[電源線] 德國 T-Adler Kabelsysteme Alexander 電源線報告及Caesar簡介

[電源線] 德國 T-Adler Kabelsysteme Alexander 電源線報告及Caesar簡介 – by ice_man

T-Adler Kabelsysteme品牌簡介：

Alexander係T-Adler Kabelsysteme嘅出品，可能各位發覺對呢隻品牌冇咩印像，其實呢隻係一隻全新嘅品牌，暫時主力研發及生產高級電源線。另外得知T-Adler Kabelsysteme首批將會推出三款超班電源線，Alexander(亞歷山大)係三款超班電源線之中位居三佬，而Caesar(凱撒大帝)就係二哥，大哥名稱就仲未向外公報，所以暫時都未知佢嘅大名。而當中嘅Alexander早前在中港於未有作大型宣傳嘅情況下就於短短數月間已得到不錯嘅成績，銷情真係相當驚人。當我購買Alexander時遇見有幾位已入手Alexander嘅師兄，佢地異口同聲地都讚不絕口，當中有一位師兄更聲稱呢條電源線達到二萬元嘅級別，可想而知T-Adler Kabelsysteme電源線相當有實力。

T-Adler Kabelsysteme官方網頁：
http://www.t-adlerkabelsysteme.de/

Alexander之選料：
Alexander物料方面使用左T-Adler嘅Multi Metallography Correlation (MMC)技術，採用金銀銅三種貴金屬物料製作其導線，當中又以幼蕊多股及粗身單枝線以螺旋方式結合於一起組成當中各條導線，火線及中線約為8mm²，而地線就約為6mm²。屏蔽方面就採用銅箔及銅網作雙層屏蔽，所以屏蔽效果極佳，屏蔽率接近100%。避震方面採用左棉紙、特種軟膠外皮同埋避震網作多層避震。而接頭方面就用上古河最頂級嘅FI-50碳纖維鍍銠頭尾插，整體選料真係非常之有分量，絕對係有試意之製作。

測試及用後報告：
本人整套系統原本都係使用Wireworld嘅電源線，但因日後將會影音分家，所以入手Alexander來給將來嘅兩聲度系統使用，所以Alexander暫時就用於AV系統作為預先煲線之步驟。原本由牆插到SINE SAF-60A電源處理器使用了Wireworld Electra接駁，而BDP”OPPO BDP-105″同AV amp.”Onkyo TX-NR5010″就使用了Wireworld Silver Electra接駁。首先將BDP與AV amp嘅電源線Wireworld Silver Electra更換為T-Adler Kabelsysteme嘅Alexander，發現中高頻嘅伸延比Silver Electra為佳、泛音表現理想，整體表現有正面嘅提升，但就唔算係有極大嘅分別。跟住由牆插至電源處理器改為Wireworld Silver Electra，而AV amp至電源處理器就更換為Alexander，而BDP至拖板則維持使用Alexander，開聲即時發覺整體氣氛唔同左，音場變得更寬闊同更開揚，高中低頻嘅伸延變得更佳，分析力更強，解像度更高，泛音表現更為出色。相信由牆插到電源處理器/拖板使用Alexander表現會更為出眾，於是再購入一條Alexander來試試，由牆插到電源處理器改為Alexander之後果然有非同凡响，相比先前音場變得更為寬闊開揚，高頻伸延有更佳嘅表現，中頻再厚暖一啲，低頻量感亦十足，細節同堂音非常豐富，泛音也更為出色，解像度同密度更高，聲音開陽明快。雖然整體上表現相當不俗，但相信煲上一定嘅時間後會有更好表現。而兩次購買Alexander電源線時分別聽了多位擁有T-Adler Kabelsystem電源線嘅用家所建議，歸納所意見得出結論就係Alexander適合兩聲道、AV系統、石機或胆機使用，另外如將Alexander煲大約一百至二百小時後才會達到最佳嘅狀態。

選了以下多隻CD來測試Alexander電源線嘅效果：
測試中發現使用了Alexander後人聲會更甜美厚潤，弦樂奏出來的泛音更優美和更豐富。

選了蔡琴金聲演奏廳及功夫熊貓作簡單的畫質測試：

使用Silver Electra的畫面

轉用Alexander後畫面色調整體會比較暖一些

使用Silver Electra的畫面

轉用Alexander後畫面比較濃一點光一點，熊貓頭部亦白一點

總結：
Alexander係一條相當全面嘅電源線，不論高中低頻嘅伸延、堂音、泛音、密度、解析力、控制力同埋瞬間動態等等表現都相當出色。呢個價位而又有咁全面表現嘅電源線可以話絕對能夠越級挑戰兩萬元以上級別嘅名廠Hi-End電源線。而Alexander亦適合兩聲道前係級(胆機或石機)、CD機、AV擴音機、藍光碟機、電視、電源處理器同埋拖板等等影音器材使用，使用範圍可說是相當之廣泛。對本人黎講只係價錢方面會有點鬥爭，因為已超越自己用緊嘅Wireworld Silver Electra最盡嘅心理價位關口，不過如用Alexander與其它名廠Hi-End電源線黎比較其實又可以話唔算太貴，各位師兄可以考慮一吓。另外二佬Caesar跟據用家所講無論力水同分析力都比Alexander更強，但新線可能會燥一點同埋緊一點，低頻亦有機會肥些少，相信須要大約煲百多二百小時後才會達到最顛峰嘅狀，此刻就可以享受到Caesar帶給你最佳嘅效果。

古河FI-50碳纖鍍銠頭尾插簡介：
FI-50碳纖維頭尾系列為古河(FURUTECH)新世代電源接頭，外殼採用無磁不銹鋼材料製做，而外殼中段再加上6層不同度數之碳纖維組合，可有效地隔絕電磁波的干擾，插頭的組裝螺絲都是採用不銹鋼材料，所以FI-50插頭拿上手會有非常沉實嘅良好手感。導體部份的物料則採用級高純度紅銅製做，表面鍍上多層極厚的銠鉑金並再以鏡面拋光處理，而且導體全部經過古河原廠獨創的超導Alpha深層超低溫冷凍無磁性處理。絕緣體方面則採用納米陶瓷絕緣體(納米陶瓷+碳粉+尼龍+玻璃纖維而成的複合材料)，並應用了專利漂浮磁場導通技術(Earth Jumper Technology)以獲得極度透明且寬闊無比的音場表現，加上成品手功相當精美，看得出頂級的FI-50品質控制是相當之嚴緊，雖然價錢比較高但這種極度嚴苛嘅堅持相信能滿足到一眾Hi-End發燒人仕。