安橋TX-RZ 3100 試玩篇

試玩安橋TX-RZ 3100

自從我部環繞聲擴音機壞咗之後。有成年都冇再玩過AV,無響屋企睇過碟。手頭上仲有三四十隻藍光碟全新未開過。一心諗住等待最新嘅環繞聲擴音機出先至再買,而期間唯有一直苦等。喺呢段好失落空虛時侯好彩得hiendy版主百事兄相助,從安橋代理借來一部合併旗艦機Onkyo TX-RZ 3100一解我睇碟玩AV之苦,亦都使我了解到最新一代安橋產品嘅威力。首先申報下我自己嘅經驗,之前我玩過幾代馬仔6系、天龍6系、同劍橋7系。而安橋係我第一次嘅接觸,並且有幸一試就係玩佢老頂合併機TX-RZ 3100,而且足足玩足三個禮拜真係開心。

首先介紹下我屋企嘅器材。我係用緊一部60吋led Full hd嘅電視,前三聲道係用MK950,環繞聲係用MK M4t surround喇叭。天空喇叭係用JBL Control X,十仔係老登雙D12+,藍光機用Oppo 205,2 ch speaker 係Eventus Phobos 影院面積約170呎。而所有線材主要以AudioQuest同埋Arcolink為主。

由於呢部TX-RZ3100已經賣咗有一年多,所以詳細嘅資料我唔會再喺呢度講,係咁以交代一下主要嘅功能。Onkyo TX-RZ3100 為7.2.4 輸出,也繼續是市面上較少有一機可以出齊 11 聲道的選擇,用 Class D 驅動,配備了 Onkyo 自家的高電流數碼放大電路,每聲道輸出功率大幅提升至 340W。並且取獲 THX Select 2 Plus 認證。獨立用上一枚 32bit/384kHz AK4490 作兩聲道 DAC 及一對 32bit/768kHz AK4458 多聲道 DAC,分別負責左/右聲道及環繞聲道的數碼/模擬轉換。TX-RZ3100還對應傳輸 4K/60Hz/HDR/HDCP 2.2 影像訊號、網絡串流或 USB 直讀最高 11.2MHz DSD 及 24bit/192kHz PCM 數碼音樂訊號,以及支援 TIDAL 無損串流音樂平台及 AirPlay/Google Cast 網絡投放功能。

原生就已經支援Dolby Atmos,DTS :X,而值得一提Dolby 系音效可轉換成 Dolby Surround 輸出,而 DTS 系音效則可使用 DTS Neural:X 功能。唯獨不能對應Auro 3D係有少少遺憾,亦可能較即將新上市的天龍及馬仔機輸蝕。眼見新機種三大制式有齊,真有不悅之感,但話說回頭能玩好當中其一制式已相當好,所以二話不說就開始去片。

而我主要今次係玩AV環繞聲及同兩聲道為目標。好就開始去片而試影片段我係用標殺令、悍戰太平洋、功夫熊貓等等一些舊片…..去試機。而在兩聲道係會用Pure direct直出推我對座地Eventus Phobos。題外話,安橋嘅服務真係抵讚,經電話聯絡之後第二日就準時送到我屋企,我隻傻貓都對呢部機好有興趣。係咁以影下前前後後,之後就上架嚟一張大合照先。

我家器材

我隻傻貓都對呢部機好有興趣

為咗隆重其事!首先我都會重新setting過所有器材包括十仔。一開始先做一次Auto setup,不消10分鐘已有初步結果,其後出動咗音壓計同鐳射尺希望量度得更精準,並作一次手動調教,而為求原汁原味我將所有EQ都關閉,好啦!開始setting所有喇叭嘅分頻點距離同埋 db。

