一間獨立影音室的誕生

bigpun1975

Hiendy 家訪交流室 ( 2011年1月號 之二 )

編輯 & 圖片: Pepsiman
文字: 豬賓


    各位好，又到咗虎年年尾喇，雖然筆者與Pepsiman 都忙於打掃屋企及辦年貨，但係我哋一啲都無偷懶 ，仍然四出家訪 ，再次攞齊架生去幫有需要嘅會員「解毒」(有相為證) .....


成日聽人講玩HiFi要買乜買物，要加乜加物先至算得上真正發燒 ，而今次家訪對象Stanley (網名Stanley2468 ) 佢竟然為咗玩HiFi 而去整咗間HiFi 獨立房出嚟 ，你地話佢係仍係發燒定係發癲吖 ？不如我哋又去探討一吓呢位發癲友；吖唔係 ，係燒友嘅故事吖。










由東到西！

     Stanley原本與太太居住於將軍澳某大型私人屋苑，閒時都喜歡聽吓歌，睇吓戲咁。直到有一日睇睇吓戲嘅時候，忽然間聽到門鐘聲，原來管理員嚟話樓上投訴佢開得太大聲，叫佢細聲啲咁話。大家都知道，投訴呢家嘢通常都係一不離二、二不離三架啦（呢度有兩位版主應該好清楚），Stanley自問每次都好小心控制音量，但係換來都係不停被人投訴，最嚴重一次係晚上八點睇戲都難逃被投訴嘅厄運。自此Stanley就覺得心灰意冷，屋企套HiFi都係擺多個玩.....。直至有一日，有個朋友邀請佢去家中作客，該位朋友係住在村屋的，自己同家人住一層，而樓上就建立咗一間HiFi獨立房，Stanley去到立即眼前一亮 ，那夥一度冷卻嘅心，為咗玩HiFi又再次燃起了 。與太太商量好之後，就決定有樣學樣去揾村屋喇。由於樓市暢旺，將軍澳層樓好快就賣出咗，亦因為家人住在荃灣，Stanley一心於該區揾樓，但一係就睇唔啱，睇得啱又比人反價 ，所以最後就放棄咗。退而求其次入咗去屯門揾，好彩俾佢揾到一個既價錢合理而又環境好嘅新村屋盤。就係咁，Stanley就由東面嘅將軍澳搬到西面嘅屯門喇。



獨立日

     經過兩個多月裝修期，Stanley嘅新居終於入得伙。下層係佢起居同瞓覺嘅地方，上層除咗有一間15乘17呎嘅HiFi房之外，仲有一個可以容納一大班人BBQ嘅空間和洗手間，設備可以話十分完善。Stanley係一個駕車人士，本以為揸車往九龍返工車程會長咗，實情係時間差唔多；而太太搭西鐵返工除咗比以前快五分鐘之外，仲次次有位坐添。依家Stanley爆機爆到夜晚三、四點都無試過俾人投訴，唯一係太太投訴佢成日好夜都唔返去陪咗瞓覺啫 ！  


獨立影音室的誕生




























器材列表

投影幕: 110" KIKUCHI KCFM-110PG fixed white screen


AV Amp: Marantz AV7005 AV receiver


BDP: Cambridge azur 650BD player


Power Amp: NAD 218THX (推中置)
Parasound HCA-2200(推前置)
Ross MTA-1200(推後置)


CDP: Marantz CD5003 CD player


int. Amp:  Audio Space AS3.8i Vacuum Tube int amp


投影機: JVC DLA-HD100


SPK for AV
FL+FR Jmlab Chorus 716S


Centre Jmlab 800V


SL+SR Usher S520


SBL+SBR Jmlab Chorus 715LE

Subwoofer Matin Logan Dynamo x 2



SPK for Stereo
Jmlab COBALT 816S




Power bar:  SINE 30A





隔山買病牛！

     Stanley喺睇過我哋後級測試會報告之後http://www.hiendy.com/forum/view ... &extra=page%3D1都忍唔住入咗部當日嘅亞軍，亦係被認為性價比極高嘅EMOTIVA XPA-5 後級玩吓。點不知部機返嚟玩咗無耐就着唔倒機，開機殼睇吓，以為係燒Fuse嘅小問題，點知換完Fuse又再燒過。由於部機响美國訂返嚟，所以Stanley就send咗個e-mail去美國代理度，希望能揾出壞機嘅原因，點知個「依貓」好似石沉大海咁，一直都得唔倒回覆。Stanley唯有自己抬部機去樂聞俾佢哋check，但又係好耐都無消息，最後只係同佢講部機隻牛燒咗，不過未得閒同佢整，咁Stanley又再次抬番部機走喇。及後有朋友介紹個位於屯門嘅師父幫佢維修，連工包料要二千多元，Stanley因為擔心維修嘅質素，所以最終都係放棄咗。幸好得到網友lulu sir嘅幫忙，美國嗰邊終於有回覆，將會寄番份零件俾Stanley自行更換，希望佢部後級可以早日康復，咁就唔洗再借朋友啲後級用啦！




