Hiendy 家訪交流室 ( 2011年5月號 之一 )
編輯 & 圖片: Pepsiman
文字: 豬賓(bigpun1975)
本着分享、交流同互動嘅 Hiendy家訪交流室又嚟嘞！根據一項非正式嘅統計，Hiendy網友裡面，有超過三成以上係因為一部遊戲機而愛上咗玩AV，而今次專訪嘅 10bucks360亦唔例外，不如我哋一齊睇吓佢點由一個「機民」演變成一個M&K fans吖！
ROGER!!!
其實10bucks只係搬咗出嚟住幾年，之前一直都係同家人同住，為咗一隻XBOX 360嘅GEARS OF WAR而令佢費枕忘餐，用部電視出聲發覺都係唔夠過癮，所以就買咗部DVD 5.1套裝機加强效果，如果話套DVD套裝得都係呃你嘅啫，有要求自然就要換嘢，不如換喇叭試一試先啦。如事者，10bucks 就買入咗對ROGER前置同ELAC中置，出嚟嘅效果真係有驚喜，亦令佢初次明白到喇叭响一套AV組合裡面的重要性！
買勻全世界
四年前，10bucks搬咗出嚟住，而佢嘅AV生涯亦都正式開始。一開首就買入YAMAHA 2700 AV Amp，前置換上CAMBRIDGE S30，中置就用番舊有ELAC，十仔就係EARTHQUAKE 10吋。玩玩吓又想升級，有成個廳玩無理由唔玩盡佢。成日响討論區聽啲人講M&K 喇叭有幾咁正，雖然未聽過係咩聲底，但個牌子咁出名，心諗都無衰掛！由於M&K已經關門大吉，10bucks唯有於網上向好心人徵求嘞，就連日本 同美國嘅討論區都揾埋，先可以集齊前面三隻S-150連腳架同後面四隻SS-150，AV AMP亦升級到YAMAHA Z-7，十仔變咗兩隻M&K MX-5000，最後加埋部PARASOUND後級，咁就齊晒章嘞。出嚟嘅效果十分之討好，而M&K喇叭亦可以講令10bucks一聽鍾情，着咗 魔一樣，所以埋下日後成了M&K fans嘅伏線。
家庭影院全面睇
我份人好主動…
傾傾吓計，10bucks無端端同我講成本效益，我真係唔知同玩AV有乜關係，仲以為佢想sell咩嘢添，點知原來佢講緊現時玩緊嘅主動喇叭。因為佢响網 上睇過好多師兄都話主動版本比被動版本更好聲，聲音失真亦都較小，唔洗加後級又慳番一筆，諗過點走線之後，就馬上行動。估唔到今次出擊比上次更順利，出 post徵求無幾耐，已經有賣家主動聯絡，當日嘅對話都幾搞笑……
10bucks：唔該阿X生吖
賣家：我係，有咩事？
10bucks：我想買你啲M&K MPS-1611P呀，你有幾多隻呀？
賣家：咁你要幾多隻先？
10bucks：最好有七隻啦…..
賣家：超….. 七隻咋嘛，又唔係七十隻，無問題啦，記住帶夠錢呀！
就係咁，10bucks就一口氣買咗七隻M&K主動喇叭嘞，之後又經pinkhung版主穿針引線之下，將YAMAHA Z-7換上CARY CINEMA 11a AV純前級。10bucks覺得CARY 11a加1611P力水同音樂感都好好，音場連貫性又一流，又唔怕好似以前咁後級啲「味」唔多唔少都會滲咗落去，真係好正！家訪當日，筆者見倒在場有三隻 更堅嘅M&K MPS-2510P擺埋一邊，可惜係110V 版本，要加牛牛先玩得，所以就無緣一聽佢嘅美妙聲音。三個月前，10bucks得到一位網友嘅幫忙，以超底價購入一部SONY HW-15投影機，靚聲靚畫，一觸即發！
器材列表
Pre-amp: Cary Cinema 11a & Subwoofer EQ: SVS AS-EQ1
BDP: OPPO BDP-83
Projector: Sony Bravia VPL-HW15
妙計穩定投影機
Screen: OS Pure Matt II 80″
Speaker: M&K MPS-2510P x3, MPS-1611P x4
前置
中置
後置
估唔到後置都要加木腳
主動式喇叭電源線
Subwoofer: M&K MX-5000 x2
Backup speaker: M&K MPS- 2510P x4
