記得第一次聽FOCAL UTOPIA, 就係我自己買入第一代既MEZZO, 使用一套頂級金仔推動, 當年已發覺FOCAL UTOPIA有著得特別的特性, 容易玩出靚聲, 但遇強越強.

自從做左HIENDY版主, 在不同代理都有聽過每代FOCAL UTOPIA的配搭, 對於佢既特性, 一直都自問十分熟識. 不過就係兩年前聽過一套GOLDMUND推動最新既SCALA UTOPIA EVO後, 我就更加愛上這牌子.

EVOLUTION 從字面直釋就係[進化], FOCAL喺兩年前將頂級UTOPIA系列進行一次大[進化], 最先面世既EVO就係SCALA EVO, 之後既GRAND UTOPIA EM EVO, STELLA UTOPIA EM EVO, MAESTRO UTOPIA EVO以及DIABLO UTOPIA EVO一一推出.

我昨為HIENDY最爛玩既版主, 一直都好想借對SCALA EVO返屋企測試  可惜我既蝸居無法容納, 結果一等再等, 等到HIENDY有了實體俱樂部後, 我的夢想才得以成真.

當我打比代理CINEMASTER要求測試最新既UTOPIA EVO系列時, 我其實係想借對STELLA UTOPIA EM EVO  原因係我好好奇佢既EM技術可以去到幾利害. EM = (電磁鐵)低音單元技術

不過對STELLA EM EVO剛剛賣晒, 未返貨  唯有試佢既細佬MAESTRO UTOPIA EVO ( 下稱MAESTRO)啦. 雖然無得玩EM技術, 不過新一代EVO都改良提升左好多部份, 有關技術上的資料, 大家都係睇番官網啦.

https://www.focal.com/en/home-au … /maestro-utopia-evo

至於佢既外觀, 基本上於上一代V2係無分別. 但只要一開聲, 你一定會感受到EVO的威力.

測試器材配搭

MSB THE SELECT TRANSPORT & DAC
NAGRA HD PRE
DAD THE LITTLE MONO POWER

喇叭線係我近期最愛既Dr. E ML-1

對MAESTRO到步後, 我只係求其擺個位, 因為依對喇叭係全新, 只作過DEMO之用, 所以我估計佢都要煲番一個月先可以開聲.

不過唔知係咪對猫仔後級力水夠足, 當我煲到大約兩星期, 有天我發覺佢既低頻實淨左好多, 層次變化更豐富. 這刻, 我就知道對MAESTRO已經開始進入狀態了.

我立即坐番喺SOFA既皇帝位, 拎番最近常試既古典及流行曲出黎, 放入MSB THE TRANSPORT, 慢慢欣賞.

一如我兩年前寫過對SCALA UTOPIA EVO的評價一樣, 如果你覺得上一代SCALA UTOPIA V2表現已值100分的話, 那麼只要你聽一聽EVO系列, 你就會明白我點解會比150分了.

全新的EVO系受惠於全對喇叭單元的改良, 新版本的高音單元使用IAL2, 單元前面加上保護罩, 不過我硬係覺得依個保護罩唔只保護單元咁簡單, 佢應該對高頻擴散有好大改善

而中低音單元就用左最新既TMD抑振懸邊技術與NIC磁力系統, 使用單元的反應比以往的型號更輕更快.

 

的確, 喺我使用DAD  THE LITTLE BIG, 輸出達600W@8ohm推動本文主角, 聽感上FOCAL這新一代單元的分析力與微動態進步最多, 有關低頻既層次感比上一代更細緻更幼細. 

睇番佢官網上既SPEC, 建議功放功率係80W – 600W. 工作室內的DAD THE LITTLE BIG正正就是600W@8OHM出輸, 估計這功率應可發揮MAESTRO的最強表現.  當然, 一對THE LITTLE BIG喺被喻為現今最靚聲前級既NAGRA HD PRE加持下, 簡直就是靚聲保証.

的確, 在工作室內, 以這套超過二百五十萬身價的組合推動MAESTRO. 喺兩星期的煲練中, 已經可以到達音響的頂峰音質音效. 當然, 你地可能會問, 佢既聲音即係點? 喺器材配搭上仲有無進步空間?   大家慢慢睇埋落去啦.

