最近, 有多個發燒老友同一時間入手AUDIENCE電處, 個個都大讚特讚.  講真, 喺香港既發燒圈裡, AUDIENCE這品牌一向低調, 但身邊多個燒友都不約而同選擇這個美國品牌電處 , 而最奇怪既係依班身患[有錢就身痕]病毒既發燒友, 自從選用AUDIENCE電處後, 竟然無諗過換其他電處  這的確令我十分好奇, AUDIENCE這美國品牌, 有咩本事可以醫治到[有錢就身痕]依個病呢?
     

以我記憶, 依篇報告應該係HIENDY第一份AUDIENCE產品的官方報告, 所以都要介紹下AUDIENCE依間公司.

早於1997年, 由三位發燒友兼設計師: John McDonald, Richard Smith與Roger Sheker喺美國加利福尼亞州南部合作組成AUDIENCE這家公司, 而公司既首個目標係設計生產無分音器既全頻喇叭, 但係受制於當年的單元生產技術, 令到依個PROJECT未能成功.
一直到去2009年成日開發A3全頻單元, 並推出一系列ClairAudient喇叭, 最終都達成三位創辦人的理想. 但可惜的是,這時Richard Smith已經離世,而Roger Sheker亦於數年後過身。

喺佢地研究咁多年既過程中, 佢地亦掌握左生產高質發燒級電容及線材. 這些產品除左成為AUDIENCE品牌既生產線外, 更供應比其他音響發燒品牌使用.  同一時間, 佢地亦利用依D自家生產既高質電容及線材, 成功研發推出一系列Adept Response aR2, aR6及aR12等等電源處理器及Au24系列線材. 並得到發燒友的廣泛認同和TAS、Stereophile等雜誌的最高獎項,在美國自然大受歡迎,而香港代理商亦於2006年前開始引進AUDIENCE產品。

aR6-TSSOX [下稱aR6]是一款可接駁6部器材的電處,就算好似我咁, 玩黑膠, CD, CAS三類訊源都玩晒既玩家, 都可以將全套器材插晒入去, 而AUDIENCE電處最正就係佢每組既輸出都係獨立過濾, 即係話無論你將部CD & CAS,甚至AV器材,插埋入去, 都唔會干擾到ANALOG果邊. 

上個月, 我聯絡到AUDIENCE在香港的代理-[派美音響], 並借來一部AUDIENCE Adept Response aR6, 與及Au24 SX的次旗艦電源線.

首先開箱係aR6, 拎上手手感又唔係太重手喎, 睇番佢既官網, 依部aR6重量只有5kg, 但係拎上手既質感好實淨, 造功細緻.

致於SIZE方面, 只有10.5”W x 4.75”H x 8.25”D, 面板印有AUDIENCE品牌及型號, 還有一粒藍色LED.

而背板除了一個20A輸入插座, 還有六組輸出插座,

講起依個20A輸入插座, 我並不陌生, 我之前用既英國品牌都係使用依個Neutrik 20A插, 其好處就係可以鎖得好緊條電源線, 免生意外 對於聲音方面, 能確保用家使用aR6後, 與廠方的調聲要求一致.
而AUDIENCE廠方為左確保聲音合乎佢地廠方的規格, AUDIENCE會跟一條6尺10awg既powerChord SE-i電源線比你, 咁用家就唔駛自己配其他品牌既電源線, 而影響左整體效果.  當然用家還可以升級到次旗艦電線線Au24 SX及最頂級既frontRow啦.

   

代理同我講, 背面果六個輸出插座, 最近輸入插座果兩個插POWER AMP, 中間插前級, 最右邊就插訊源.

而喺背板既左上角, 就係aR6的電湧保護制.

機底使用廠方強列建議的膠腳, 聲稱使用番原裝膠腳, 才可以發揮AUDIENCE aR6 TSSOX的魅力.

至於電源線, 派美音響今次拎左條最好賣既Au24 SX比我插部aR6

一見到條線, 就比佢個NCF插頭吸引左, 需要條Au24 SX係HIGH CURRENT設計, 但拎上手既感覺線材好柔軟, 絕對方便香港家居使用.

線的另一端就係用番Neutrik 20A膠頭.

