[家訪交流室] 之一代線王Hintel的家 : Hiendy.com 影音俱樂部

[家訪交流室] 之一代線王Hintel的家

Hiendy 家訪交流室 ( 2010年9月號之二 )

編輯&圖片: Pepsiman
文字: 豬賓

大家好，賓士兄弟(百士佬&豬賓)又同大家見面…. 本應家訪交流室係每個月同各位見面一次，但係反應實在太熱烈，Pepsiman個電話比人打爆咁濟…. 為咗答謝大家嘅支持，依家每個月我哋會出勤兩次…. 到訪各位影音愛好者家中交流一下，如果未輪到嘅朋友，我哋會盡快安排，再次多謝各位捧場…
言歸正傳，眾所周知，屯門有位T姓影音大師開班受徒… 但其實……呢樹仲有位隱世猛人，人稱線王(網名 hintel)所在，今次家訪交流室好榮幸可以訪問呢位高人，好讓我哋揭開線王呢塊神秘嘅面紗….

一個線王的誕生!

其實在讀書時期嘅hintel，已經係一個非一般嘅學生，雖有點胖，但玉樹臨風… 外表不算俊朗，不過心思細密… 朋輩愛聽四大天王，他獨愛蔡琴；男同學愛溝女唱K，佢偏玩HiFi ….. 因年青時銀両不多，所以hintel就經常到深水埗一帶搜羅一啲平價而且C/P值高嘅線材，例如: Mogami、Canare、Gotham、 Northwire、Belden等等…..，買回家後就自己DIY… 久而久之，對線材嘅結構、聲底、以至特性都有深入嘅了解，從而產生濃厚嘅興趣，朋友間對於線材有什麼問題，都第一時間揾佢問一問，所以就被朋友冠以線王之美譽了….

要訪問hintel 呢位猛人，唔多唔少會有啲緊張… 可能係咁嘅原故，訪問當日，筆者竟然落錯車，搞到要步行二十分鐘才到目的地… 而另一邊廂，三個儍佬(Pepsiman、kleehkg、hintel)，就從荃灣抬隻重六十幾磅重嘅 JL110 到主角屋企作一個十仔PK 戰… !!!

公仔佬嘅JL十仔慘被倫為汽車喇叭

高佬KEN一手攬住隻JL孔武有力

為咗保住隻JL十仔，出動三個大漢一齊抬

一行本應四人，期間兩位屯門之友daken和stanley2468聞風而至，令是次家訪更加熱鬧…

既然稱上線王，線材方面一家唔會馬虎，等我同大家介紹一吓…

器材列表

TV ：Panasonic 42PY800 Plasma (PC:古河314AG II)

AMP：Pionner VSX-LX51 (PC:Oyaide 2.0, HDMI: supra HF100)

BDP : SONY S370 (PC:原裝Cable, hdmi: saec 810) (家訪後購入)

POWER AMP: Adcom 7400 (PC:原裝Cable ,RCA: oyaide pa02)

MEDIA PLAYER : M3 (PC:nanotech 301, hdmi: supra hf100)

SPK ：Monitor Audio BR5 + BRLCR + BRFX

BR5剪咗個箭豬頭好有型

BRLCR中置放o係地下以木腳墊高射向皇帝位，聲畫合一

BRFX後置擺放在皇帝位兩側，包圍感不俗

喇叭線選用敏力線行Double run bi-wire

SUBWOOFER ：SunFire HRS-12 (PC: AET HCR EVO, RCA: taralab rsc sub)

識得用pepsi-pizza，高手中嘅高手

STB ：MTV3000 (PC: 古河314AG, hdmi: supra hf100)

POWER BAR: Oyaide MTS-6 (PC: Northwire double run)

Game centre: Xbox360 (PC: nanotech 4003, hdmi : qed reference)

超低音之擺位

測試以M3作訊源，此機俾到筆者初步嘅感覺係操作反應十分之快，而且菜單及wallpaper亦很美觀… 首先播放末世天書和蜘蛛俠3，一貫 Monitor Audio 嘅爽快聲底，中置出人聲亦十分圓潤，音場亦很連貫。試末世天書Chapter 11攻打木屋一段，清楚聽到手動機槍聲在屋內轉了一圈…而蜘蛛俠3 主角與小綠魔追逐一段，襯底嘅管絃樂聲亦十分好聽… 使到成段戲嘅氣氛都有所提升，聽得出hintel很用心去調校。試完呢兩段，Pepsiman與kleehkg都覺得低頻有啲焗促同帶點朦… 拍檔立即提出改變超低音之擺位，由原先左後方牆角，改為右前置旁邊，再將原先前後擺放嘅前置，擺回在同一距離。