    

測試曲目, 我就只以兩張CD去測試, 第一隻係陸小鳯裡的鮮花滿月樓, 第二首係MUSICA NUDA 既I Will Survive.

其實每次有新喇叭到步, 我都係以這兩張CD去擺位, 今次對MAESTRO喺擺位方面, 的確有D難度, 話晒依對MAESTRO每隻重量超過116kg  好在工作室既喇叭擺位我大致上已經有所掌握, 最終只係輕輕推拉小小, 就已經擺好位了.

擺好位後, 第一個聽感係依對咁大對既MAESTRO既甩箱能力好高, 我唔明白佢究竟點可以做到面板與單元都咁闊, 但都係咁易甩箱. 就好似播放鮮花滿月樓, 一開始既古箏, 喺右手邊喇叭後一尺, 闊兩尺的位置結結實實咁出現, 張德蘭的歌聲就在喇叭中間後兩尺位置.
至於人聲方面, 我發覺女聲唔夠嬌美鬆容, 所以我立即走向喇叭後研究下佢既SETTING.

當初MAESTRO到步後, 見到喇叭後的接線位有兩組, 而這兩組接位與一般喇叭既HF與LF不一樣  在FOCAL UTOPIA EVO的兩組喇叭接位是分[MAIN INPUT] 與[BASS INPUT], 照字面睇, 我將一對DR. E ML-1喇叭線接駁到MAIN INPUT位置, 而經過兩星期既煲練, 聽感都係有少少緊, 所以我試下將對ML-1接駁到BASS INPUT.

剛ML-1接駁到BASS INPUT後, 發覺人聲的鬆容度與感情都有所改善.   之後我再研究下佢另外果三條JUMPER可以有咩玩.

原來後面果三組JUMPER位係比用家微調返適合既設定, 原裝都是將JUMPER全SET在NORMAL位置, 當然以這對MAESTRO的雙11吋低音, 大多都會將BASS的JUMPER調至[LOW]位置吧.

而我試過將BASS JUMPER SET [LOW], 在低頻的力感明顯減弱左大約1db左右. 由於工作室內的吸音擴散本來已是設定給大型座地喇叭, 所以如果將MAESTRO的BASS JUMPER SET [LOW], 明顯不適合工作室了. 所以我將BASS JUMPER 調返去NORMAL.
反而我將MID JUMPER SET去[SOFT], 在工作室內, 中頻的水份與鬆容度都得到提升. 

最後就到TWEETER LEVEL, 經過反復測試, 最終TWEETER LEVEL保留番喺NORMAL位置.

    

簡單D講, FOCAL MAESTRO UTOPIA EVO後面的EQ較正, 正負在1db左右, 實在方便用家配合自家家居環境而作出微調, 而大不影響FOCAL的原有表現. 打個比喻, 在日本的木板屋與地墊使用FOCAL UTOPIA系列, 可能要將BASS SET HIGH才可以有更豐滿實淨的低頻, 而在一般香港家居, 玩這MAESTRO可能為要將BASS SET LOW了.

後記:

大家睇到新一代UTOPIA EVO不經不覺已經係第四代了, 雖然在外觀上, FOCAL UTOPIA保持一貫超高質獨有設計, 但EVO這一代的改善重點在於分音器與單元.

MAESTRO作為UTOPIA EVO其中一員, 佢擁有93db零敏度的中大型座地喇叭, 配以極輕, 超快速反應既單元, 大家可以想像得到, 簡簡單單一部優質合併機已經可以令我滿意收貨. 當然如果使用更大火數推動MAESTRO, 其FOCAL獨家技術的強項才可以以驚天氣勢與柔和細緻把你迷倒.  以今次使用工作室的組合推動MAESTRO, 我感覺到DAD THE LITTLE BIG擁有400 DF已經足夠控制MAESTRO, 當然如果Dampening factor越高, MAESTRO的雙11吋低頻就能得到更有力更有氣勢更有層次.

而這對MAESTRO會留在工作室一段時間, 遲D我會使用其他後級去玩盡依對FOCAL MAESTRO UTOPIA EVO.

各位FOCAL UTOPIA既現用家, 大家都分享一下你地既組合與聽感啦.  

————————————– 完 ————————————

代理: CINEMASTER
定價: $422,500

https://www.hiendy.com/hififorum … read&tid=132238

  • 目錄