「AV急症室」同「家訪交流室」告別咗大家好一段時間,百事佬好希望可以同會員距離拉近,所以決定再次走訪各地,深入大家嘅家庭影院探究一番。今次「AV急症室」嘅主角wooban師兄雖然相識唔深,只係之前喺俱樂部幾次活動中見過面,但佢俾我有一見如故嘅感覺,每次活動後總會傾過不停。話說早前馬蘭士入門研究所活動後,又同wooban師兄傾上調校問題,言談中透露屋企套器材表現一般,已經嘗試過微調,但總係發揮得未如理想,有無從入手嘅感覺。我見咁情況,就主動建議上門研究一下,睇睇有無改善空間。

一個天朗清氣嘅中午,我約埋另一位會員Greens師兄去到wooban師兄府上,同行嘅有超低音拍檔喼神「XTZ Room Analyzer 2 Pro」以作不時之需。wooban師兄家居同大部份玩家一樣,大廳被走廊分為兩邊,利用一邊客廳構建自我的家庭影院小天地。細看下wooban師兄嘅器材雖未算稱得上係頂級,但睇得出件件都經過精心匹配,而且擺放位置亦放咗唔少心機,平衡度相當之高,理應效果會唔錯。在未了解問題所在之前,大家先睇睇wooban師兄嘅5.1.4器材同家庭影院環境:

 

 

TV: Sony 65 A8F

 

LCR:MK sound 950

Surr:MK sound M4T

FH:MK sound M7

RH:MK sound M5

SW: MK KX12

前級:Marantz 7702 M2

後級:秦朝5400+7250

4K Player: Oppo 205, Apple TV 4K

電處:MS HD Power x2 (一冷凍一鍍金)

線材:
HDMI : AQ vodka, Carbon; Cosemi, Fibbr Crystal
電線:AET HCR&SIN (DIY), Arcolink 4030 X2

wooden師兄嘅5.1.4系統

百事佬先放張近期大熱嘅「銃夢:戰鬥天使」,播放第21段同埋第28段試試效果如何,呢兩段具有好多不同嘅環繞聲音效,大致已可測試出器材嘅問題。好,開波!

 

場館觀眾叫喊聲包圍感不足

主角繞圈軌跡模糊

機械爪從上移下聲音唔明顯

睇過兩段之後,發覺包圍感一般,細節位唔多夠出,而且天花聲音亦不足,正如wooban師兄所講整體氣氛未如理想。百事佬即刻入去菜單睇睇,發覺Speakers Config、Distances、Crossovers都問題不大,不過Test Tone一欄除咗超低音之外,其餘主聲道都係「負數」,而且數字亦唔少添(見圖)。wooban師兄向我講:「之前用Auto set-up出嚟數字仲誇張呀!全部起碼 -11,我已經將所有聲道加咗5個db喇!」

 

 

 

註:留意!由於後及天花喇叭分頻點設定於90Hz,所以必定要將「LPF for LFE」一欄設為90Hz,否則會有80Hz至90Hz一段斷層情況出現。

百事佬相信包圍感及細節位不足主要問題係出於音壓負得太多,所以會先從呢方面入手。為審慎起見作出調校之前,我先放入一張Dolby Atoms試機碟正式試聽。用試機碟校機嘅好處係有更皆嘅參考性,而且有唔同嘅測試片段,方便將聲道調校得更平衡。試過「Horizon」一段有咗初步聽感,我便將所有聲道(超低音除外)整體加上7db至「0db」或以上嚟增加聲壓輸出量,加大咗輸出量後整體已有可聞嘅改善,不過天空聲道仍然不顯著。我立即利用「Leaf」及「Helicopter Demo」兩段調整後置以及天空聲道嘅音壓,最終天空喇叭要加上「+3.5db」及「+7db」先能夠達至平衡,雖然wooban師兄已經將四隻天空喇叭角度調校至射向皇帝位,不過因為同前中置質素有一定差異,而且距離亦相對較遠,要營造出天空果浸聲音,一定要將音壓加大。反覆利用「Horizon」一段試聽,喺包圍感、連貫性以及細節位各方面都已經有改善,最可惜係後置安裝稍為高於耳仔水平,距離又太近皇帝位以至唔可以加大聲壓嚟增加弱音,若然可以將其向外拉闊及降至耳仔水平,相信效果會更好。

Dolby Atoms試機碟

「Horizon」一段先取初步聽感

 

