Hiendy 家訪交流室 ( 2011年4月號 )
編輯 & 圖片: Pepsiman
文字: 豬賓(bigpun1975)

百事佬 : 豬賓，點解今期家訪交流室仲未有功課交呀？新年都過咗咁耐啦，唔係要休到年廿八呀！
豬賓   : 唔係呀，呢期好鬼死忙，屋企好多嘢要搞。
百事佬 : 忙還忙，咁hiendy會員都要睇家訪架！再唔出嘢，會俾人過晒我地頭架！
豬賓   : 得得得，死都死俾你…

今期開始之前，先要同大家致歉，因筆者近期私務繁忙，所以「家訪交流室」出現脫期情況，希望大家唔好責怪，繼續支持。言歸正 傳，首先想俾條數大家計吓先，一部JVC 3D 投影機，加兩隻 JL-113 超低音，再加九隻 AAD 喇叭會係乜野?? 答案係一個超越 3D 嘅家庭影音室，而主人就係近期紅遍網絡及雜誌嘅玩家 Coma (網名 tangcoma)。

英雄出少年!

其實要講到認識 Coma，係由我哋一位版主 pinkhung 介紹的，家訪當晚，大家相約於土瓜灣某處等候，於網上見倒 Coma 的影音器材十分强勁，本以為佢係一位相當資深嘅玩家，誰不知；眼前竟然是一位二十出頭的青年，這反而令筆者更有興趣去探討一吓，呢位年青人嘅玩機歷程。

差人帶Headphone!?

回想起四年前，Coma 與家人仍是住在九龍城，一部 XBOX 360和32吋SONY CRT 大牛龜電視機加上一套2.0 音響組合，已足以令他消磨上半天。人總是不能安於現狀，大約半年時間，Coma 已經拎咗部大牛龜去填海，換來係一部 Pioneer 436 四十三吋Plasma，又從雜誌得知 Yamaha 會出第一部可以將畫面升頻嘅 AV Amp，一出無幾耐已被他收歸旗下，2.0 喇叭亦換上從深水埗買回來的七隻唔出名嘅喇叭，再購入一隻威力登1200R 十仔，人生第一套AV組合就建成咗喇。有咗人生第一套組合，及後亦試到人生的第一次，亦係好多會員嘅黑氣石　—–「投訴」。Coma 住嗰啲係舊式唐樓，無大廈管理員，最終要勞動到差人叔叔上門，最主要唔係投訴佢嘈，而係話佢震倒樓下，一向連飛機聲都唔驚嘅街坊，都頂唔往Coma 套AV 嘅低頻，可想而知有幾勁。差人話：你一係就細聲啲，一係就帶個Headphone 玩，唔好再騷擾倒人喇。佢靜咗一晚之後，第日又炸過，從此…..街坊亦唔知點解無再投訴過，Coma 自此亦明白到自己原來係一個不折不扣的低頻狂。

換機都是被逼的…

本來 Coma 都無諗住咁快換 AV Amp，點知有一日打打吓機，突然間部Amp熄咗無晒聲，諗住開番再玩過啦，點不知又熄過，之後就無再開嚟玩喇。Coma 覺得部Yamaha唔多對路，就立即買咗部 Onkyo 905去取代佢。正所謂一不離二，橫掂換開嘢，Coma 索性買埋套 AAD 喇叭、Integra 後級、Sony X300 52 吋電視，十仔就再加多隻威力登 1200R 添，今次器材升咗兩個[呢]，效果比以前更上一層樓。如是者又玩咗幾個月，Coma 從雜誌中得知 Panasonic 將會推出第一代可投1080p 影像嘅 AE1000 投影機，雖然計算過家居環境只可以投倒60吋畫面，不過佢最終都係受唔住誘惑入咗手。投影機嘅震撼力好多人都領教過，而Coma 嘅第一次原來係痛苦收場。話說一心諗住裝好部AE1000 嚟等全家人Happy 吓嘅Coma，剪綵嘅一刻畫面肉酸唔在講，投上個幕嘅時候，畫面無緣無故有幾條直線出現，實在令家人失望，最後無奈只有換機；折騰咗一輪，新歡變咗 JVC HD-1，畫面正曬，心情亦靚番。經過呢兩次[被逼] 換機之後，Coma 心裡面個[升級]制好似被人撳着咗咁，HD-1 好快就升級到 JVC HD-100，Onkyo 905 就升到906。正在埋首去tune 新機嘅Coma 此時得到家人一個好消息，家人說：我哋都升級喇!!!

我其實很 [痴家] 的!!!