出動咗鐳射尺

出動咗音壓計

重新setting十仔

初試聽感Onkyo TX-RZ 3100
環繞聲系統著重於包圍感,聲音也較為貼身聲爽快,整體音效包圍感,和方向感都相當令人滿意,而力度稍微偏柔。低頻反應出力量與深度共存,不會出現力大但肥腫的情況,而高頻悅耳不刺很耐聽。

在標殺令中的刀劍聲清脆俐落,流星鎚對打一幕包圍及空間感極高,低頻反應出感同身受打心口的感覺。

悍戰太平洋中的低頻反應相當快,在海中群揪一幕,海水及爆炸氣流的密度及分析力亦十分高,機械人被怪獸打的金屬聲好真實。

而在功夫熊貓中標鎗的方向及定位亦好準,雙眼緊閉下亦能清楚感受到標鎗的方向同力度。唯獨個人覺得主聲道和背景聲稍為拉得較遠,但因為音效定位方面十分準確,可彌補不足。

總括來講在新一代音效制式下,不單硬件提升,而在軟件發展的步伐真是一日千里。就以Onkyo TX-RZ3100為例,7.2.4 輸出340W,機身8 入 2 出的 HDMI 足夠大部分用家使用,支援 4K/60P 的 HDR 視訊。有Dolby Atmos,DTS :X,雖則不能對應Auro 3D,但已確實領悟到真正天空聲道那種震撼的包圍音效,真的感覺是可以置身電影其中,相信日後更多時間留在家中煲碟。

2 ch明天待

海水及爆炸氣流的密度及分析力亦十分高

機械人被怪獸打的金屬聲好真實

低頻反應出感同身受打心口的感覺

流星鎚對打一幕包圍及空間感極高

功夫熊貓

標鎗的方向及定位亦好準

Onkyo 安橋TX-RZ 3100 2 ch聽感包膠

係經歷一年多無聲無畫的黑暗日子之後,家中的影音器材亦逐步開始重新建立起來。由以前嘅合併機發展到宜家用前後級,揚聲器亦由書架喇叭升級到現在的小型座地喇叭。如有睇開我嘅貼文嘅朋友都估到我surround喇叭亦會進行升級,而這套MK組合亦好快就光榮引退。就係呢個等待升級時刻,得到百事版主鼎力相助,幫我同安橋借得一部Onkyo旗艦合併擴音機TX-RZ3100,以一解我一年無影音之苦!有呢個千戴難逢嘅機遇,豈能唔認真咁試下呢部頂級合併機嘅威力呢。能夠稱得上為當代安橋頂級合併機,我好相信喺影同音方面都有一定嘅水準。響試完環繞聲方面質素之後,已經感覺到呢部機好對板好正路,以眼見佢用喺兩聲道上面獨立用上一枚 32bit/384kHz AK4490 兩聲道 DAC,並且在網絡串流或 USB 直讀最高 11.2MHz DSD 及 24bit/192kHz PCM 數碼音樂訊號,以及支援 TIDAL 無損串流音樂平臺及 AirPlay/Google Cast 網絡投放功能,點可以輕視佢喺兩聲度嘅表現呢?

縱觀喺日糸環繞聲擴音機中/包括前級在兩聲道用上AK4490晶片的只有上一代馬仔嘅8802。同天龍7200等頂級機種,可見安橋呢部頂級擴音機能同天龍同馬仔看齊。但係大家有冇留意到呢三部機嘅價錢呢?只要心水清嘅大家自有判斷。既然佢喺兩聲度用上一粒咁高級嘅晶片作解碼,我一於留返多啲時間去認真試下佢喺兩聲道世界入面嘅表現。喺環繞聲試聽中我亦都講過之前我玩過幾代嘅馬仔7系天龍6糸同埋劍橋嘅7系擴音機,所以我對AV擴音機用嚟玩2ch聽歌都有相當嘅認知。當然講到依家作比較梗係要有另一套器材同佢作對比。喺兩聲道入面我會用Oppo 205用RCA連接安橋來推我的小座地speaker Eventus Phobos。作對比的器材作用Oppo 205 用同一款RCA去 Rogue Hera ll 前級再RCA去Bryston 4B sst2後級。你哋可能話邊有得比呀兩套器材級數相差太遠,但係如果冇比較點知道呢部安橋究竟能力有幾多?重播2 ch方面能有什麼質素呢?而我亦會用我經常聽嘅CD慢慢去瞭解清楚兩套組合嘅特質並作出對比,當然我主打係會講用安橋喇。

