身為HIENDY餅主既我, 以擁有一對屏風喇叭而自豪!
原因當然唔係話MAGNEPAN係天價器材, 亦唔會話MAGNEPAN係最靚聲既喇叭. 我自覺自豪既原因, 就係可以說服同我老婆, 可以長期比我擺對屏風喺廳中間. 哈哈.
自從上次玩完對BRYSTON 28B SST2後, 夾屏風好聲就夠晒好聲啦, 但下下要搵成千火輸出既後級服待佢, 對我將來測試既後級有著很大既界制.
一直以來, 我都搵緊對座地喇叭仔, 第時可以試多D唔同火數輸出既後級/合併機等等.
之前已試過對EVENTUS METIS, 今次就一於玩盡D, 試下依對YG ACOUSTICS CARMEL. 睇下佢可唔可以比到我驚喜.
去相先.
CARMEL是YG ACOUSTICS o係2010年推出, 到依家都出左四年了, 在香港網上HIFI論壇, 的確仲未見過有用家開箱報告, 甚至連討論都唔多見, 這令我十分費解! CARMEL話晒都o係TAS於2011勇奪 (GOLDEN EAR AWARDS). 無理由無人識貨喎.
好, 一於搬佢返屋企慢慢試清楚佢既威力如何? 何得何能可以拎到金耳朵這大獎.
話說送喇叭到我屋企果晚, 我老闆仲未返到黎, 我當然快快手咁將對屏風拍埋牆, 跟手就將對YG仔放o係屏風既位置上. 攪掂晒就開機大吉.
當坐回皇帝位時, 眼前視野廣闊左好多, 仲可以直望到門口既走巷入口.
同之前既屏風相比, 依d CARMEL的確靚仔好多.
產品介紹
講返依對CARMEL既OUTLOOK, 全隻喇叭用左三角柱型設計, 睇返上面D相片, 側板用左一塊過既厚鋁合金板連接住高音部份與中低音部份既面板, 中低頻面板微微向上傾斜, 廠方解說這可令時間相位一致性更高，對結像既線條同音場既層次定位有更明確既幫助.
全對喇叭更使用了縲絲直接鎖定全個箱體. CARMEL低部用左一塊三角型厚鋁合金板加上三粒釘腳.
Carmel的單元係使用ScanSpeak既1吋絲質雙振膜高音單體, 中低音就用左Revelator 7吋低音。
YG Acoustics Carmel重要性能規格：
頻率響應：35 Hz至40 kHz±2 dB
全頻段相位差低於±10度
專利DualCoherent分頻網路，分頻點1.75 kHz
採用自家獨立開發軟體設計
效率：87 dB / 2.83 V / 1 m 2π anechoic
阻抗：一般阻抗8Ω，最低阻抗4Ω（於4 kHz）
尺寸（高x寬x深，cm）： 102x28x36
淨重：30公斤（每聲道）
測試器材
今次既測試比較特別, 因為依對CARMEL留左o係我屋企都好長時間, 所以我可以用兩套不同風格既組合去推佢.
1) Audio Research CD8 + Reference 5se + Bryston 7B sstc (600w@8ohm per channel)
2) Audio Research CD8 + Viola Cerscendo + Concerto (100w@8ohm per channel)
其實測試器材, 當然係可以在不同組合下試下佢既特性. 咁就最好不過啦.
不過我地HIENDY暫時未有[試音室], 現只能以我家作為試音室了.
好在我老闆暫時都無咩特別投訴, 哈哈.
測試器材 (1)
我自己套機, 我當然最清楚不過啦. 加上依對YG CARMEL送到我家時, 套VIOLA仲未黎. 所以最先就先用我自家套機試聲先.
未開聲之前, 其實我對依對喇叭仔無咩期望, 咁細對喇叭, 以我聽開既屏風咁大發聲面積, 估計場面氣勢都會輸好多, 只期望佢既中頻感染力會比我對屏風好. 就已心滿意足了.
試左幾首歌, 頂, 完全唔掂喎, 呱呱嘈, 好硬聲, 又粗聲, 音場飛晒出黎. 咩料呀?! 立即打比代理問下原因, 原來對CARMEL之前本已煲透, 但因之前代理裝修, 好耐無開聲了! 唔怪得咁硬聲咁難頂啦.