技術分享

     講咗咁耐，都係時候開機玩吓。首先攞隻「北極快車」試一試，一連試咗第二段---火車埋站一幕，第五段---車票飛出窗外一幕，以及第九段---火車在冰湖脫險一幕。聽感上，覺得中低頻比較濛，而且有啲散唔倒嘅感覺，不斷聽到「胡胡聲」，而超低頻又不足，冰湖一段畫面加上管絃樂墊底本應十分刺激，但係在現場完全感受唔倒緊張嘅氣氛。此時；Pepsiman接過遙控口器並按入Marantz 7005菜單睇睇，發覺前、中置喇叭set為large及full band(全頻輸出)，並且將double bass開啓；Pepsiman立即將所有喇叭嘅分頻點劃一設定為80Hz，喇叭set為small，並將double bass關閉。再測試「北極快車」及「阿凡達」，聲音爽番晒，中置人聲更出，中低頻唔濛，超低頻力感返番嚟。Pepsiman解釋道：雖然坐地喇叭所出嘅低頻係俾書架喇叭為佳，但係始終與超低音有一段距離，前面三隻喇叭set為full band及double bass，前置與超低音一同負責低頻輸出，會使到中低頻及低頻過多，前置喇叭有一部份超低頻因低音單元吋數不足而潛唔倒咁低，所以超低頻就會有不足嘅情況；Pepsiman續說：中低頻過多，除咗會聽倒「胡胡聲」之外，中頻嘅人聲及大部份樂器聲都因為低頻過量而被掩蓋，所以剛才睇「北極快車」之時，就會覺得人聲濛，背景音樂暗啞。因此，調教聲效最重要係取得各方面嘅平衡，突出某一頻段或能滿足到某些玩家之口味，但其實此舉會令其他頻段暗淡無光，所以要好好取捨喇！Pepsiman最後都補飛講番句：其實調教AV Amp可謂各師各法，唔可以一本通書睇到老，最緊要多試多聽，找到自己喜愛嘅聲效。以上嘅調教方法，係呢幾年喺不同嘅師兄身上偷師，喺不同嘅組合實踐而得出嘅結論。




放毒時間

     我哋家訪之前，已經問過Stanley對現時組合有乜唔滿意，同埋有乜想試吓。佢覺得條Sound from heaven president X用嚟聽歌低音「行」過頭，想試吓其他喇叭線咁話。首先出場係百事佬提供嘅Inakustik LS-508喇叭線，筆者唔敢評論邊條線好啲，只不過條Inakustik插落去聽歌明顯人聲滑一啲、柔和啲，幾夾Stanley部胆機。再嚟鯊魚仔就從佢袋中攞出一對毒力非常嘅Audio Note純銀喇叭線去駁喇叭，一條AET SCR EVO插去胆機，雖不至於驚天地泣鬼神，但係聽人聲一啲都唔乾，有番肉地，大棚嘢聽落淡淡定定，高低去得更盡。雖然係好正，但係兩條線加埋嘅身價差不多等於Stanley全套兩聲道組合，佢聽歌只不過係希望放鬆吓日常工作嘅壓力，所以最後都留低都係對Inakutik LS-508了。




板間房之提升

     Stanley間HiFi房全間都係以石膏板建成，而投影機就安裝於天花板上，佢表示，每當開門關門，或睇一啲低頻量多嘅戲時，投影機都會出現輕微震動，當務之急係叫裝修師父幫投影機安裝一個鐵造嘅投影機支架，等睇戲嘅時候唔洗震過貓王；其次係將前側兩道牆與天花油黑，減少反光問題。而筆者覺得Stanley嘅影音房差不多係一個四方型，駐波問題都算幾嚴重，建議於角位加裝吸音柱以解決問題。此時，已經見到阿Chris準備好今次家訪嘅最後任務『投影機調教』。不出一會，阿Chris亦都順利完成。

我哋一大班人亦於影音房外Stanley的私人燒烤場渡過咗一個愉快的晚上。





後記.....

