<< AV急症室 >>
Roybizkit的AV音樂廳
過去7月同8月,我地hiendy節目真係一浪接一浪,個個星期五/六都有野玩!而各hiendy版主都為各會員預備及安排節目而忙不過來,引致" AV急症室 "有大量診症輪候 ..... 到咗9月,無咩活動的時候,我地都應該係時候清清佢 ~ 話說係一個月黑風高嘅晚上,收到條"炳雄"嘅電話。喂!幾時得閒呀?有個急症想同你一齊去睇睇喎,仲要住係你果頭架,有冇興趣呀?我一聽到,嘩!咁正!家訪街坊都算係第一次,行過去都係十分鐘唔洗!有冇咁好玩呀!二話不說,緊係去啦!雖然我都未知家訪邊位會員,但係大前提有得玩有得聽,邊度都去啦 !
當晚我同條"炳雄"相約咗係屋主樓下個商場等,最過癮都係可以"踢拖"去家訪,真係方便!我用咗8分鐘路程行到商場,老遠望過去已經見到"炳雄"同屋主( roybizkit ),但係我望真d,原來"潘sir"( rklpoon )都有嚟玩,呢個真係始料不及!我地打吓招呼就即時行人,因為都接近晚上8點,都怕校機校得太夜會麻煩,所以都係速戰速決!正當我心諗,校完機去邊到食飯之際,上到屋主家,打開門一入去,就已經見到有pizza放咗係度等緊我地!嘩吓!真係細心同客氣!我仲以為食完低音先有飯食,原來係食完飯先舒舒服服食低音!真滿足!好多謝屋主同佢太太嘅熱情招待 !!! 開飯之前,我地都走過去屋主的音響器材打量一番,先了解兩聲道同5.1的影音器材,之後再係食飯嘅時間分享音響嘅樂趣,真係傾得好開心,唔使校機分分鐘可以傾成晚.....
係開始校機之前,先了解一下Roybizkit的影音器材 ~
5.1 Channel :
Projector: SONY HW30ES
Screen: OS A1 80" Pure Mat II Plus
AV Amp: Anthem MRX300
BDP: Denon 1611
Front: Sonus Faber "Grand Piano Home"
Center: Sonus Faber "Solo"
Rear: Sonus Faber "Wall"
SubWoofer: PolkAudio 12"
2 Channel :
CDP: Densen 420+
Int. Amp: Electrocompaniet ECI-5 (AV Bypass from Anthem MRX300)
影院前半部見到一套3件Sonus Faber喇叭
AV主力近期大熱ANTHEM MRX-300 + DENON 1611
兩聲道用咗Electrocompaniet ECI-5 + Densen 420+
影院後半部用咗SONY HW30ES + Sonus Faber "Wall"
隱藏係櫃後面交足功課嘅PolkAudio 12"
投影幕用OS A1 80" Pure Mat II Plus
++++++++++++++++++++++++++++++++++++
好啦!器材大致都講過吓,正式到戲肉啦!又請........炳雄出場!
一開始,都係一貫作風,先嚟個功夫熊貓!都係聽大豹越獄同五俠戰大豹兩段。我都明點解試親都試呢兩段,就係因為聽慣聽熟,有咩唔對路,一聽就知要校咩,呢隻可謂炳雄嘅校機天碟,請各會員留意自備應診,哈哈!出奇地,今次炳雄聽完之後話唔錯!高/中/低都好平衡,弱音都清晰細緻,整體音場環繞連接無問題,只係感覺超低音比較弱。吓!即係無野校收得工?後來我問返屋主,你自己SET機嗎?佢就話我都係用ARC設定咋!可想而知,ARC真係幫到手 !!! 跟住炳雄就話,要套機再突出D聲效,都要細執少少嘅 ~ 呢D就係經驗啦!之後炳雄再校高D各聲道輸出電平,加大個低音電平,最後改咗個中置分頻點,就大功告成!可以話係幾輕鬆嘅一次!屋主急不及待就攞出自己最鍾意試嘅藍光出嚟試!係一隻較ROCK嘅演唱,當然啦!得到各聲道電平增加同低音音壓提高,各電子樂器同鼓聲氣紛都明顯刺激突出好多,弱音更覺明顯!屋主表現十分滿意!突然間!潘SIR一聲"試下我帶嚟隻碟吖" ~ 都好喎,時間仲早。原來潘SIR隻碟係百事推介嘅"破曉開戰"直昇機一段,今次到我可以坐正皇帝位試聽,環繞氣紛好好,直昇機四周迴轉連接無誤!身歷其境一樣!最後仲有試Hit Man Retune藍光碟,正正就係開正Sonus Faber呢種音樂味道,所以我點題就用咗"Roybizkit的AV音樂廳"呢套野聽演唱會,太正鳥 !!!
++++++++++++++++++++++++++++++++++++
大致各聲道電平+3db,低音加大至+8db
尺數全部無需變動
中置喇叭由80hz改為60hz
++++++++++++++++++++++++++++++++++++
總結 : 今次應診相對輕鬆,一早用咗ARC設定好已經有板有眼,而中置及後環繞喇叭動用60 watts 8 ohms嘅推力都算控制得宜,當然再加後級加大功率會更上一層樓啦!細節連貫會更為明顯。我地最後都建議咗屋主升級超低音,雖然PolkAudio 12"低音交足功課,但一D深沉同層次感強嘅低音聲效,仲有改善空間呢!我地俾咗幾個超低音箱型號俾屋主參考,睇吓嚟緊屋主會唔會有開箱文POST先 ~ 校機時間發生咗一段少插曲,就係我地校機校到俾管理員撳鐘仔 !!! 原來我地奪去屋主既第一次呢 !!! 喔 ~ 真係唔好意思啦 ......謝謝收看 !
----------------------------- 完 -----------------------------
|