今年音響展， 我喺樂燊間房見到一個好似Zet3既新型號， 但明顯依個唱盤比Zet3更有霸氣， 外觀的確極度吸引。 原來依個唱盤正是JR Transrotor今年的重點產品Zet5。
當我望住依個唱盤， 令我不期然諗番三年前， 我初初決定進入黑道的情境。
作為一個初踏入黑膠世界既發燒友， 選購唱盤的首要條件， 離不開品牌與外觀這兩大要素。 當然你班友仔一定會鬧鬼我， 聲音不重要嗎？ 哈哈。
初進入黑膠世界， 對眾多黑膠產品品牌都未熟悉， 首要條件當然就是選擇一個信譽良好的牌子作為首選啦， 其次就是外觀， 就好似我當年一樣，決定玩黑膠第一個盤就要玩JR Transrotor, 原因當然係佢既品牌可靠度高， 另一個原因就係鐘意佢個Look.
結果， 我就以Zet3作為我黑膠生涯的開始。
講番依個Zet5黑膠盤， 外觀上比Zet3的底坐厚了兩層， 令本來已夠型既設計更有霸氣。
今次拎到俱樂部既ZET 5係最基本設置, 咩叫最基本設置?! 大家首先要了解JR TRANSROTOR去到ZET這個系列, 係可以有好多OPTIONAL既配件以供用家升級之用. 當中最易留意到既當然係佢既摩打.
基本設置會跟一個摩打, 用家可以將摩打鎖在底座上.
另外, 在摩打上有兩個位比你使用33轉或45轉碟. 當用家升級使用兩個或以上的摩打時, 用家就需要升級埋佢既控速器, 而JR控速器共分三個型號, 最入門果款叫xxx, 中間就叫M1, M1係可以比一個摩打使用, 而大隻D果款就係M3, 可以同時供三個摩打使用. 基本上JR 頂級盤系列都係用M3控速。
唱盤軸心仲可以UPGRADE到TMD
, 而TMD 係JR 獨門秘方，磁驅bearing. 所以又係一個必要UPGRADE的OPTION.
最後就係JR最有型既底座. 靚仔到無野好講, 最吸引係唔只樣靚, 仲要靚聲好多…
以上所講既OPTIONAL都係供用家升級之用. 所以玩JR Transprotor既用家， 可以慢慢升級， 唔駛心急。
除左Zet5唱盤外， 代理樂燊仲send埋支用想試好耐既唱臂 Reed 1X, 以及我最愛既唱頭品牌MysonicLab Eminent EX. 唱放就用番樂燊代理既Simaudio 入門級 310LP.
全套黑膠組合， 加埋都唔駛十萬。
喺俱樂部大廳， 我使用這套黑膠組合配搭過不同的Amp & Speaker, 所以比較容易去了解佢既特性。 尤其係我作為Zet3既前用家， 都好想知道Zet5提升幾多。
最近我喺俱樂部大廳多以Viola Chorale 合併機配搭Verity Audio Otello。 黎聽過既會員大都一致讚賞， 而當這套組合夾上本文主角Zet5後， 聽感上我首先聽到既係粒Eminent EX好鬼清甜， 中高頻既人聲極毒， 感染力超強。 當然以價錢來說， 這Eminent EX只是Mysonicelab的入門級別， 對上仲有好多型號， 不過這粒ＥＭＩＮＥＮＴ ＥＸ以定價都係二萬幾蚊來說， 佢既清甜感染力已經足夠毒死好多人， 包括我依個爛玩餅主。
至於支ＲＥＥＤ臂， 如果唔講你知價錢， 齋睇佢既造功與結構， 大多數發燒友都估佢身價起碼超過五萬。
講真呢？ 今次測試依支臂既定價只係二萬三左右定價， 以佢既機械性結構與特選木材臂管， 唔怪得最近咁多發燒友都換晒ＲＥＥＤ臂啦。
仲有部ＰＨＯＮＯ， 依部３１０ＬＰ作為ＳＩＭＡＵＤＩＯ入門級唱放， 售價固然吸引， 不過最吸引係依部萬幾蚊既唱放， 可以出到咁高密度既音質， 配合ＥＭＩＮＥＮＴ ＥＸ既清甜與ＺＥＴ５盤既穩定實淨性格， 聽過既會員都流晒口水。
好肋， 最後講埋今次既主角ＪＲ ＴＲＡＮＳＲＯＴＯＲ ＺＥＴ５唱盤。 以德國盤來說， ＪＲ ＴＲＡＮＳＲＯＴＯＲ既特性偏向穩定， 實淨與硬朗， 所以香港代理樂燊今次ＳＥＮＤ過黎既配搭， 可唯用盡四大品牌既長處。 喺俱樂部既大廳， 使用這套黑膠組合聆聽小品室樂， 大棚管絃樂都可以輕易過關。 以這套不足十萬蚊既黑膠組合來說， 其表現已經遠超身價。 
不過我作為ＪＲ ＴＲＡＮＳＲＯＴＯＲ前用家， 我會建議你地ＵＰＧＲＡＤＥ埋個ＴＭＤ啦。 ＪＲ 既ＴＭＤ技術真係好堅架。 點解我會知？ 因為我聽過囉
我喺中環亞洲影音聽過ＪＲ既ＴＭＤ， 真係又穩定， 又有音樂感， 最正係佢既背境會靜好多。 你地有時間快Ｄ上去亞洲搵ＬＯＢＯ慢慢試啦。
代理： 樂燊貿易有限公司
定價：
1) My sonic lab Eminent EX
SRP HK$24000
2) Transrotor ZET 5
SRP HK $48000
3) Reed 1X
10.5″ SRP HK $23800
12″ SRP HK$26800
４) SIM AUDIO 310LP
SRP HK $17200