測試器材:

NOTTINGHAM ANNA LOG 唱盤唱臂,
SUMIKO STARLING唱頭
NAGRA VPS唱放
NAGRA HD PRE前級
NAGRA HD POWER後級
FOCAL MAESTRO UTOPIA EVO喇叭

部aR6既插法都係跟番代理所講, 我先將唱盤既摩打及PHONO插喺最右手邊果兩個插, 前級就插中間, 一對後級就插在最右.

可能你地會奇怪, 點解我要將對NAGRA HD POWER都插埋入aR6? 點解唔直接插牆?  
原因係aR6堅稱佢可以比後級使用, 所以今次我會測試埋插後級後的動態會否有壓縮問題. 

另一問題係唱盤摩打需要插埋入aR6嗎?    你地睇埋落去啦, 我一陣會講.

    

測試軟件: BEYOND LIVE 1991

大家唔好諗住我有張舊版LIVE 1991, 我手上依張只係寶麗金 X ABBEY ROAD喺今年最新出既REISSUE. 我都係啱啱買返黎聽, 發覺ABBEY ROAD真係有一手, 如果唔比較舊版, 依張黑膠REISSUE真係聽得過.

測試電處, 最方便就係首先使用一個齋拖板插牆, 再將全套器材插晒入拖板, 聽完兩首, 就熄晒D機, 再將全套器材插番晒入aR6.

講真, 以工作室現有的器材, 就算只係插拖板, 都已經可以毒死好多人. 不過玩音響的終極就係[沒有最靚聲, 只有更靚聲].

當我將全套器材插晒喺aR6開聲, 我聽到一種我從未在其他品牌電處聽過既[靜], 依份[靜]既感覺就好似一次過將全屋電燈熄晒, 音樂裡的活生感與空氣感都立即提升到另一層次, 仲有係佢既[黑], 並唔係死死實實既[黑], 我可以用[模擬與數碼]來比喻aR6給我的感覺.

一份擁有活生感既黑, 換來本來聽唔到既細節與虛浮既線條得以強化. 當然, 分隔度與密度都自然一齊提升.
聽多兩首歌, 我發覺低頻的實淨感與下潛力都得到大大提升.   

講真, 依家我將全套器材插晒入aR6後, 我真係好滿意佢既表現  不過為左測試清楚佢有無壓縮感, 最終都要將一對NAGRA HD POWER甩番出黎, 將佢地直插牆.

今次測試既軟件係依張最新推出既LIVE IN JAPAN黑膠.

當對MONO插aR6甩出直插牆身後, 我預期既大動態與力感, 竟然無增強

反而音場變得凌亂, 低頻既彈跳力與下潛力都弱左好多.   而最明顯減弱仲有分析力,  之後插aR6,  我好清楚聽到既細節變得更微弱…

聽左半首歌, 我就忍唔住起針, 熄機. 將對NAGRA HD POWER插番入aR6. 

真係好勁 , 依部AUDIENCE Adept Response aR6 TSSOX真係有料到, 唔怪得咁多燒友都推介比我啦.

喺試完後級後, 我就試埋將部唱盤既摩打供電甩出, 改為將佢直插牆身.

  未玩過既發燒友一定以為我痴痴地線  唱盤既摩打供電, 理論上係聲音無咩直接影響.

可惜事與願違, 當我將摩打電源直插牆身後, 高頻明顯暗淡無光, 低頻力感大減…  最過份係連貫性都有所減弱

又係聽左半首歌唔夠, 我已經忍唔住要起針, 將佢插番入aR6了.

後記:
依一刻, 我知我今次應該奶野了. AUDIENCE既毒力真係好強. 佢既強, 已超出了我對電源處理器的理解及期望.   可能你地會問我, AUDIENCE既性格係偏向咩國家既風格? 
喺我測試過咁多電處來說, AUDIENCE aR6 TSSOX擁有全面的提升, 佢有美國風格既開揚活潑, 良好的高低延伸, 動態強勁.
另一方面又擁有英國風格既柔和耐聽, 厚暖的中高頻.

講真我真係聽唔到佢有咩缺點, 我只係知道我唔想甩番部 AUDIENCE aR6 TSSOX出黎. 
唉, 今次決定唔還機啦, 比錢了事. 費事心掛掛.
你地放心, 我會將佢放喺俱樂部內, 比大家一齊感受AUDIENCE的強勁毒力. 

————————– 完 ——————————

代理: 派美音響
價錢: AUDIENCE aR6 TSSOX WITH STAND 10 AWG POWER CORD – $55,910

https://www.hiendy.com/hififorum … read&tid=132360

  • 目錄