利用「Leaf」及「Helicopter Demo」兩段調整後置以及天空聲道

整體加上7db至「0db」或以上嚟增加聲壓輸出量,加大咗輸出量後整體已有可聞嘅改善

最終天空喇叭要加上「+3.5db」及「+7db」先能夠達至平衡

平衡好主聲道,係時候睇睇隻超低音。超低音喺整個家庭影院系統之中,擔任咗舉足輕重嘅角色。wooban師兄所用嘅MK KX-12超低音,係一隻已有十多年歷史嘅單十二吋超低音喇叭,論量感喺wooban師兄嘅影院嚟講尚算可以,但論速度及層次感就已經唔能夠滿足到wooban師兄嘅要求。wooban師兄原本想換HIENDY俱樂部現用嘅XTZ SUB 2×12好耐,但可惜因為尺寸問題,要諗掂擺放位置先可以入手。既然係咁,百事佬二話不說已攞出超低音拍檔「喼神」插線set咪擺位,同Greens師兄夾手夾腳三扒兩撥已經安裝好。

 

 

經馬仔7702 auto cal後嘅超低音EQ,測出31Hz下沉唔少,而63 Hz就相對凸出。百事佬首要係先將條曲線盡量拉直,之後先按用家口味作出微調。首先我進入菜單熄咗Audyssey功能,進入Graphic EQ打算按喼神所測出嘅數據微調一下,可惜係原來馬仔7702 Graphic EQ調校係唔多,涉及超低音部分只有63Hz頻段,亦唔可以獨立調校某一聲道。

無辦法之下,百事佬只可以將所有聲道於63Hz頻段一致大幅度降低17.5db試試效果。正所謂此消彼長,再用喼神cal一次後發覺63Hz係下降了,不過31.5db又過份地凸起。Greens師兄立即提議話:「加番一半試試」。果然!將63Hz調校至-8.5db,測出嚟條線平順直番好多。

經馬仔7702 auto cal後嘅超低音EQ,測出31Hz下沉唔少,而63 Hz就相對凸出

將所有聲道於63Hz頻段一致大幅度降低17.5db試試效果。正所謂此消彼長,再用喼神cal一次後發覺63Hz係下降了,不過31.5db又過份地凸起

 

Greens師兄立即提議加一半音壓再試試

wooban師兄即刻攞隻JURASSIC WORLD出嚟試吓第8段,一群恐龍凶群而出超低音輕重已有改善,層次感稍增,不過略嫌punch有減弱跡象,最後我將63Hz調校至-4db達至雙邊平衡,不過呢個所謂平衡只係權宜之計,wooban師兄係時候升級啦!

主要問題大致解決咗,我再播番套「銃夢:戰鬥天使」睇吓效果如何。相比起之前,整體提升咗唔少,尤其係包圍感方面,氣氛增加不少。不過百事佬覺得中置人聲唔夠突出厚實,而金屬聲亦欠缺鏗鏘,唯有再向Dialog level及Graphic EQ 入手,將Dialog level加大0.5 db同時,再將人聲500Hz及1KHz和高頻8KHz及16KHz增強,反覆細聽之後作出以下調整(見圖)。

中置人聲唔夠突出厚實

金屬聲亦欠缺鏗鏘

將Dialog level加大0.5 db

將人聲500Hz及1KHz和高頻8KHz及16KHz增強,反覆細聽之後作出以下調整

望望個錶,已經接近下午三點,係wooban師兄千金放學返屋企嘅時間,亦表示家訪已經到達尾聲。臨走前wooban師兄提議再次將佢熟識嘅JURASSIC WORLD睇多一次,睇睇調校前後嘅分別,我當然歡迎之極啦!邊睇邊面露喜悅之色嘅wooban師兄,已經話咗俾百事佬知今次任務成功喇!當睇到一段火山爆發熔岩從高空墜落觀光車頂部時天空聲道發出「噗」「噗」聲時,wooban師兄更不禁講咗句:「原來呢段有D咁嘅聲喺頭頂揼落嚟架?」

 

 

*****************

 

後記:woodan師兄系統整體不錯,只係音壓上未取得平衡而達致影響表現。如想更上一層樓,首要係向超低音埋手,現今電影嘅混音比起十幾年前進步好多,太舊嘅超低音已經唔可以演繹到咁複雜嘅層次音效。另外;因為woodan師兄嘅超低音喇叭係放喺影音櫃裡面,好容易將震盪帶到藍光機內,試問在喺按摩椅唱歌又點會動聽呢?解決方法非常簡單,喺藍光機下面加套釘腳墊即時可迎刃而解。以上兩樣都係破費嘅建議,如果想有效果又唔使解囊,將後置從新安裝吧,實際又實惠呢!

 

https://www.hiendy.com/hififorum/forum.php?mod=viewthread&tid=131770

Categories: Feature, 家訪世界區
  • 目錄