其實百事佬之前都曾經接觸過StormAudio嘅威力,之不過兩次都係喺新漢建業主場試聽,夾Ascendo喇叭行9.5.9.4,做晒in-wall同吸音,成間迷你戲院咁,唔好聲先奇!! 今次我大膽地要求新漢將佢帶嚟百事影院,睇睇佢喺一個接近家居嘅環境,只行7.1.4,又會唔會係想像中咁好聲先…

上星期,新漢同事將整套StormAudio送到HIENDY俱樂部,分別係ISP 3D.16 ELITE前級同埋PA 16 ELITE 16聲道後級,三個人夾手夾腳好快就將整套StormAudio前後,以及Sensa Sound THX喇叭同XTZ SUB 2X12超低音駁好,之後就到Jerry & Terry出場表演喇,一邊設定一邊教百事佬點樣操作同調校個Dirac…

由駁機至auto cal全程大約用咗一個多鐘頭,係時候試聽吓有無料到… 首先來一張DTS-X 2019試機碟試試各個聲道嘅平衡度同連貫性

呢段Volumes聲音非常細緻,聲音移動交代得非常清楚,無一般日系擴音機前大後小的情況,包圍感相當豐富

接住呢段Transient,雷聲遠近清晰,超低音管理得好乾淨,如雷聲動態再突出一D就Perfect

最後搵隻水行俠嚟考驗吓佢,潛水艇一段超低頻極易失控,StormAudio經Dirac嘅Cut Peak補Dips,線性嘅超低音不溫不火,但假如你係百事佬呢類爆機性失聰人士的話,可以copy個Dirac結果出嚟自行微調一下,推高個某幾段EQ肯定會更埋身、更震撼

當晚太夜關係,擇日重賽…

星期日收咗工,食完少少野就貢去俱樂部再會一會套StormAudio,正諗緊搵咩碟去測試呢套法國妹嘅時候,突然俾我發現Blu-ray架裡面有隻「紅雀特工」買咗好耐未睇,因為有會員話呢套絕非一般間諜片,鎗戰飛車絕無僅有,所以一直提唔起興趣,不過既然已經入手,無理由放棄佢… 點不知開首女主角一幕芭蕾舞表演,奏出嘅樂曲簡直令百事佬目瞪口呆,一時間將百事影院三百多呎空間,一下子演變成幾萬呎之表演場館,大大增加咗我對呢套戲嘅期望。雖然套戲如會員所講爆機位甚少,不過就更加令百事佬留意佢人聲對白嘅演繹、汽車駛過嘅移動感、餐廳內來自不同角落嘅微細聲音、街頭遠處嘅狗吠聲等等,全部都表現得鉅細無遺!!雖然文戲居多,但兩個多鐘頭完全唔覺冗長,可想而知呢套StormAudio演繹能力相當驚人

總括嚟講,呢套價值$215,000嘅StormAudio ISP 3D.16 ELITE前級同埋PA 16 ELITE 16聲道後級,絕對有料到,誠意推薦俾大家… 如果各位都想親身感受一下佢嘅超凡魅力,可以到以下連結,報名參加本星期六嘅演示活動…
https://www.hiendy.com/hififorum … &extra=page%3D1