      Stanley表示，搬咗入新居之後，不論自己與太太都開心咗，連帶家中養嘅小貓亦因活動空間多咗而變得活潑。最唔捨得今次家訪應該係Pepsiman，他表示將來一定會好似Stanley咁起一間HiFi獨立屋，咁就可以日又爆夜又爆啦！
家訪交流室又到時間同大家講拜拜喇，兔年再見。


跟進!!!

    由於上次家訪嘅時間實在太緊迫，未能根治Stanley HiFi房駐波問題，所以前兩天筆者連同Pepsiman同kleehkg版主再造訪屋主。一上到去我哋馬上行動，將超低音原先以backfire嘅擺法改一改，而Stanley 就負責更改十仔嘅相位，我哋就聽吓邊個擺位與相位出嚟嘅低頻最實淨。最後經過一輪測試，發覺將十仔放於兩邊牆角位置，單元斜向皇帝位，相位調校到90度，低頻出嚟嘅力度和包圍感最好，我哋終於完成任務，收爐！  

kleehkg

十仔調校真係幾考人.....

cyberken

我唔係專程放毒架

bigpun1975

回復 2# kleehkg


    都搞咗好耐.....

hkbomberman

最毒又最貴既係間房......

STANLEY2468

請各大高手,如路經小弟橋底寒舍,請勿吝嗇入內賜教一招半式,感激不盡

sk555

my dream~~~~hifi room~~~~~~~~~~~~~~~~~~hope will have a chance to visit your treasure room^^

joeyu3003

呀最衰个晚要开夜无得黎玩喇，百事兄几时有空黎我到再教教我套架生

大ken

好左昨天去左一睹呢間HiFi獨立屋
一個字~正

Einstein

回復 6# STANLEY2468


    Stanley hing,......你有左影音室, 仲當唔當我係朋友ka...

Einstein

好左昨天去左一睹呢間HiFi獨立屋
一個字~正
daken 發表於 31/1/2011 09:30

    仲使講...

chhanthony

好正嘅獨立HIFI房

ERIC

請各大高手,如路經小弟橋底寒舍,請勿吝嗇入內賜教一招半式,感激不盡 ...
STANLEY2468 發表於 2011-1-31 02:35

    加多隻十仔。

maner394

果日我去到見到間房........！

STANLEY2468

my dream~~~~hifi room~~~~~~~~~~~~~~~~~~hope will have a chance to visit your treasure room^^
sk555 發表於 2011-1-31 02:50

唔怕遠又唔怕衰聲，千其唔好有期望，咪入黎BBQ吹下水

呀最衰个晚要开夜无得黎玩喇，百事兄几时有空黎我到再教教我套架生 ...
joeyu3003 發表於 2011-1-31 09:04

你快d找pepsiman搞搞套機，研究下投仔定係hdmi出事，唔好灑左隻豉淑活

回復  STANLEY2468
    Stanley hing,......你有左影音室, 仲當唔當我係朋友ka... ...
Einstein 發表於 2011-1-31 09:42

你都裝修好啦

加多隻十仔。
ERIC 發表於 2011-1-31 10:12

你估我係你咩，成屋拾仔唔洗買茶几啦

果日我去到見到間房........！
maner394 發表於 2011-1-31 10:26

好似垃圾房

居士

好左昨天去左一睹呢間HiFi獨立屋
一個字~正
daken 發表於 2011-1-31 09:30

我重正,去stanley度,可以見到幾大高手,Daken同timmy大師,重可以去埋Eric兄度,試左5隻 sub仔嘅威力,雖然未set好,但已經勁到我面都比佢打腫.

STANLEY2468

我唔係專程放毒架
cyberken 發表於 2011-1-31 01:23

你見唔見到第1張相，你帶黎d線會好似鑽石咁發光

ERIC

我重正,去stanley度,可以見到幾大高手,Daken同timmy大師,重可以去埋Eric兄度,試左5隻 sub仔嘅威力,雖然未se ...
居士 發表於 2011-1-31 10:59

    唔好吹水喎。 我d十仔不知幾溫柔！

cyberken

你見唔見到第1張相，你帶黎d線會好似鑽石咁發光
STANLEY2468 發表於 2011-1-31 11:01

    果d線唔係我架.......

eosteven

加多隻十仔。
ERIC 發表於 2011-1-31 10:12

  
可以換一仔高質感d既sub仔
呢家佢兩sub仔低音量多, 但唔夠details, 有d濛
而且間房既材料又會散左d低音, 密度又會減低左