, 好戲在後頭. 行收到order之後就專誠由日本空運一架x01 d2比我. 今次由行直接送到我屋企. 滿以為事件就咁解決, 點知.......
當兩位師父從盒將x-01放到hi-fi架, 再接通電源之後, 奇蹟就出現啦 ..... 其中一位師父按下"open"制之後, cd tray 慢慢彈出, 但彃咗3份1之後, 有一口大約半吋長既螺絲係cd tray 口跌出"click"著個tray, 我一見到之後我話"唔係呀, 師父你地睇吓....", 我見到兩位師父8目交投(2個都帶眼鏡), 面如死灰, dead air 咗5秒. 然後就步前幾經辛苦將螺絲攞出. 再扮作冇事發生照樣擺隻cd入去試. 試咗一首歌xlr同rca既分別, 好明顯好過我部好多. 之後就問我"ok 嗎?" 我話"師父唔使問啦, 我買祖國vcd機都唔會粒螺絲走出嚟啦, 你估玩"歡樂天地"咩. 我唔該你將件事report番比日本知,我要一個合理解釋”. 總之整件事攪咗半年,而最後我都轉咗k-01.
----------------------------------------------------------------------------------------
9. 絕版cd 價值.....
大家有冇係sogo 9樓檔cd舖買過絕版/日版cd呀?.......我有
一隻日版bee gees我用咗8舊水買, 你話我幾叻.... (近排我係cd warehouse 見都係3舊有找... )
----------------------------------------------------------------------------------------
10. 綠色筆油cd
你唔係未試過呀? 不過請記緊要用特製綠色筆去油呀. 我有次問我老友借咗隻cd嚟聽, 點知聽完攪到我個cd tray同對手變咗綠色. 抹餐死呀.....
----------------------------------------------------------------------------------------
11. Upgrade?
我知呢個話題會好敏感但都講吓比大家聽吓.
話說當初我買宜家對speaker真係幾大膽, 對speaker好大隻唔知玩唔玩得好. 但本著"死就死啦, 人生有幾多個十年"既精神就一於試吓. 係買speaker既時侯亦同時upgrade咗中音單元. 滿心歡喜咁吊咗佢番屋企之後就研究吓點樣玩好佢, 又借線又叫人上嚟比意見. 總之都係玩得唔好又boom又叫...... 我有一刻曾經問過自己"我查實係唔係自己玩自己, 對finn(之前對speaker)咁好聲而家換咗之後就衰聲到爆, 又洗咗一大筆錢, 唉......". 冇法啦, 對喇叭咁大對賣又難唯有焗玩啦.....
玩吓玩吓就有人同我講: 煲吓先啦, 你不如換番曬d雞線聽真先再諗啦. 想當年玩hi-fi唔用番3/5/7年都唔換野架啦. 大部份時間都係鑽研點玩好手上既野, 唔係去研究下一步換咩.
咁我就隨著呢個方向, 去認識多d器材既特性, 家訪吓學吓人地既心得. 攪吓攪吓, 就知道自己開頭犯咗錯: 1. 唔知套野要咩就亂用線材. 2.無端端upgrade咗中音單元.
攪咗一輪, 開頭既booming其實run-in咗再用合適既線材已經可以解決. 而家就同原廠要求換番個單元, 宜家個代理又唔太想認數, 攪到晚晚要同荷蘭friend 交涉. 唉, 查實真係"本來無一物", 當初換咩鬼呀. 又學到野啦.....
----------------------------------------------------------------------------------------
12. 試機天碟.
你地既試機天碟係邊隻呀? 最高紀錄一個月內用佢試過幾多套機/連續聽幾多個小時呢? 我記得有一排好興用"蔡琴"嚟數"田雞", 我連續用同一首歌去試咗一個月. 係唔同既system去聽吓"有幾多隻田雞". 結論係......數到最多個set唔係一定最好聲. 咁查實數嚟為咩? 我老婆最後仲彈咗句"你日聽夜聽同一首歌你悶唔悶嫁????
----------------------------------------------------------------------------------------
13. Window Shopping
女仕行街shopping都會走入去間shop撩吓d衫睇吓arm唔arm, hi-fi友點解咁驚推開道門入hi-fi舖睇野呢? 我係其中一個. 我都唔知幾時被人思想改造咗, hi-fi window shopping 有咩好睇呀? shopping 唔係要入去間舖了解吓同"聽"吓既咩. 但係我咁多年都有呢方面既恐懼症. 總係鐘意係人門口"妝妝吓", 一同入面個sales有眼神接觸就會閃避佢眼光再轉身走人. 我周不時都搭lift上到添置21/f再行樓梯落地下, 我可以講佢既走火通道應該冇問題, 但千其唔好問我睇過d咩, 我自己都唔知. 友誠仲大劑, 條樓梯又難行, 搭lift開門就係間鋪, 但d hi-end 2 channel 又擺係間唔開聲既試音室入面. 我試過有次膽粗粗推門入去點知比人問 "咩事呀?" 我心諗你估我想老笠咩, 架架20kg 以上攞都攞唔到啦. 一係你就好似我d村屋咁係門口寫"內有惡狗".
反而我去香x影x寄賣我會敢坐係張好Q矮既SOFA度聽吓野........點解.....點解....點解我會咁失敗........我老婆去LV, GUCCI, 雞毛就有人開門比佢, 唔買都可以叫sales 攞嚟試吓, 冇買野走出門口都講句"多謝光臨".
---------------------------------------------------------------------------------------
致敬
講咗咁多衰野, 都係要講番d好野打完場 (唔係真係以後唔使出嚟行 .....講笑啫... )
其實各行各業都有佢既經營困難, 亦都明白做hi-fi salesman 唔係一般人想像中咁風光. 個客壓價老闆追數代理件貨又遲到仲要作故仔安撫個客, 真係唔係咁好搵. 做hi-fi show 一早就要去set場老闆仲要唔大件唔show, 分分鐘攪到坐骨神經痛. set 好咗當日又要企足10幾個鐘又一路係度比d hi-fi 友話衰聲, 心諗"大老呀個場唔係我架我控制唔到".
所以我都要多謝咁多位 hi-fi salesman既辛勞. 我亦都遇到一d好既 hi-fi salesman, 任勞任怨又比我壓價又聽我吹水. 唔該曬
我呢d hi-fi 友當然唔想你地冇得撈, 你地冇得撈我地就冇野玩. 如果你地可以面帶多一點笑容, 講野有番7成真, 又唔好老點咁勁, 其實我都好尊重你地架.
點都好, 都要講句 "THANK YOU" |