前兩日收到雅詠老闆電話, 話有對勁靚聲又超值的喇叭想推廣一下. 品牌叫: AMPHION

AMPHION這品牌我早於七,八年前已有所認識, 因為HIENDY有D網友都用緊AMPHION喇叭. 不過見佢咁有信心話我一定滿意, 就即管上去佢地個SHOWROOM聽下咩料.

雅詠SHOWROOM位於北角屈臣道4-6號海景大廈b座10樓1012室, SHOWROOM入面有晒佢地代理的產品. 包括MC, Soulnote 全線產品, 線材方面主要使用AFA品牌.

當日我上到雅詠SHOWROOM, 見到佢地既職員已經擺好一對全白色AMPHION Argon 7LS, 器材方面使用全套MC, 包括:

CDP : MC501A
PRE : MC601
POWER : MC811A

 

先簡單介紹一下這對AMPHION ARGON 7LS, 喇叭設計係二路五單元, 如果你只係睇佢既正面, 最多都係三單元啫.

(左手邊細果對先係7LS)

原來佢有兩隻6.5吋被動單元喺喇叭背後. 講真我真係比較少接觸座地喇叭使用二路五單元設計, 今次有機會聽下D新設計了.

高音單元使用1吋鈦振膜高音, 兩隻6.5吋鋁振膜中低音, 加埋後面兩隻被動低音單元, 就組合成這二路五單元的ARGON了.

仲有個比較特別的設計係佢對喇叭腳沒有使用釘腳, 即係話新喇叭都唔會跟埋釘腳比較. 但喇叭底板下, 又有四個洞可以比你自由選擇加釘腳與否. 以依家既喇叭設計, 好少可會唔預你加釘. 所以我立即睇番佢本說明書, 內裡的相片都沒有使用釘腳. 真係好特別的設計, 因為一般喇叭如果唔加釘腳的話, 中低音會好肥, 無晒線條, 加上雅詠音響SHOWROOM使用地氈, 就咁放對喇叭喺地氈面, 衰聲的可能性極高. 不過既然佢老闆咁有信心叫我上黎聽, 我就即管聽下有咩驚喜比到我啦.

由於我最近試聽好多都係用番原音精選2017, 所以我今天都係用番依張碟去試聲, 比較易於分別器材的特質.

第一首我就播第五CUT的LA CAMPANELLA, 支小提琴真係好鬼考機. 所以我先以這曲測試佢既中高頻速度感與厚度. 聽左大約半首歌, 我真係好奇怪, 喺無釘腳, 地氈面的不利環境中, 竟可以出到一份只有最頂級喇叭先出到的速度與分析力. 聽聽下, 我發覺佢既高中音係好似有HORN的特質. 質感極強, 瞬變速度可以快過好多幾十萬既喇叭. 我唔係吹水, 佢既中高頻真係堅正, 快, 爽, 有血有肉的高頻, 的確好吸引我. 至於中頻方面, 我唔知佢既設計師究竟點可以用兩路五單元設計出連貫性咁高的表現. 由於佢既二路設計, 中音與中低頻連貫性極高. 在大爆棚果段樂曲, 這五單元的ARGON 7LS能發揮出強勁的密度與包圍感.

你地睇睇下一定覺得唔對路, 咩料呀?! 鎗王你依家只係寫緊一對價值四萬蚊左右既喇叭, 咪吹水吹到對喇叭識飛先得架?!

我唔怪你地, 因為當我聽完這第8 CUT, 寶哥的紅顏白髮. 我真係投降了, 依對喇叭既表現點可以賣咁平?! 以佢既做功及表現, 我諗我會比個2017年最BEST BUY既小型座地喇叭獎項比AMPHION ARGON 7LS.

最後, 我聽埋成隻2017原音精選. 我彿發奇想, 既然依對ARGON 7LS有成91dB, 不如試下搵套SOULNOTE SA1.0合併機, 每邊只得10W@8ohm, 試推依對ARGON 7LS, 聽下以細火數可否有更幼細的表現.

聽左半首LA CAMPANELLA, 發覺依對ARGON 7LS都唔係易推, 部SOULNOTE SA1.0真係唔適合推7LS咁大對的座地, 我諗如果用SOULNOTE SA1.0推Helium 520可能會夾好多. 哈哈.

(Helium 520)

唔怪得雅詠老闆咁鬼醒目, 搵對MC 老頂後級MC811A推ARGON 7LS比我聽啦. 

好肋, 我講左咁多正面既評價, 咁有無D可彈的地方先? 以聲來說, 我短短測試了一張CD, 我暫時都未搵到佢有咩缺點, 當然如果你硬要話佢唔夠D幾十萬既喇叭咁穩定, 分析力咁高…等等等…我不否認.
但這對ARGON 7LS只係賣四萬幾. 以這價位可以話係超超超值. 真係無咩可以彈.

後記: 今次我沒有甚麼後記, 因為我打算後記依PART, 就等對7LS送到我家後, 我先給她一個詳細測試吧.

http://www.hiendy.com/hififorum/ … d=108395&extra=

  • 目錄