Cambridge Audio AZUR 752BD 使用後報告 – by ice

Cambridge Audio AZUR 752BD 使用後報告 – by ice_man

小弟由LD年代一直係Pioneer fans, 奈何近期冇咩有睇頭嘅旗艦機種，所以被迫轉會。近年好多師兄首選可能都係O記，而佢地正面同埋吹捧嘅報導真係多不勝數，所以其他牌子嘅藍光碟機就好似比較少人討論，情況都幾特別，係咩野原因導致咁嘅情況本人就不作任何猜測與評論了。其實入手Cambridge Audio AZUR 752BD之前小弟都係OPPO BDP-103嘅用家，而事實上OPPO藍光宇宙盤又真係唔錯嘅，不論係設計、外形、功能、用料以及價錢都非常之唔錯，所以小弟之前都入手O記就係咁解，但入手後發覺並唔完全係自己杯茶，唔係太啱自己嘅口味，於是開始諗諗換其它牌子嘅藍光碟機，而近期除左OPPO、Marantz同Cambridge Audio就好似冇咩野中高檔嘅BD機種可以選擇，而因為發覺Cambridge Audio上一代嘅751藍光碟機有唔錯嘅口碑，於是就親自去舖頭睇睇部751BD同752BD再作決定。

相信好多師兄都知道，Cambridge Audio AZUR 752BD係由OPPO BDP-103作基礎而改良出來嘅，但價錢就相差一倍有多，原因何在呢？小弟從各方面收集左一啲資料可以同大家分享吓。視頻方面其實兩款機大家都同樣使用Marvell Qdeo晶片，對應3D同埋能夠升頻到4K畫面，兩組HDMI輸出，另外仲有兩組HDMI輸入，同時為照顧Android手機用家更支援MHL功能，只需要透過HDMI接駁手機就能夠將手機上面嘅AV訊源傳送到電視同埋音響系統播放，但用料上752BD相對BDP-103就選用左更高級嘅零件，所以影像上有一定嘅分別。而聲音方面Cambridge Audio就更特別為Azur 752BD引進高階嘅音響嘅技術，透過新開發嘅Anagram TechnologiesQ5音訊升頻技術來提升音質，752BD內置左Wolfson WM8740 24bit/192kHz嘅24bit DAC晶片，而且係用左五粒咁多(每粒為二聲道，合共十聲道)，當中四粒Wolfson 8740 DAC係用黎進行7.1聲道嘅解碼，另外一粒就用作兩聲道嘅解碼，再用上Analog Devices ADSP-21261 32 bit SHARC DSP晶片以Anagram Technologies嘅Q5專利系統就提供左24bit/192 kHz嘅升頻解碼功能，從而令解碼出黎嘅模擬波形更加順滑，減低鋸齒波形嘅失真，出黎嘅音效就唔會再感到有數碼嘅聲音，感覺會更加自然更接近黑膠碟嘅味道，结像力同音場亦相對地大大提升。據說音質仲非常接近同廠嘅Azur 740C純CD機嘅水平，另外仲有三種數位濾波器(Digital Filter)俾你選擇(Linear Phase、Minimum Phase同埋Steep)，咁你話Cambridge係唔係對一眾發燒友好有誠意呢？

資料搜查左一排亦都唔算少，早前終於有機會去親身感受一吓752BD嘅效果，同場以OPPO嘅BDP-103同埋Cambridge Audio嘅AZUR 752BD作AB比較，先講畫質752BD嘅比較清晰銳利同埋係2D畫面時更有立體感，分別都幾明顯。至於聲音方面，分析力明顯比BDP-103高幾班，音埸更廣闊，音色更圓潤更清晰通透，雖然價位上都會令人幾鬥爭，但感受過752BD嘅效果最終都係接左752BD返屋企。

