如果你問我現今咁多配件當中, 最值得投資既位置應該係邊PART?
我可以好快答到你, 最接近出聲既位置就是最重要的投資. 
簡單D講當你要配置一套音響時, 大都是先買喇叭, 之後再諗擴音機與訊源. 無錯, 喇叭係最終發聲的位置, 所以有關配件的配置, 都應該先從喇叭方面著手.
最近, 有老友拎左兩盒名叫ISOACOUSTICS GAIA I & III既喇叭腳比我測試.
有得試新野, 我當然第一時間諗住安裝喺大廳對WILSON BENESCH PRECISION P2.0啦, 
點知老友話對P2.0太輕, 如果要安裝喺P2.0既話, 應該要安裝GAIA II.
佢話ISOACOUSTICS GAIA共分三個型號, 分別配置比不同重量的喇叭.
GAIA I – 220磅 (最大負載重量)
GAIA II – 120磅 (最大負載重量)
GAIA III – 70磅 (最大負載重量)
隻P2.0每隻重110磅, 真係只有GAIA II先啱佢喎. 
好彩俱樂部仲有對AUDIO PHYSIC CARDEAS PLUS 及DYNAUDIO 40th書架喇叭
隻CARDEAS PLUS每隻重160磅, 啱晒GAIA I的要求. 而DYNAUDIO 40th就只有18磅, 用GAIA III就啱啱好.
我地先講下ISOACOUSTICS依間公司先, 依間公司喺2012年已經成立, 開始時主力於電視演播室的設計和化震配件, 及後更取得IsoAcoustics專利技術. 現時加拿大眾多電台與電視台都係使用其服務與產品.
發展到依家, ISOACOUSTICS已經有多達六十幾個國家都有代理.
點解今次我會講佢地公司既資料? 因為我覺得依間公司既產品本來已經係用緊係專業既錄音室, 近依幾年, 佢地將依份專利發展到發燒音響. ISOACOUSTICS設計產品技術有晒數據支持, 用家都用得安心好多呢.
有關佢既技術, 大家可以去下面條LINK睇睇.
http://www.isoacoustics.com/isoa … olation-technology/
而今次測試, 我會用GAIA I安裝喺AUDIO PHYSIC CARDEAS PLUS.
為左幫佢換腳, 要搵多個人幫手. 好在果日啱啱有網友上黎探我, 順便當然叫佢幫手換腳啦.
大家可以睇番佢既外觀, 好明顯係使用金屬與膠質物料而製成, 而作為喇叭腳, 佢既外觀真係夠晒靚仔. 仲有SIZE上我都覺得好FIT, 大喇叭既腳墊, 當然要用番咁上下大SIZE啦. 否則睇落就會好怪呢.
GAIA I因為係比大座地喇叭使用, 所以佢盒內已附有不同SIZE既鏍絲, M12, M8及1/4-20”.
好似AP CARDEAS PLUS咁, 使用M8鏍絲
安裝就更加簡單, 只係將鏍絲先上喺GAIA I, 再將佢地扭上喇叭腳就可以了. 不過有個小秘技係: [ISOACOUSTICS]字母一定要向前].
測試器材
MSB THE SELECT TRANSPORT & DAC
NAGRA HD PRE
DAD THE LITTLE BIG MONO POWER
Speaker Cable: Dr. E ML-1
測試既組合我已經聽左個幾月, 對佢地既特性基本上都了解得七七八八. 所以當依套GAIA I換左上對CARDEAS PLUS後, 聽左兩隻碟, 就已經可以寫報告了.
吓?! 聽兩隻碟就寫? 咁求其? 其實我話比你聽, 聽左一首歌, 已經知道依隻GAIA I堅有料到 如果睇佢用料, 你以為佢只會提升中低音質素? 講真, 我開頭都係咁諗.
不過當你聽完一首歌後, 你會發覺依套GAIA I 根本就係喇叭既最後拼圖.
第一聽感係背景黑左好多, 毛噪感大幅降低. 第二就佢有能力令到全頻既質感提升, 不單單係中低音, 就連中高頻既密度都得以提升.
當聽到首歌既中段, 我發覺樂器與人聲的柔順度得到明顯改善. 即係話每粒音與音之間的連貫性提高了. 更易入耳.
理論上如果佢令到中高頻柔順了的話, 其高頻的伸延一定會受到影響, 但我再聽多幾首歌後, 發覺高頻的伸延並無減少, 反而更有力一飛衝天.
ISOACOUSTICS GAIA系列的確係你對喇叭的最後拼圖, 有網友問我如果GAIA系列, 與靚釘墊, 應如何選擇?
當我試完依套GAIA I後, 我可以好老實話比你聽, 夠BUDGET的話, 一定係ISOACOUSTICS既GAIA系列, 因為如果你對喇叭有番咁上下重量既話, 兩套GAIA I既價錢大約一萬蚊鬆D. 當然如果你對喇叭只係書架仔或重量在70磅以下的座地喇叭, 兩盒八粒既GAIA III都唔駛四千蚊.
說到底, ISOACOUSTICS GAIA系列係以重量來決定合適型號, 平有平玩, 貴有貴玩. 但一定要玩.
另外, 要提一提如果你對喇叭係放在地氈上, GAIA系列有個配件, 專門針對地氈面.
P.S. HIENDY俱樂部會有套GAIA示範, 如有興趣上黎聽下既話, 可以聯絡我啦.
港澳地區縂經銷 : Excel Concept
價錢: GAIA I $5400 (一盒四粒)
GAIA II $2650 (一盒四粒)
GAIA III $1950 (一盒四粒)