大家好驚奇點解唔見咗部安橋嘅

首先大家唔好驚奇點解唔見咗部安橋嘅。其實試音嘅過程實太開心,快樂不知時日過,眨下眼就三個禮拜喇,部機畀安橋收返去之後先發覺原來冇影用安橋去重播兩聲道嘅相,所以就用呢張相畀大家睇下我聽2 channel家居嘅佈局頂住當先請見諒。

我家聆聽環境兩個喇叭中軸相距6尺半,離皇帝位7呎半,前牆2呎,後牆有5呎,側牆6吋,樓高8呎4。試音碟有多隻不同種類CD,當中包括今次出聽感的CD如下:
羅文 (金曲精選)xrcd
鬼太鼓座 (富嶽百景)
玉置浩二Ultimate HQCD
Etta (Etta Carmeron and Nikolaj Hess with friends)
2006原音精選SACD
Jennifer Warned (The Hunter) 24 K gold SE CD

首先我會用我而家屋企嘅組合重播多次呢6隻CD由頭到尾重複多次。因為我呢套組合都係開聲未夠30個鐘,所以我要先瞭解依家屋企家居環境及組合所出嚟嘅聲底先。當然我用呢套組合去重播呢6隻CD,好快已經心中有數。喺以前擺位嘅經驗嚟將speaker前前後後感移動下再作toe in少少已經有不錯嘅結像,音場極深及闊,人聲位置喺電視機頂部,簡直好似真人企喺你面前唱咁一樣。但由於兩邊有啲反射聲音影響咗人聲嘅定位,所以在喺電視機前面加一塊Stillpoint aperture板以減少反射,口形及結像立刻再清澈咗好多。喺經過足足兩日10小時的煲練,而家屋企嘅組合初步已經完成好設置,但當仍然未係最好嘅狀態喇。希望有大師家訪賜教下!我為求一試安橋呢個頂級合併機嘅重播映2 channel嘅威力同質素。所以就即刻駁上安橋呢部合併機,並重聽上述嘅所有CD。

今次出聽感的CD

首先我會用2006原音精選嚟試下安橋呢部機嘅實力。好可能大家對呢隻碟都相當之認識,我個人亦都好鍾意呢一隻2006原音精選,因為入面嘅曲目有各式各樣唔同嘅元素,可以一碟走天涯。今次重點在Jheena Lodwick  I ”ll always love you,麥田之歌,白頭佬匈牙利狂想曲,加了蜜。

首先聽Jheena Lodwick  I’ll always love you呢首曲目入面安橋能充分表現到佢呢把咁磁性嘅聲音,咬字嘅口型大小適中,聲音偏向柔美嬌嗲,彷彿好似年青咗嘅一樣。高音有少許緊不夠開揚的感覺,但亦不至於刺耳,唔知會唔會係部機未run in所致。

在麥田之歌上,堂音同定位亦都非常清澈準繩,音場寬闊置身大教堂其中。口形整齊有序排列分明,能清楚辨別樂器定位,微弱的殘響亦能清楚一一反映。

至於白頭佬匈牙利狂想曲出嚟嘅低頻能不錯,雖然偏薄,但亦能有不俗嘅伸延同下潛力。

在加了蜜一曲我特別鍾意一班淘氣嘅小朋友那種天真爛漫嘅歌聲,能夠辨別到各個小朋友所在嘅位置,主唱歌手嗰個厚潤嘅唱腔與一班調皮嘅小朋友做成好大及鮮明嘅對比,並且能營造一份清新陽光的氣氛。

