++++++++++++++++++++++++++++++++++++++++++

前個星期五Sony全新4K器材係中環Asia Theatre搞咗個發佈會，
當中有極為吸引百事佬既VPL VW-500ES 4K投影機展出，
但百事佬無緣出席，只好搵主持人攞D相嚟止吓癮…

睇完相忍唔住問Lawrence兄部機表現如何？
佢話：有時間就上嚟睇吓啦，靚到講你都唔信呀！
頂… 賣花讚花香，一貫sale屎口吻，都係信唔過…
點知佢好大口氣咁話…：唔怕死咪上嚟試吓囉…
我頂你吖！大我咁話咯喎…

尋日收工去開銅鑼灣果邊，突然又諗起Lawrence番話…
講到部Sony 4K咁堅，死就死啦…
一開波羅記播咗一段由Sony用4K攝錄機拍攝既風景片，
我同羅記講：呢D試片唔靚好死咗去啦！
拿拿聲放隻BD落去，如果可以有番七成，我就話你好野喇！

今次因為無準備之下鏟上去銅鑼灣亞洲，所以連相機都無帶到，
但當隻150″screen research投影幕投出呢個畫面，就算明知會俾會員鬧，
我都要用部i-phone影俾大家睇吓…

唔係嚇大家，真係原相直出無做過手腳，
連我一向最唔like Sony既過份濃色，同埋欠缺電影感既超高清表現，
（呢個純熟個人感受… )
今次都過關，嚴格嚟講唔係過關，係超班、贊歎…
尤其面部紋理、衣服質料、遠景大廈窗戶既細膩位，簡直表現驚人…
怪不得羅記咁口臭啦…
各位師兄有時間行開中環及銅鑼灣亞洲，記得走上去行一轉呀…
但係如果奶咗野千其唔好賴我喎…