[CAS] QNAP HS-453DX 第一章：硬件設定篇 ~ by 史的墳 : Hiendy.com 影音俱樂部

[CAS] QNAP HS-453DX 第一章：硬件設定篇 ~ by 史的墳

2019 豬年，史的墳響度祝各位師兄師姐「豬籠入水」、「豬胎暗結」、「豬（隊）友遠去」

都講o左一排，依家終於有少少時間分享之前購買及設定 QNAP HS-453DX，一部被評價極高，聲音表現極其正斗的 Network Attached Storage（NAS）。網上其實有好多教人設定好聲的方法，看罷有 D 我有認同，有 D 我卻一笑置之。當然，我亦不敢班門弄斧，只希望透過之前試過十幾次設定，找出自己認為對聲音最好的設定，以兩、三章向各位有興趣的師兄師姐分享一下，希望各位就算唔識 setup，睇完之後都可以自己 DIY，起碼對自己有滿足感麻。

好，第一章是最基本的硬件設定篇。

以下圖片是我當日去深水埗 Comd** 購買的一整套硬件，包括：

– HS-453DX 4GB 版本 => 大概 HKD4,700 – HKD4,900（農曆新年腦場價）
– 兩條 Kingston 4GB DDR4 D4-2400 RAM => 大概 HKD300 一條，兩條大概 HKD600（Kingston 穩定有質素。另外，部 NAS 本身有跟兩條 2 x 2GB ADATA RAM，基本夠用。但如果諗住同時玩 Roon Core、播 4K、強烈建議升級轉用 2 x 4GB RAM）
– 兩條 SSD 支援 2280 介面 M.2 SATA 6Gb/s 250GB 或 500GB（我之後換o左 500GB） => 大概 HKD420 – HKD440（250GB）或 HKD550 – HKD650（500GB）一條（買 NVMe SSD M.2 冇用「例如 Samsung Evo 960、970」，因為部機行 SATA 6Gb/s SSD，用唔著 NVMe 的速度，反之對穩定性可能會有影響，所以建議用 Samsung 860 Evo）
– 兩隻 Western Digital（WD）MyBook 8TB 外置 5400 rpm硬碟 8TB => 大概 HKD1,450 一隻，兩隻大概 HKD2,900（買兩隻拆開佢拎佢隻 HDD 出黎用）
– CoolerMaster MasterGel Maker 極品散熱膏 => 大概 HKD90 一枝（超高的 CPU/GPU 導熱係數 11 W/m.k，無風扇散熱必備）

有好多師兄師姐問我，點解 HDD 唔用埋 SATA SSD，原因好簡單，依家雖然 SATA SSD 平o左好多，但一隻 SATA 4TB SSD 最平都要 5、6千蚊，況且我試過將我自己之前買個兩隻 1TB SSD 插入去試過，經 M.2 SSD 做 cache 再出，聽唔出有分別。仲有，我本身有成 7TB 以上歌曲，SATA SSD 都唔夠我用。

WD MyBook 8TB 是工業級氦氣 5400rpm 硬碟，好處是溫度相對比其他 HDD 低，5400 rpm 對 NAS 已足夠有餘。另一個買的原因是買裸 8TB HDD 比起咁每隻貴幾百，仲要唔係工業級，精明的你絕對識揀。有朋友又話氦氣碟 D 聲出黎會慢 D，但如果佢只係用黎儲存，每次都會抄去 SSD 做 caching 再出呢？

有關點拆隻 WD MyBook 8TB 出o黎，大家可參考 YouTube 或 Google 搵「MyBook 8TB 拆解」，兩張信用卡插入去低就可無損拆除，不失保養之餘又唔使費力。

好，講安裝硬件之前，先講下開箱。

QNAP 一向包裝精美，一開箱見到本體之外仲見到另一個配件盒，裡面有兩條 LAN cables、一隻 switching 火牛，一條接火牛的英式電源線、一個 remote、兩粒電，一包散熱貼包、同說明書。

隻火牛本身質素都唔錯，係台達的 12V 7.5A switching 牛，但我諗大家都唔會用佢啦掛

附上的散熱貼包，包括用黎貼 M.2 SSD 的 6 塊綠色長身散熱貼，及 CPU、10GB LAN chips 等散熱貼。可知道 Silent NAS 是無風扇設計，機身溫度都幾熱下，高負載下會有成 55 度，所以記住，做好散熱！綠色長身散熱貼一定要貼在 M.2 SSD 的兩邊。

機身包得好好，頂是一塊全鋁的面板，是散熱的唯一地方。所以記得上面千祈唔好責野，仲要有充足空間俾佢散熱先好！！

機身背後有（由左到右） 2.5 DC 頭、1G LAN Port、10G LAN Port、USB-C、USB 2.0 x 2、USB 3.0 x 2、Mic、3.5 Audio 頭、HDMI 1.4、HDMI 2.0。可謂應有盡有。聽歌又得、睇戲、睇 ISO 亦得，得左（唔洗 Jailbreak 部 OPPO 啦）

好啦，介紹完外觀之後輪到安裝。首先就係要拆機安裝 M.2 SSD 同換 8GB RAM，同時亦要幫部機增強散熱功能。

反轉機身後可以見到有 7 個窿，用增長的十字批插入去反時針扭晒佢地 7 粒螺絲出黎。

之後就反翻正面開個面，易過借火。

可以見到個面板背面有突出地方是直接貼在 CPU Die 及 10G LAN Port 等發熱點增強導熱能力上，所以話塊鋁千祈唔好響上面放野，影響佢散熱。

拆開後，可以見到本身 QNAP 已經有預設裝左兩條 2 x 2GB RAM，而我地今次其中一個目標係換左佢成為 2 x 4GB RAM。

換 RAM 手續好容易，將兩邊扣拍一拍，取出 RAM，再換上圖上的 Kingston 4GB DDR4 RAM，跟住 RAM 個窿插返入去，拍返佢，又得左！！用 Kingston 的原因是穩定性高，少鑊氣。

至於 M.2 SATA SSD，Samsung 860 EVO 6GB SATA M.2 SSD 一定係心水。圖中的是 250GB 版本，我後來已經換上 500GB 版本（下圖示），原因是 500GB 在分頁性能上、因為容量大、可以俾 250GB 為高，少 D 機會需要做分頁，咁亦會對 SSD 耐用一 D。