寫這篇報告之前, 我思考左好耐, 應該用咩方法去介紹今次依個主角.

對於黑膠老手, 這光學頭好像又不是新設計. 對於黑膠新手, 這又好似有D超筆直….不過, 諗諗下, 以四萬幾蚊的價錢, 可以買到完全PERFECT MATCH的唱頭與唱放. 又好似好抵玩喎. 好啦, 這篇報告一於推介比黑膠新手啦.

CLEARAUDIO 金手指, 代表了大動態, 超高分析力. 今次介紹的DS AUDIO, 正正就有著金手指的取向, 甚至我覺得DS既分析力比金手指更高.

DS AUDIO, 光學唱頭的理論我唔會扮勁咁喺依個報告裡介紹了. 詳情可以參考下面條LINK.

第一次聽DS AUDIO夾AMG Viella V12

咁依個報告會講咩? 就係我對依粒光學唱頭的睇法與聽感.

大約兩三年前, 我初次見到依對唱頭, 由於我當時都未玩黑膠, 所以對這唱頭的第一睇法係: 這光學唱頭咪即係數碼唱頭呢? 不過都係果句, 因為我未玩黑膠, 所以無再深入去了解這唱頭的威力.

一直去到今年, 聲望代理了這DS AUDIO後, 有日聲望店長TONY打比我, 話粒DS002好勁, 叫我一定要上去聽下, 就係依一次既聽感, 我就出左上面條LINK既POST.

喺個POST裡面, 我初步都講左依粒唱頭的拾訊力超強, 分析力之強喺頂級唱頭的級數. 由於當時使用了DS AUDIO最頂級的MASTER 1 PHONO, 所以對DS002的能力未能深入評價.

及後, 聲望見我對DS AUDIO這品牌勁有興趣, 所以就安排左SET DS002唱頭+唱放, 送到我家給我評測.

     

如果大家記得我個NOTTINGHAM ANNA LOG黑膠盤係偏向穩定與質感特強. 所以粒DS002未裝上唱臂時, 我自己都估計到這個組合一定夾到啪啪聲.

分享D靚相片比大家睇睇先.

粒唱頭就無咩特別好講, 因為DS002只係佢地既三佬, 外殼及針桿使用了特制鋁合金製成, 唱針就使用了鑽石針尖, 而針尖設計用左經典的柴田唱針. 我諗最特別既就係佢咪LED係使用一般的唱臂線, 由DS AUDIO專用唱放供電給唱頭.

唱放方面就勁囉, 我不嬲借器材回家都唔鐘意開佢地個頂蓋, 所以借用官網相片, 大家睇下佢入面果十粒電容, 加埋個1.5mm厚既金屬殼蓋住成個變壓器, 細細機身, 但用料絕不馬虎.
機背後有一組RCA輸入與兩組RCA輸出. 其實都無咩特別了.

我將這DS002 PHONO放在SYMPOSIUM SEGUE板上, 再用三粒COUPLES 墊起PHONO.

 

由於新唱頭新唱放, 我煲左大約一星期就開始進入狀態.
頭兩日, 聽感比較單薄, 無論我點攪VTA與唱重, 都係得個高清, 欠肉地, 欠微動態.
第三日, 肉地開始厚潤, 但線修仍然比較硬朗.
第八日, 記得當日我第一隻聽既黑膠係MUSICA NUDA隻IMAGINE. 果浸BASS開始有層次咁慢慢浸過皇帝位. 全頻都鬆容了. 之後果段時間, 我開始感受到DS AUDIO的精髓, DS AUDIO DS002就是帶有連貫性的分析力. 唔知點解, 聽感上這根本是最頂級的MC唱頭. 可以話係要咩有咩, 全頻平衡度高, 質感不是特別強, 但配以我用緊個ANNA LOG盤, 可以話係天作之合. 如果我喺唔知價錢的情況下估價, 我會估這粒DS002唱頭與唱放組合大約十萬左右級數.
另外, DS002這唱頭唱放, RCA輸出GAIN與一般CD PLAY差不多, 絕對易於配搭你心愛的前後級/合併機.

後記: 在我玩黑膠兩年的經驗, 初玩黑膠最令人頭痛的就是唱頭與唱放的匹配, 其次就是唱放輸出GAIN與前級的匹配性. 我諗番我玩過既PHONO超過十部, 能夠夾到我部ARC REF.5SE的唱放, 大家才有機會在HIENDY睇到. 其他夾唔到果D我通通都還番比代理.

今次這DS002唱頭與唱放組合, 可謂能令初玩黑膠的用家減省了很多不必的配搭問題. 而且以其$44,000的賣價, 簡直係靚聲,易玩又抵玩既組合. 大家只需搵個合眼緣的唱盤, 加埋支唱臂, 就可以100%發揮DS AUDIO DS002的實力.
今次真係多得聲望TONY唔少, 這DS002我十分鐘意, 連我老闆對這粒識發光的唱頭都贊口不絕, 睇黎我都係要比錢了事.

代理: 聲望音響
價錢: $44,000

http://www.hiendy.com/hififorum/ … read&tid=107617

  • 目錄