俱樂部開左兩星期, 好多網友都問我點解唔借套Soulution 7系推Genesis Maestro?

答案永遠只得一個, 由低玩起先會理解Soulution既特性。

上幾個月, 我已測試左SOULUTION 330的平靚正平合併機, 今次應該要測試5系了, 而當中更有一個重要原因, 係因為部525前級.

依部前級出左幾個月, 聽聞係將725好多頂級技術下放到5系。 而依部525折實都係廿萬左右, 所以我諗好多準買家都會對525既表現有所期望, 而我作成一個發燒友, 當然都想知道525與725有幾大距離。

喺我叫東哥借入這套5系時, 東哥曾經問過我會唔會玩520先, 因為520有內置Phono, 唔駛我再煩唱放的配搭。 不過我一心諗住[有新玩新]既概念, 最後才決定使用541 SACDP + 525 前級及最新既511後級作為俱樂部開壇既第一套兩聲道示範器材。

其實我都好怕寫前級, 因為有關既技術層面都無咩好寫, 好似525既頻應係0-2MHz, 總諧波失真係< 0.00009%. 只係睇數字, SOULUTION這部新款525前級根本無咩對手. 其他好似佢有兩組XLR輸入, 兩組RCA輸入, 一組XLR輸出, 一組RCA輸出.

 

 

要介紹既野就已經寫晒, 係咪真係無野寫?
當然仲有好多細節啦, 好似最新既525前級使用了CMS CENTER STAGE 1.0. 大家唔需要再為Soulution墊咩釘墊而煩惱, 因為佢已經跟左最頂級既釘腳比你。

另外最新一代525用左725既VOLUME技術, 共有95級進, 每級係1db.
仲有超過400,000μF的存儲空間,525成功解決了使用長長的訊號線而失真的問題.

 

講左咁多佢既賣點, 係時侯要實試525的功力了. 前文都講左今次測試以全套全新SOULUTION 5系作為測試. 不過喺測試途中, 收到東哥電話, 話要換對501 MONO比我, 所以今次的測試只能以541 + 525 + 501, 推動GENESIS MAESTRO.

喺HIENDY俱樂部大廳的面積係計埋走巷位, 粗略估計面積達400尺.  以一對GENESIS MAESTRO半主動式喇叭來說, 這可以說是輕而易舉, 而使用一套SOULUTION配搭MAESTRO亦係一個新嘗試.

其實早於六年前, 一套520 + 501已經到訪過我家, 當然依套SOULUTION推動MEGAPEN  3.7, 其瞬變速度與寧靜度令我到依家仲記得當日既聲效.

事隔六年, 501推MAESTRO又會有咩結果?

如果你問我, 擴音機中, 我最熟既品牌一定係SOULUTION, 最初喺KING SIR屋企及名望音響接觸既頂級7系, 六年前已借回家測試既5系, 之後在輝煌影音聽過無數次既全新7系, 以及上年推出既330合併, 我都玩過一段日子, 對SOULUTION的特性最清楚.

今次尤其係對501 MONO後級最為熟識, 其次就係部SACD PLAYER 541, 喺輝煌聽過玩過無數次. 我對依兩部機既強項已完全了解.
唯一未聽過既就係525前級.

使用541+525+501推動MAESTRO只係短短兩星期, 因為喺我仲微調緊MAESTRO背板的期間, 另一對喇叭已進駐俱樂部, 依對就係AUDIO PHYSIC既最新旗艦CARDEAS PLUS. 由於對CARDEAS PLUS係全被動單元設計, 所以我就以一般既喇叭擺位SET好左全頻平順, 就用套SOULUTION煲番一星期先再作測試.

喺煲喇叭期間, 發覺AUDIO PHYSIC CARDEAS PLUS超夾SOULUTION, 以我玩咁多SOULUTION既經驗, SOULUTION任何系列既擴音機都可以將AP既強項發揮得淋漓盡致. 原因除左聲底配搭外, 數據上SOULUTION既超高DAMPING FACTOR 絶對係推動AP既優勢, 我唔係話AP難推, 但要完全控制好AP兩邊既大口徑低音單元, 越大DF就越有利.

以今次俱樂部既配搭來說, 541+525+501推動CARDEAS PLUS, 表現全面優勝過六年前我屋企既屏風. 無論係分析力, 樂器既連貫性, 甚至屏風一直引以為傲音場高度,深闊比例, 可唯輸得極慘.

至於TOPIC講既[力迫7系]係咩意思? SOULUTION 330我剛剛還機比東哥, 所以我好記得佢既聲, SOULUTION 725我又去輝煌聽過好多次, 發覺今次依部525喺分析力與質感明顯比330高班太多了, 先唔好駛佢既推動力, 我只係以佢既前級部份去比較, 525喺質感, 分析力及動態都好明顯優勝. 不過用部前級與合併機來比較都多餘, 根本就係兩個不同LEVEL產品.

咁525係咪可以取代725?! 咁又未可以喎, 播人聲小品時, 你可能發覺525與725的音場大少, 分析力與質感差唔多, 但如果有機會比較一下大棚古典, 你就會明白725點解係旗艦級了. 725出黎既氣勢, 動態與瞬變都有其皇者表現. 725與525就是這些微的分別, 對於一般用家只係聽開人聲, 室樂等等. 唔駛諗咁多, 慳番十幾萬買525已經足夠你過引.  但對於大系統聽大動態古典音響, 追求背景寧靜, 爽快, 高瞬變, 大動態既玩家來說, SOULUTION 725始終係你唯一選擇.

代理: 駿韻音響

https://www.hiendy.com/hififorum … =2939493&page=1

  • 目錄