家人講嘅升級，當然唔係同Coma 玩埋AV一份啦，只不過係搬去土瓜灣另一間大啲嘅屋。Coma 睇完新居之後，就胆粗粗向屋企人提出想打通兩間房去打造自己嘅影音房，本來都無抱太大期望，點知家人一口就應承咗。後來Coma 問番點解咁[順灘]比佢咁玩法，原來家人覺得佢玩咗AV 之後，一放工就即刻返屋企，無好似以前咁成日出去蒲，感覺上　[痴家] 咗好多，所以就一圓佢多年嘅心願喇！

要量更要質

有咗自己嘅私人空間，當然要玩大佢啦。90吋菊池透聲電幕、三隻威力登超低音、九隻AAD 喇叭，對Coma 嚟講，咁先有啲睇頭。但係量就有喇，但係音質希望可以再好啲……於是乎Onkyo 5507、Parasound A23 後級，及後的 Onkyo 5508 同 JL 113都先後入宮。早幾個月前，Coma 為咗要投入3D 世界，一口氣將投影機同電視都賣晒出去，等待新機來臨。點知貨期一再推遲，使到佢有一段時間無機玩，感覺好似道友吊癮咁痛苦。大家可能覺得Coma 換機快過換女，玩機又玩旗艦型號，會唔係啲洗腳唔抹腳嗰種人呀？事實上，佢玩機係有自己一套哲學，機一定會買大牌子嘅旗艦，除咗二手市場承接力較佳之外， 質素亦比較有保證，一步到位，免除日後升級的煩腦。遇着適合自己玩的新技術出台(例如3D)，佢都會毫不猶豫地將新機買回來，將舊機出售，雖然係上一代 機，但由於用嘅時間唔長，依然好新淨，回收價自然會好啲啦。聽落又好似幾有道理咁喎，但係要好似Coma 咁成日換機，筆者相信有九條命都唔夠死！

器材列表:

電視: Sony KDL-60LX900 (3DTV)

投影機: JVC DLA-X7

投影幕: Kikuchi KCSW-90HD TA/K 90” 電幕

為咗唔會令投影機嘅光線從幕後電視機反射到皇帝位影響表現，Coma巧妙地加咗一張宜家黑色卷廉在透聲幕後，平靚正，認真有腦…

由於透聲幕需要放下時越過前置喇叭，所以Coma索性在天花加裝閣仔，擺放佢心愛嘅玩具

AV 前級: Onkyo PR-SC 5508

後級: Integra Research RDA 7.1, Parasound A23

喇叭: AAD C Series

前置

中置

後置

後中置

BDP: PS3 Slim & 遊戲機: Xbox 360

超低音: JL Audio F113 X2

唔好再搞我個頭喇!!!

講咗咁耐，都係時侯爆吓機喇！Coma 表示，部JVC X7 要先warm up 一吓，播 3D 先會有好表現，所以首先攞咗隻[功夫熊貓]嚟招呼我哋。X7投出嚟畫面非常之靚，色彩鮮艷之餘，仲好細緻，同價位的2D 投影機一定會被比下去。聲音方面，由於兩隻JL 113 同時發功，真係打完心口打背脊，睇睇吓….. 就有啲怪事發生喇，筆者發覺成日有啲野攪個頭，但係坐響我後面嘅hkp1196版主又無任何動作，唔係咁鬼猛呀嘛！睇完兩段開番啲燈，個心先至定番少少， 原來Coma 將一對座地喇叭掛咗上牆作為後置（係，你地無睇錯，我亦無寫錯，係座地喇叭），所以一路睇戲，一路感受到啲低頻好似一陣風咁吹埋個頭度，真係嚇鬼 死…..

四度空間

見有兩隻咁勁嘅十仔響度，一於攞隻事先帶嚟好蝦人玩嘅[北極快車]去考吓佢，當然用第二段火車埋站一幕去試，低頻依然澎湃，成架火車好似[剎]埋身一 樣，但係去到潛得最低嗰幾吓會發覺左前方有些少駐波以及左後方的衣櫃有輕微共鳴聲，相信微調一吓出嚟效果會更好。不消一會，已幫部X7 熱身完畢，終於到今日家訪主菜，3D 投影， [阿凡達] 亦係不二之選，各人帶上3D 眼鏡，感覺唔重，十分舒適，先試主角走出太空艙一幕，景深十分之嚇人，太空艙延伸到很遠，有趣！再跳到主角在樹林與六腳狗打鬥一幕，Pepsiman 表示，對白聲除咗能夠套上畫面中，所出嚟嘅空間感既深而且闊，一對前側置喇叭與透聲幕實在功不可沒。有3D 影象，3D 嘅聲音，令人置身一個超越3D 嘅[四度空間]一樣。

還是這杯茶

席間Coma 向隨行嘅lulu sir 請教好多關於兩聲道嘅問題，希望能建立一套兩聲道系統，閒時用嚟聽吓心愛嘅電子音樂，lulu sir俾咗 Coma 不少寶貴意見。及後；Coma 亦有試過去各代理去聽吓啲兩聲道組合，聽咗一輪，先發覺原來唔係自己杯茶，所以將目標集中去等新一代嘅天龍 3D AV Amp 及 3D Blu-ray 機喇。

後記…..

家訪後，Coma 與各人一同晚膳，大家都很佩服他嘅勇氣，斗室裡要容納九隻喇叭，兩隻 JL113並唔係易事，佢唔單指玩得倒，而係要玩得好，嗰一份堅毅嘅精神，絕對唔係人哋話80後啲人個個都三分鐘熱度，做事唔上心，反過嚟；佢嗰份對AV 嘅執着與狂熱，相信亦令不少發燒友汗顏。
相信有好多會員都想知道Coma 係點樣將隻座地裝上牆做surround，等我為大家揭開呢個不墮之迷…

再一次多謝各位支持家訪交流室，拜拜！

(百事佬: 本文開首百事版主與豬賓版主對話純熟虛構，全屬流料，多多包含，嘻嘻… )

https://www.hiendy.com/hififorum/forum.php?mod=viewthread&tid=10512&extra=page%3D3