近年聽黑膠的朋友越來越多，我本身都有聽黑膠既習慣，雖然現今主力播放音樂都係集中在CD軟件，但黑膠播出來的吸引力的確係比CD高，過中原因除左黑膠碟本身在錄製方面同CD有分別之外，其硬件配搭及調教方式亦比CD機既多，所以黑膠除左聽歌外，玩既元素亦都比CD多。
好多前輩話黑膠最緊要係唱頭及PHONO，亦有前輩講盤臂頭樣樣都重要，由於我黑膠資力十分淺 ，所以都重係摸索中；不過有一樣野我覺得十分重要，就係一個好既唱頭想發揮的好，除左唱臂外，要有一部夾到佢既PHONO亦不能忽視 。

最近無聊同東哥哥吹開水，佢講我知我最愛品牌之一既Luxman出左部新旗艦膽PHONO ，型號叫EQ500，部PHONO除左用左幾年時間去研發外，用料實在講究，全機用左1支JJ EZ-81膽同扼流圈做供電穩壓，每聲道亦用左2支JJ ECC83及1支JJ ECC82做放大，而電容方面亦用上德國Mundorf M-Cap MKP，不過最誇張係一部PHONO點解要用咁多隻大大細細既火牛 ? 可想而知供電既穩定度真係唔洗擔心，就咁聽來頭的確唔少野，其他有關用料及線路既詳細資料我唔多講，因為網上都有講(實情係我唔多識，費事講多錯多)。  既然講得咁利害，我當然食住個勢問東哥哥可唔可以借比我呢D窮L玩下，正所謂無得擁有都希望可以玩下佢 ，就係咁，部機就好快係我見前出現左啦。但因為小弟屋企有D改善工程進行中，所以今次就問左位大款借佢間毒L房出來試機，係呢度要明謝呢位大款-亨少 。

試機前，我點都要講下亨少間毒L房裡面D頂級器材；
Turntable – YAMAHA GT2000
Head – Phase Tech PP1000
Phono amp – Luxman EQ500
Speaker – B&W 800 Diamond
Pre + Power amp – Audia Flight No.1 and No.4

一開盒，部機真係好靚仔，而且斤兩十足，不過呢部PHONO有2樣野想補充一下；1)面板既2個電平錶，除左聽歌時會有靚靚既微微黃燈襯托之外，亦可以在調教左右聲度音壓時，方便知道有無左右唔Balance，唔洗我呢D小學雞係度估估下，好鬼方便 。 2)在調教方面，大部份要調教既setting都可以係面板的按鈕做哂，非常方便；而且佢既無段式阻抗調教及正反相呢兩個功能真係照顧到好多對黑膠有極高要求既發燒友 。

當準備好上架及接線後， 一開機………..，部機真係好靜，完全聽唔到有任何”HUM”聲，唔知重以為佢係部原子粒PHONO，可見屏蔽方面真係落左唔少心機；但聲音方面就比較單 薄同生硬，無左黑膠有既鬆容同彈跳力，咁我即時問東哥有咩方法解決，東哥既答覆係就係’煲’，因為部機係全新機，無用過。東哥對我呢D窮L真係唔話得，借 機比我不突止，重要比我開包，巧感動  。
就係咁今次要麻煩亨少幫幫忙，煲佢幾日後再試。如是者過左大約一星期，亨少打比我問我幾時得閒來試? 之後就咸咸濕濕咁對住我講，又估唔到幾正喎，連要求極高既亨少都咁講，我當然馬上去試探一下部PHONO啦。

胡琳Jazz them up 45轉 – 他的女人
呢隻碟亨少指定要試，無得say no，我卒之明白點解佢咁LIKE琳琳，佢把聲的確有D騷味，再配合埋LUXMAN呢部膽PHONO就梗加入埋骨，當琳琳一開聲唱’何時遠，何時近’;人 聲位置就啱啱好係坐位距離6-7呎咁上下，加埋支牛根係雙10吋既低音出來既質量下，出來的低音舒服又鬆容，加上其他幾樣樂器(Saxophone 同鼓)既定位好清晰，而節奏方面亦處理得恰到好處，搞到我都開始有少少鍾意左琳琳(亨少唔好打我)。

Eric Clapton Unplugged – Tears in Heaven
Eric Clapton 呢隻碟既現場感真係做得好好，2支結他加手打鼓，再加埋把滄味十足的人聲，就牽起到觀察的情緒，的確係好野。黑膠播放出來既現場感染力的確比CD還好，不 過如果PHONO在處理弱音細節位呢Part唔夠好時，會令現場既氣氛即時變得沉悶，由其係膽既PHONO，好多時為左要處理好HUM聲既問題，都會調教 到部機好靜，但就好多時連好細微既弱音都CUT埋，EQ500係呢方面明顯係強項，部機靜得來完全無減音樂感，呢點已經值回票價

審死官 -第一場「寫狀」
好多人都會用古典來做測試，但我有時都會用粵曲去做測試，我鍾意二胡、大小木魚、大鑼同鈸既樂器聲，如果播得好，象真度絕對唔會比古典差，但最慘係好多時 都播得唔太好，搞到又嘈又刺耳，非常難聽；但今次係亨少度完全無出現唔好聽既現象，樂器聲好真實，波叔同幗寶姐把聲聽得出好生動又生鬼，就算係講說話時既 語氣都好明顯聽得出有高有低，感情十足，呢方面除左EQ500做到好之外，房間既處理同器材既調教亦要一讚，亨少好野!!!

The Firebird – Infernal Dance of King Kashchey
最後點都要試下D大棚野 – 火鳥；一開聲，動態實在大得利害，唔知重以為用緊原子粒機既PHONO，之前播既音樂大多數都係比較輕鬆同簡單，所以無諗住佢連爆棚既古典都搞得掂，無論 係定位，抑或遠近既排位都聽得好清楚，唔需要坐係皇帝位度都聽得到。而對古典唔多認識既我，都比火鳥的編曲同氣勢吸引去聽哂成首曲目，另外好多樂器都好容 易聽得到，例如最普遍既小提琴、中提琴，今次就連長笛、單雙簧管、法國號、小號同定音鼓都可以清清楚楚聽得到，唔會話邊種樂器蓋過邊種樂器，聽完後成個人 都真係有少少high high地咁。

到呢個時間，亨少咀角含春咁望住我，呢下野真係背脊涼涼地，以為佢都聽到high high地想X我(大家熟佢都知佢重有一個好勁既花名…) ，好在佢開聲問我有無心動想換PHONO? 我梗係想啦，但作為窮L既我又點會有本事先得架，我都係努力工作，儲下錢先再諗啦；不過如果大家想搵一部好有HIFI感既PHONO，EQ500未必會啱 你，但如果你聽既歌曲好大路，咩都會聽，而且又鍾意聽LIVE既自然聲，咁EQ500你有時間真係要去試一試。

https://www.hiendy.com/hififorum/forum.php?mod=viewthread&tid=92365&extra=page%3D1