從新再試以上兩段戲，聽出嚟啲低頻係開揚兼生猛番… 但係就變得冇咁實淨；咁點做好呢？拍檔走近超低音將相位作每45度之調校，由0、45、90、180 度，每個相位聽一次，得出嚟嘅結果係45度相位低頻最實淨，力感最好…{:5_528:}
Pepsiman表示：一般玩家認為相位係從十仔嘅擺放位置而設置度數，不過實際環境往往會影響出嚟嘅效果。而我認為要調校好一隻十仔，最好就係搵個兄弟幫手，一邊聽一邊調校相位，直到低頻最實嘅時候，就係最佳嘅設定…
調校好位置及相位後，已經冇晒之前朦同焗嘅感覺勒!!!

超低音PK戰!!!

今次嘅主角係Sunfire HRS-12及JL 110。其實响今次PK戰開始之前，筆者嘅心情的確有點忐忑… 何解？筆者都係Sunfire Subwoofer嘅用家，一直對佢嘅表現都非常滿意；亦聽過某大師講：佢未曾聽過一隻表現好嘅JL Subwoofer… 冇錯…上次响公仔元老度聽呢隻JL110確實感動唔倒我！咁今次嘅比試，會唔會比身價低一半嘅Sunfire偷雞成功呢???
首先出場係Sunfire HRS-12，試機片段轉為28週後和 Iron man2，喜愛 Sunfire嘅朋友會欣賞佢營造氣氛嘅強項，低頻一浸浸，無打心口嘅感覺；唔鍾意佢就覺得佢又肥又慢。好勒，試完大家就記住HRS-12呢個感覺…..

再到JL110，放好位之後hintel就用JL Subwoofer嘅收音咪，插落隻JL110 度作一次自動音場校正…..

大家都屏息靜氣，等待着JL110發功。都係試番28週後，一開聲，已經感覺到同响公仔元老度聽好大分別，隻JL速度快，包圍感强，雖然唔係打心口feel，但亦令人感受到一份狠勁，成個音場都變得豐滿起來；此時眼見Hintel目瞪口呆… 時而雙眼反白… 經各人診斷之後，相信都係中咗JL 之毒… 當大家都沉醉於JL乾淨、收放快、迅變力高之低頻中，已經唔知道跳到邊一段戲，到筆者有番啲知覺嘅時候，已經係播緊龍虎門，火雲邪神大戰王小龍一段。當時王小龍嘅一句話，令我非常深刻，他道着：火雲邪神，你好慢呀！…. 彷彿隻JL110向隻HRS-12講一樣，亦可能係在坐各位嘅心聲。至於結果，我諗都唔需要我多講喇掛…..

方便與質素之取捨

席間，大家都認為新一代嘅Media Player無論畫質以及方便程度都比以往的更加進步；但係穩定性和音效質素始終是一大弊病…daken曾經試過有晚想睇戲，但係部Media player開極都開唔倒，真令人為之氣結…所以最後都係買番部入門Blu- ray Player以便不時之需。再者，雖然現在的Media Player大都能夠對應Dolby True HD及DTS MA等高清音效，但之前拍檔都作過一個詳細比較，發覺無論聲音嘅高低伸延，又或者音效細緻度，甚至包圍感，都同一部正正式式嘅BDP有一段距離。 hintel之前部Pioneer 51-FD已經離開佢差不多一年，而佢亦漸漸習慣咗部M3嘅音效質素，近排亦諗過upgrade套器材。經我哋分析之後，認為hintel如要提升聲畫質素，首先係需要買番部BDP，其實個頭(訊源)做得唔好，就算升級喇叭、Amp，或者Subwoofer都唔會有好嘅效果。經我哋忠告之後，hintel 終於在家訪後幾日，買咗部Sony BDP看門口。經hintel在A/B比較之後，發覺兩者嘅分別頗大，終於發揮到自己套機應有嘅威力，當唐開心番晒…