在佛羅多及星矢加持之下的Adam A77X |
-
Adam A77X再開箱
| 在佛羅多及星矢的加持之下的Adam A77X 在我剛踏進Adam的大家庭時，係用一對A7X Piano Black加一隻A77X 擔當我家庭影院的前3 channel speaker。A7X不論在 2 channel或者家庭影院方面都已經畀到我喜出望外嘅聽感。外型美觀，聽箱紮實、價錢公道、音質耐聽、中肯且不失華麗的氣色。喺我屋企服役個多月之後，開始心郁郁喺度諗如果前3 channel都係用A77X ，AV系統會有幾大躍進呢？因為在我器材中Adam主要用於AV方面。在同場較量之下A77X係好明顯地比A7X更有氣勢，所以毅然放售一對A7X，估唔到短短三日就有人接手，所以好快就向代理購訂購一對全新 A77X。眨下眼就個幾月，終於接收到一對全新嘅A77X。為咗稍後能夠同早前一隻A77X在AV糸統中融為一體，所以就首先將呢一對個別煲練兩星期，為咗彌補完先腳架嘅高度不足，唯有用星矢同 The Lord of the Rings box set 墊高一對以鏡像相同設計的Adam A77X。A77X的中音單元功放在“內部”靠邊的位置，而低音單元的功放位於高頻單元功放的對面即“外部”，在墊高後的高音單元位置正好於我耳水平上並跟A7X相同高度，以下就係小弟初步的聽感。 A77X在2 channel俾我印象是兩個音箱之間的聲場深沉而堅實，聲場的高度及寬闊也很準確。人聲的結像、聲音細節、連續性及清晰度都遠比A7X優越，相信因為A77X為二路半分頻音箱，兩個低音單元各自負責重放不同頻率範圍的聲音信號，其中一個負責38Hz到400Hz的低頻信號，另外一個負責大部分的中頻信號，防止不同頻率的相互干擾和有可能發生的相位抵消。不僅聲音無壓縮，並且能完美還原樂章中每個細節，A77X能獲得 2016 Dj Mag 科技獎的‘最佳錄音室監聽音箱’是實至名歸的。（但要注意Spk A左及Spk B右的擺位不能攪錯呢！） 為咗能夠對比與A7X的差別，所以試聽的樂章會與早前所有樂曲相同包括有： |
-
20180613_170345.jpg(57.53 KB, 下載次數: 0)
| 綜合來講A77X的功力絕對唔係一加一等於二，佢嘅二路半分頻音箱設計，巧妙地將中頻及低段分別完全獨立運作(包括功放線路)，使得A77X的中頻與低頻部分可以提供極為精確的中頻以及富有量感及深度的低頻信號。而且A77X低頻信號的精確以及速度也令我大為震驚。在The London Double Bass Sound SACD及富嶽百景 鬼太鼓座這兩張專輯中非常低的低頻上覆蓋著富有細節。低頻這個毫無疑問的強，鼓聲確切有打心口感覺。這個感覺反映的是音箱的瞬變，控制力及速度等。A77X的頻帶下限可以達到38Hz，在這麼低的頻段上A77X音質完全不混濁，有著快、狠、準、堅實的個性。A77X的笛聲有著微妙的高頻聲音，飄逸玲瓏，不僅準確、迅速、穩定並且還能在節奏很快的複雜配樂中，保持精確的聲像定位。
專輯多手仔James Newton Howard & Friends xrcd24中A77X的瞬變及反應在電子樂章中就顯得得天獨厚，得心應手。A77X清晰但不會誇張到很令人驚訝。有著輕淡類似數碼味的感覺，中頻頻段亦感覺不到被低頻掩蓋了，三頻平均恰如其分。就算係連環爆足幾個鐘，我隻耳亦唔覺得太吵或者疲倦。這意味A77X是聽起來毫不費力且沒有失真的獨特聲箱。 羅文金曲精選xrcd k2版，玉置浩二Ultimate HQCD碟、Jocelyn B. Smith Live in Berlin內所有曲目人聲結象也很實在圓潤，樂器定位及空間感強。中頻厚潤飽滿，但完全無被低頻掩蓋。人聲發音嗓子，動態及弱音分明，歌者咬字清澈且分析力極高，完全能反映三位飽歷滄桑歌者的聲調，情感豐富，讓人心矌神怡。Adam的X-ART高音及中低音單元真係絕佳組合。 綜合嚟講多一個低音單元嘅A77X在高中低頻三方面都畀A7X優勝。兩個7吋單元互相彌補不足，不單止加強低頻量感，並增加了整體音埸的密度。三頻的銜接緊緻，連貫性更是出乎意料的優越。 |
雖然A77X整體上係俾A7X優越，但係兩對喇叭喺價錢，音色取向及擺位方面都有住原全唔同嘅特性。A7X在中高頻段有著一致的優越性，在有限的單元及聲箱體積下，低頻亦都有快，狠，準的表現。外觀雖然係一對普通嘅書架喇叭，但係精緻的鋼琴烤漆手工，盡顯德國工匠的優越及心血，所以能夠好容易融入一般家居，因此亦深得我老虎大人稱許。但係A77X因為佢係雙低音單元鏡象對稱的設計，因此音箱較A7X或一般書架喇叭闊一倍，所以一般家居擺設會遇到較大嘅困難。加上只是一般原木皮嘅外觀，所以入屋程度較A7X遜色。在我再三考量自己用途之下，最終毅然放棄一對較容易入屋的A7X，換入一對全新A77X用在前置左右聲道中。如果你問我點解廠方會生產兩對完全唔同特性嘅speaker呢？我只可以講當然係商業嘅決定喇。同一個系列有唔同嘅型號可以增加市場競爭力同佔有率。而廠方生產A77X方向係原全主攻作專業錄音室用嘅監聽水平喇叭，而A7X係可以用於錄音室及家居兩用嘅監聽喇叭。所以大家可以先清楚了解自己使用嘅取向而作出正確的選擇。我深信呢對A77X在2 channel中的表現，在轉到多聲道系統當中，一定能夠便我的器材如虎添翼，更上一層樓。熱切期待訂製的喇叭腳快啲到港，到時再試下三頭馬車的威力。
|