好, 就煲佢一個星期, 睇下佢有無改善. 仲係咁難頂就比返佢算數.
好在, 第二日已聽得入耳, 這好大可能係對喇叭真係本已煲透, 只係放埋一邊太耐無開聲, 所以要小小時間RUN-IN啫.
如是者, 一煲就煲左成個星期, 我聽既音壓亦越黎越大, 哈哈. 煲透左既CARMEL真係好鬼堅, 越黎越發覺佢有個特性同屏風好似, 就係越大聲越過引.
首先, 由於對CARMEL既全厚鋁音箱夠晒實淨, 加上佢只係兩路單元幼身柱型設計, 這兩方面就能輕易做出甩箱感. 全個音場毫無難度咁飛晒去喇叭後面, 加上YG ACOUSTICS既"絕對相位"技術, 使音場既層次定位感比一般喇叭仔會有更明確既結象. 佢做出黎既3D空間感, 只係略略輸比屏風小小, 這真係令我大開耳界, 咁細對既喇叭仔, 竟然可以做出咁大咁深既3D舞台. 
至於音色方面, 佢我會以[中性無添加]黎形容佢.
而我最想要既中頻感染力就當然係箱體喇叭比較優勝啦, 但礙於係我套機+線材都係比較[理性], CARMEL只能多了一份喉底餘韻, 仲未去到[聽到起雞皮]既感覺.
到佢既低頻了, 這方面實在強勁, 估唔到一隻7吋單元, 可以出到咁豐富既低頻, 佢既能量感比好多中型座地喇叭更豐富, 這是我最為驚嘆.
測試器材 (2)
直至一套VIOLA送到我屋企, 當然二話不說就換走套ARC REF5SE+BRYSTON (之下簡稱A+B), 將VIOLA上架. (有關VIOLA既測試REPORT, 可能要遲D先會再詳細報告)
聽完一首人聲, 一首古典爆棚, 我心中引起左一個問號, VIOLA唔係美國機咩? 點解佢既表達方式同我套A+B咁唔同.
A+B推動YG CARMEL既時侯, 音場既還原力很強, 又深又闊. 瞬變強, 速度快, 簡單說就係 - 豪邁開揚.
但當換左VIOLA推YG CARMEL既時侯, 其幼細順滑質感, 比A+B強上很多很多. 尤其係樂器與人聲既結象力, 凝聚力. 真係嚇左我一跳. 高至超高頻既伸延更幼滑, 這幼滑既程度, 我諗可以與同樣係以超高順滑出晒名既GOLDMUND相題並論,
中頻人聲質感比我用緊既A+B更嬌柔, 更細緻, 分析力更高.
至於低頻方面, 相對地就沒有A+B推出黎咁豐富層次了. 始終A+B既600w@8ohm既輸出並唔係講得笑. 但VIOLA 100W@8ohm推CARMEL 既質感線條比A+B更強.
總結:
寫報告之前, 我睇過有關YG ACOUSTICS CARMEL既文章, 當中題及到YG CARMEL係針對性設計比一D聆聽空間不大既用家使用.
但當我試用過CARMEL之後, 發覺CARMEL配以一部優質既大功率後級, 絕對可以好輕鬆咁在300尺既聆聽空間播放出豐富而龐大的音場, 加上佢地獨有既相位技術, 對每件樂器人聲既凝聚力, 定位, 線條都可以以更精準咁表現出黎.
如果以我聽過既小型座地喇叭黎講, CARMEL係最能夠表現出超越細小體型表現的宏大音場震撼感覺. 如果你既空間放不下WILSON AUDIO等等既中型喇叭, 但又想得到宏大既音場表現, 我建議你地快D去YG ACOUSTICS代理聽聽這對CARMEL.
~~完~~ |
IP卡
狗仔卡
發表於 2013-12-2 09:51:48
提升卡
置頂卡
沉默卡
喧囂卡
變色卡
顯身卡
發表於 2013-12-2 11:03:46
好想買添。。。。
