識我嘅朋友都知我甚少講電源線, 原因有兩個, 其一，小弟用啲機種大部分都不能換電線，其二，習慣用歐頭嘅我在市場上 比較難遇上適合嘅線材, 莫講二手市場 ，全新廠線都要特別加錢訂造。不過呢樣純粹係個人喜好嘅問題啫。

話說最近老友T君極力推介Acoustic Revive Power Sensation 18000 TC, 跟住就膽粗粗叫朋友借返嚟玩下， 點知一試出事….

因前後級都不能換電線關係, 衹可以用Ensemble CD機作測試, 今次可講一線定輸贏， 先黎學友93個唱， 聽咗幾分鐘, 有冇搞錯? 成個人棟篤企咗喺面前唱歌咁嘅！  依我經驗從來沒有線材俾到呢種直接(或率直)嘅感覺, 莫講 好似坐喺演唱會第一排咁，直頭似坐喺內部認購嘅VIP位隨時上台握手嗰隻, 絕無誇大之意, 再聽同一隻碟最後首真情流露， 樂器件頭鏗鏘有力, 簡直觸手可及  唔信？ 再嚟隻Rodrigo G Live in Japan, 節奏感強， 所有樂器都充滿能量， 面紗移開左嘅感覺, 分析力之强絕對超出其身價表現, 不少標榜高分析力品牌嘅電線, 往往衹能有一種你有你彈琴我有我唱歌不能融合 嘅感覺, 但絕對沒有發生喺呢條Acoustic Revive身上， 淨係呢樣優點已經令本人對AR產品刮目相看。

寫到呢度係咪已經完畢？ 非也， 鑑於之前已有師兄詳細作出評價， 睇完之後都十分應意，亦無需再重複寫相同經歷, 免得浪費讀者門寶貴時間。

買就一定買，但買幾長同配什麼插頭呢？ 經網上搜習資料得知廠方標準長度係2M， 有別於借回來測試的6呎長度， 從網上圖片估計廠方(除旗艦型號外) 配上古河F11 cu 純銅頭尾插頭， 而朋友借嗰條用F11金插 (Gold), 究竟廠方係咪別有用心，定將價就貨?

於是立即揾Labkable Peter兄幫手訂做條新線， 基於呢條線嘅可塑性加上忠於 唔識就跟廠嘅心態，2M + F11cu 純銅插應該穩打穩紮， 而且價錢比金頭仲平一大截(巴仙)。

題外話要稱讚Peter兄， 在小弟正猶豫 選購什麼插頭時候，Peter 竟然可以描述每一個插頭嘅特性 絕無乾脆建議客人購買最貴就係最好， 呢點實在令客人非常窩心！

長話短說，下面綜合兩條唔同長度嘅線測試結果:

6尺+ F11金頭
聲音非常直接，有演唱會坐頭排嘅感覺， 分析力強橫，斬釘截鐵, 每粒音符都有著一點raw味, 但聲音彼埋身， 拳拳到肉 ，非常適合 強勁搖擺流行爵士錄音，有置身於現場嘅感覺。

2M (6.6尺) + F11銅頭
特性與上述雷同，但聲尾更細長， 沒有咁埋身, 音場深後, 線條及樂器比例分隔度更加鮮明, 一樣適合jazz及rock and pop 之餘又適合古典音樂錄音， 值得一提係低音能量竟再潛深少許。 究竟厚聲定薄聲？ 我會話不多不少，適中啱啱好。音色? 我覺得近乎無色無味, 如果想添加 音色呢條線就未必啱各下。

雖然，這樣說不夠完全科學， 始終插頭 並非百分百一樣，究竟係插頭嘅分野定線嘅長度給我以上聽感呢樣就無法再進一步考核。

大家睇完呢編報告都應該估到在我組合邊條高分啲，無錯， 2M夾cu銅頭俾到平順自然嘅感覺， 但又不失音響性，建議各位想聽真呢條線特性不妨試用2M長度然後配搭不同特性嘅頭去調教出自己適合口味。

再看看呢條線標價， 其超班嘅表現及兼容性(朋友回覆夾前後級效果非常正面) 我可以大膽講句$580尺不單止親民，廠今次簡直係賣大包, 就算收貴一倍亦唔算過份。