回家後駁好線就即時試機，畫面真係相比BDP-103更有立體感、層次感亦更豐富、而暗位亦更清晰。跟住就試音效，先播CD碟以audioquest Vodka HDMI作數碼輸出，由Onkyo TX-NR5010來解碼，分析力唔錯，音場都算廣闊，跟住再經RCA以內置嘅Wolfson 8740 DAC來解碼，再以Anagram Technologies嘅Q5進行24bit/192 kHz升頻，再經audioquest入門級嘅RCA信號線Sidewinder連接Onkyo TX-NR5010，一開聲就有耳目一新嘅感覺，可以話係兩個完全唔同嘅世界，音場變得超廣闊，人聲更甜更圓潤，音效果然非常獨特出眾！跟住再以播SACD碟以HDMI線作DSD數碼輸出，由Onkyo TX-NR5010來解碼，分析力比CD來得好，音場亦比播CD時廣闊得多，非常清晰細緻同埋銳利。再以RCA信號線連接Onkyo TX-NR5010，音場好似相比經HDMI時就冇咁廣闊，但效果就比較自然、感覺舒服一啲，比較耐聽。播放SACD以HDMI作數碼輸出再經由廣音機來解碼，或者以內置嘅Wolfson 8740 DAC來解碼，再以Anagram Technologies嘅Q5進行24bit/192kHz升頻，經RCA信號線連接廣音機，呢兩種方法可以話各有長短。

至於遙控器方面我個人黎講就覺得OPPO有質感同就手一啲。雖然752BD多左個遙控器插座，但對我黎講作用不大，所以並冇使用過。

遲啲有時間的話將會試埋雙HDMI輸出嘅效果…

總結：
優點:
● 畫質：清晰銳利，於2D畫面時感覺更有立體感。
● 音質：分析力高，音埸廣闊，音色圓潤通透。
● 24bit/192kHz升頻效果極佳。
● 支援Android手機的MHL功能

缺點：
● 價錢略高
● 外形略嚴普通一點，如高度能加高一點感覺會更高級。
● 遙控器手感一般。
● 韌體更新比較慢
● 欠缺手機App

Part 2：測試dual HDMI輸出效果

終於都有時間試埋dual HDMI輸出了，首先係部752BD嘅HDMI 1接口用一條Audioquest嘅Carbon HDMI線直駁電視作為視頻輸出，HDMI 2接口就用另條Audioquest嘅Vodka HDMI線駁Onkyo TX-NR5010 AV Amp作為音頻輸出 (TX-NR5010用左另一條AQ Carbon HDMI線駁電視) ，跟住係部752BD Setup Menu入面Video Setup嘅‘Dual HDMI Output option’ 設定為‘Split AV’。

所有設定已做好可以進行測試，先感受一吓聲畫嘅質素，再記錄‘Split AV’嘅畫面。然後再係部752BD‘ Setup Menu’入面Video Setup嘅‘Dual HDMI Output option’設定為‘Dual Display’再進行測試，再感受一吓聲畫嘅質素同埋記錄‘Split AV’嘅畫面。測試後發覺畫質只有輕微嘅差異，以‘Split AV’ dual HDMI輸出時畫面嘅對比度會高一啲同埋畫面會細緻一啲，但唔係十分明顯。至於音效方面同樣只有輕微嘅差異，以‘Split AV’ dual HDMI輸出時背景應覺上靜左啲，包圍感亦有一啲提升，同樣都唔係十分明顯。

係測試期間發現一樣特別嘅野，就係不論‘Dual HDMI Output option’度設定為‘Dual Display’或‘Split AV’兩個HDMI接頭同樣都有聲同畫嘅輸出，只係‘Dual Display’設定時‘ SACD output’無論設定為‘PCM’或者‘DSD’都只能以‘PCM’方式輸出，當設定為‘Split AV’時‘SACD output’就可以‘DSD’方式輸出，呢個情況已去信Cambridge Audio查詢有關問題了。

另外因‘Dual HDMI Output option’嘅‘Dual Display’設定時‘ SACD output’只可以‘PCM’方式輸出，所以順便再測試埋SACD純音效，SACD如用PCM方式輸出會比DSD相差好遠，音效感覺好冷，音場亦感覺較壓迫同狭窄，而DSD就與analogy方式RCA比較接近一啲，但以RCA輸出時聲音會更暖、音場會變得更廣闊，人聲就會更甜同埋更圓潤。

結論就係如果唔聽SACD或者聽SACD但又唔使以DSD方式輸出嘅話，就唔一定要Dual HDMI輸出，相反的話暫時黎講Dual HDMI輸出就係必要，日後如新Firmware有改變的話就另計。

(註：因之手上只有以上線材，所以不能全部以相同嘅線材作比試)

752BD的HDMI接線