話說我上個月收到christtl個PM, 佢竟然邀請我依個破壞王, 上去佢屋企聽下歌比下意見, 因為佢硬係覺得套組合有D問題.

問番原來Chris家住美孚, 好近我屋企, 所以就二話不說, 約左昨天上去聽下歌吹下水.

咁啱HIENDY家訪達人豬賓昨天都得閒, 所以就一行二人去美孚聽歌.

而我一入人地既屋企, 已經好似大爺咁坐定定喺皇帝位度等聽歌. 哈哈.
豬賓條友仔就靜靜咁坐喺我隔離.

喺主人家搵緊野飲比我地的時間, 我就睇下CHRIS用緊咩器材先.

LUMIN

+ MFA

+ ROGUE
+ PROAC

剩睇牌面, 無問題喎!

睇埋D線材, 基本上都係比較入門的線材, 都好丫, 起碼唔會偏聲.

喺我睇緊佢既線材其間, 比我見到佢條喇叭線好熟口面, 令我勾起初玩HIFI的回憶.

CHRIS用緊的喇叭線就是HIENDY WESTDOOR [西毒]的獨門絕技, 蟹粉DOUBLE RUN. 想當年我初玩HIFI, 又係經友仔介紹西毒比我認識, 當年我都第一條過千蚊線材就係幫襯西毒條蟹粉DOUBLE RUN了. 仲記得果時玩線唔捨得玩咁貴, 蕉插唔敢用古河, 只係使用SINE.
望住依對喇叭線, 百感交集, 咁就過左十年了.

講番屋主對佢套組合有咩唔滿意先, 佢話人聲唔夠聚焦, 超高唔夠, 中低頻過多. 咁我唯有用我有限的經驗去幫屋主攪攪佢.

由於屋企現時只玩CAS, 所以我就用TIDAL播歌聽左陣, 發覺成個音場散晒, 唔單止無聚焦, 係完全散晒.

我問准屋主同意, 嘗試將喇叭重新擺位.

可惜, 擺左十分鐘都未搵到個靚位, 音場依舊散亂. 以我的經驗, 只可能是線材接駁出現問題.

我立即睇睇部ROGUE的背部, 就發覺RIGHT CHANNEL的喇叭線駁錯左正負.

當攪番條喇叭線後, 音場正常番晒, 但中低頻過多的問題依然嚴重. 我唯有再睇睇佢的聆聽環境, 原來係接近13尺的正方廳, 右邊係落地大窗, 左邊係飯廳加廚房, 所以我只能將對喇叭再拉闊D, 及TOE-IN多少少. 再將對喇叭向後牆再拉埋少少, 令到個音場盡量唔會太埋身.

攪完一輪, 其實仲有好多建議比番屋主, 例如將部LED電視掛牆, 線材的UPGRADE亦是下一步要做的動作等等…..哈哈.

講起線材, 我剛從尚賢借左條ABSOLUE CREATIONS TIM SIGNATURE POWER CORD, 襯今次家訪, 試下將這條七萬幾既電線播入部兩萬幾蚊既ROGUE, 睇下有咩分別.

當條TIM S插左入ROGUE後, 音場的深度再次起左變化, 音場再深多兩三尺, 本來BOOM的中低頻有輕微改善, 低頻的線條出左少少出黎. 音場闊度再向兩邊擴散多兩尺.

當然, 我唔會叫屋主買這條天價電線, 其實我只係想試真D在不同組合, 這條TIM S的性格取向吧.

臨走前, 屋主問我, 佢如果再UPGRADE, 應該UPGRADE邊PART.

講真, 對於屋主現今的組合, 我自己就好滿意啦, 只係中低真係仲有少少BOOM. 搵日得閒D, 我再上去試下依靠喇叭擺位, 睇下仲有無改善空間. 臨尾我都落左少少毒, 因屋主用得PROAC, 主力當然係人聲, 如果要人聲的分析力, 濕潤度再提升, 可以留意下KONDO SPZ 喇叭線, ROGUE + PROAC + SPZ, 應該可以毒死佢了. 哈哈.

————————- 完 ———————————-