logitech remote
Soildsteel rack
扇與線
早輪一部除靜電風扇在Hiendy一度成為熱話，話吹吓啲碟會改善音質，又話吹吓喇叭轉盤都有改善，更聽過吹吓個頭會靚仔啲添，都唔知真唔真。見其 他版主未上到嚟，10bucks就提議攞我事先帶嚟嘅靜電風扇出嚟玩吓先。用變形俠醫對音波砲一段試試；先唔吹睇一次，吹完再A/B比較一吓。結果係，畫 面有些少改善，人面膚色滑咗啲（似係用咗SKII），但係整體唔太明顯；但聲方面就真係聾嘅都聽得出，無論高低頻延伸，包圍感都大幅提升，主角揮動塊鐵片 時好似成塊[界]埋身一樣，好彩筆者訓練有素，唔洗又要避嘢咁失威！一試完，立即比10bucks鬧：你個死仔，攞啲咁嘅嘢嚟毒我，又要我洗錢。在家訪 後，佢已經急不及待上網訂一部番嚟玩喇！筆者仲驚毒佢唔死，亦知到佢係少數同筆者一樣玩英式電源線嘅人AV友，所以就攞咗兩條電源線佢試吓，一條AET HIN EVO，另一條AET HHS EVD；AET HIN EVO最啱訊源，就插落部Oppo 83度，條AET HHS EVD就插落Cary 11a，取代原用嘅MAS同Nanotech 302電源線。結果筆者又比佢執多次，今次聲畫都有明顯提升，畫面黑位實淨咗好多，色彩更鮮艷，細緻位更有層次，聲音包圍感再進一步，低頻下潛力增加，低 頻量大嘅地方亦感受倒掃褲管！睇到唔捨得停，10bucks再開隻Madonna演唱會聽吓，發覺呢套以 M&K 1611P為主打嘅組合，音樂感相當之好，人聲亦好有肉地。佢表示，1611P 係全頻喇叭，會等到前面三隻喇叭升級到2510P之後，留番對1611P作聽歌之用。玩吓玩吓，越開就越大聲，此時突然門鐘響起，我兩頓時面色一沉！
<< 雄 >> 出沒注意！
我哋懷着驚恐嘅心情去開門，原來係Pepsiman、kleehkg同hkp1196版主到來，個心先至定番啲，後面仲有一位極少露面，深居簡出， 好多網友都以能夠家訪佢為榮嘅人，佢就係pinkhung版主嘞！10bucks見倒佢都喜出望外，真係唔知咩風吹倒佢嚟（唔通部靜電風扇咁有效）。 pinkhung雖然說話不多（多數都係出口成文），但係就有一種懾人的氣勢，二話不說，就坐在皇帝位上，然後叫10bucks開套片佢睇吓。唔洗十分 鐘，見倒雄版主眉頭深鎖，面有難色，眾人心知不妙，連忙問問有乜嘢唔妥，他只吐出一句：呢套組合，發揮唔到五成功力！大家正諗緊邊方面出錯嘅時候，只見佢 一個箭步行近部Cary 11a度摸佢一摸，然後續說：部機經脈錯亂、陰陽失調、氣虛血弱、頭重腳輕…..咁即係點？簡單啲嚟講即係….. HANG咗機！10 bucks此時才晃然大晤，雄版主接過遙控，首先reset部11a，不消幾分鐘已經reset好咗。由於各聲道音壓唔一致，所以需要再重新校一次；分頻 點统一set 80Hz，後置因距離太近皇帝位，雄版主由實際五呎距離加大至八呎，超低音放棄兩隻改為用一隻，超低音管理系统亦都暫時唔用，以手動方式去作微調。唔係講 笑，經雄版主校完一輪之後，成套系统好似脫胎換骨一樣，力度與包圍感大增，聲亦都埋身咗，低頻駐波亦得以改善，眾版主亦都好滿意。最後要補充一吓，聲效調 校，可為各師各法，取向上亦都要顧及個人口味，網友們宜多四出家訪，集思廣益，取長補短，咁就可以調校出你自己所喜愛嘅聲音㗎嘞！
後記
通常啲藝術家死後佢嘅作品先會得到人欣賞，M&K公司已經閉門多年，仍然有咁多追隨者，都可以講係AV界嘅一個神話。今次專訪嘅 10bucks360，由一個只抱住一試心態嘅玩家，經多年嘅鑽研，現已成為M&K喇叭嘅die hard fans了，筆者都有幸能上了寶貴的一課，認識到呢個傳奇品牌。
今期家訪交流室講到呢度，下期再見啦，拜拜！
https://www.hiendy.com/hififorum/forum.php?mod=viewthread&tid=12228&extra=page%3D3