2006原音精選SACD

玉置浩二Ultimate HQCD碟內所有曲目人聲結象也很實在,樂器定位感強。中頻厚潤,分析力仍然很高,完全能反映佢一把飽歷滄桑的聲調。

Etta (Etta Carmeron and Nikolaj Hess with friends) 中能充份表現到其渾厚優雅的聲線,What a Wounderful World的唱腔充滿生命力,跳動力,給人滿足感且甜亮的音色。壓軸曲《You Are My Sunshine》前奏一段富有十足韻味的低吟,再搭配頂級火候的小號獨奏,要能有上乘的分析及重播能力才能如實反映Etta的情感,安橋亦能一一過關。

Jennifer Warned (The Hunter) 24 K gold SE CD Jennifer Warned的嗓子充滿了陽光氣色,情感豐富,但背後卻又隱藏著強大的能量感。唱功同錄音都非常好,發燒友都特別喜歡拿這張來測試低頻。在Somewhere, somebody同Way Down Deep中詬能表出充足深藏的能量感,低頻亦開始豐滿了不少,但不是肥腫的那種,相信同一連run機多天有關。

羅文 (金曲精選)xrcd我特別鍾意願望就是明天,號角,激光中,面譜,全為愛,等曲目。 羅文天生一把圓潤厚實,發音飽滿的嗓子,唱功全不造作,咬字清澈,是男帶女的特別音調不覺陰陽怪氣,反而成為佢獨特的桑調。安橋能將佢呢一把獨特的音調,表現出一番淳厚的深度和品味。在激光中那活潑跳脫的桑子加上强勁的節拍,像使我沉醉於舞池當中。

羅文 (金曲精選)xrcd

嚟到呢度都要做個總結!
喺我之前用過嘅AV擴音機當中畀我聽2ch嘅印像,我會覺得第一選擇順序排列我會揀劍橋,之後馬仔最後係天龍。劍橋俾我嘅印象係一部最有音樂活力同感染力嘅擴音機,你用佢嚟玩2 channel可以好好咁享受,我相信你會用佢嚟聽歌多個睇戲。而馬仔嘅印象亦都唔錯,佢都係一部好有音樂感嘅機種,佢喺音樂嘅表現方面係有個人獨特嘅地方,不至於好似金仔咁鮮艷濃烈,但係亦比較有濃烈且豐富的中頻及經修飾的低頻。天龍一直都畀人嘅感覺係AV比2 channel表現強勁好多。

而今次嘅主角安橋TX-RZ3100佢畀我嘅印象就係介乎劍橋同馬仔嘅中間。安橋亦都有豐富嘅音樂感,低頻同高頻喺經過煲練之後已經有相當唔錯嘅表現,雖然低頻同中頻嘅表現仲未有馬仔的淳厚感,但係就畀人一種中庸輕鬆嘅感覺。而佢嘅強項就係喺音場同空間感有上,加上乘的分析力及重播能力,佢播每一首樂章都可以將你輕鬆咁融入其中,而你係會不其然咁一碟接一碟咁播落去。係新一代嘅AV擴音機已經面世嘅時候,看似安橋已經俾其他新機喺軟件上有一年嘅差距,但係大家又要諗下所有嘅新硬件軟件我哋係咪有用得著呢,你畀咗出嚟嘅錢係咪有好多會嘥咗呢?而我相信喺新一代機種推出嘅時候,安橋呢部機會更加有性價比,不論喺AV surround方面或者2 channel嘅表現當中都能夠恰如其分咁表現佢安橋老頂合併機嘅身價。如果你唔係要追求全新update機種的話。呢部安橋旗艦合併擴音機TX-RZ3100仍然係大家X’mas購物清單當中的其中一個優先嘅選擇。

  • 目錄