AV急症室之出診報告 - edd0325之先天性不平衡
初初收到呢位病人(Eddie – 網名Edd0325)登記器材列表時,應該會係一個簡單任務,屬小兒科,因為病人所用嘅器材雖未達旗艦級數,但已經件件精品,相信表現未如理想,係患者入世未深所致。我地兩個二打六醫師一心諗住只要使出三兩下功夫應該好快搞掂,點知登門一望現場實際器材,唉!難搞!難搞!
明醫師例行將隻〝超人特工隊〞放入藍光機把把脈,嘩!真係被佢嚇一跳,正如機主所講,脈象凌亂,前後環繞不平衡、中低頻出現斷層、超低頻散慢、毫無包圍感。細問機主之下,得知原來呢套架生係佢嘅處女組合,選用嘅器材全部都係網上爬文搜集資料得出嘅成果,而前置係因為舖頭大特價而購入,亦聽聞中置最好與前置匹配,所以忍痛一擲萬金購入同一品牌。不過機主一邊口吐血絲一邊感嘆曰:器材就好睇喇,但唔知點解啲聲咁差呢!仲以為行一轉自動設定就可以安枕無憂,結果同預期係兩樣,所以要麻煩HIENDY奇人異仕可出手救救小弟!
先睇睇呢位病人嘅病情實況
所用器材
既然Auto setup如此不濟,明醫師索性直接轉到”記憶2”從新調校,由距離、喇叭大小、分頻點、以至其他設定不假外求全人手打造,最後再用測音錶量度各聲道音壓,將六隻Dali喇叭仔校大約2個db加強環繞氣氛。之後再聽一次〝超人特工隊〞片段,機主從沙啞的聲音中叫出一聲:YES!番晒嚟,依家效果好似我喺影音舖頭所聽到嘅好接近!雖然機主已經開心到跳起,不過百事佬依然未感滿意,原因係Dali喇叭仔同前、中置聲音質素距離實在太大,所以當聲音移到後面時會感到比較薄弱。百事佬於是打開Menu逐一將六隻Dali喇叭EQ作適量調整,希望能夠盡量取得平衡,不過一下子將Dali喇叭仔低頻推得太多,佢地完全招架唔嚟,正諗住用分頻點嚟幫助一下,但又發現Pionner嘅AMP仍然維持住要統一調校,唔可以獨立咁將後置及後中置分頻點加到100Hz,既然如此,唯有將具有一定質素嘅前、中置喇叭設定到Large輸出全頻,再將分頻點設定到100Hz等超低音幫助一下各環繞聲啦。
明醫師從新調校設定部分
將所有喇叭設定為small
將surround設定係side
用拉呎量度實際距離
再用測音錶量度各聲道音壓
將原有之Loudness Plus由on轉為off
多次反覆試聽後,最後都是將前、中置喇叭設定為大,而其他設定小,分頻點為100Hz
棄用ICE POWER後的PIONEER,聲音比以往有所改變,高音稍減,所以將中置高音部分略為增加
前置喇叭質素高,沒有需要更改設定
Dali喇叭相比下較前、中置遜色,所以作出適量調整
Surround
Surround Back
Front High
環繞聲部份已經解決,接住落嚟就係到十仔。聽過忍者刺客一段連續槍炮聲,發覺隻威力登十仔同整套喇叭出現斷層情況,而可能因為擺放牆角嘅關係,低頻一係唔嚟,一嚟就又矇又現形。機主Eddie話當初買十仔時,同個sale講話要12吋,佢就猛話10吋已經足夠,咁依家係唔係無得救呀?百事醫師取出聽診器一個箭步走去十仔度聽聽背脊,WHY?WHY?WHY?點解分頻點set咗做60Hz架?拿拿淋調校番120Hz,更贈機主一句:由於你之前校咗60Hz分頻點,所以由60Hz以上嘅低頻都出唔到,所以與其他喇叭出現斷層情況,如果隻十仔有by-pass就更加要set by-pass添。為解決現形同矇嘅問題,機主拿出最後一啖氣聽指示將隻十仔從牆角搬到左前置嘅右邊,務求減少牆角嘅反射。跟住反覆再試幾後低頻片段,現形同矇嘅問題已經解決,不過仲有進步空間,等隻十仔再run in一下,應該可滿足機主現時嘅要求。
機主原將分頻點設定在60Hz
沒有by-pass,所以將分頻點調校至最大120Hz
超低音之前擺位
重設後的超低音擺位
機主聆聽空間不小,現用的超低音有點力有不逮
今次任務比想像中艱鉅,而現實中亦有不少用家都同樣擁有呢個問題"喇叭質素不平衡",呢個設定希望可以幫到大家。
最後;機主嘅後置喇叭安裝設計好特別,原以為係金屬造成,原來係利用啞加力膠塗上白色油漆,美觀且實用,藉此同大家分享一下,值得參考。
|