由去年年中開始已一直諗緊換咗部CD機佢，不竟部CD機都已經用咗八年唔耐，加上又係上年年中有一次發神經响網上唔睇清楚訂咗一隻Single Layer嘅SACD，又見小虎sir成日响度post D SACD碟出嚟，再加上自已又有十幾二十隻SACD碟，真係想試下SACD係咪真係講到咁堅！所以把心一橫不如換部有SACD嘅CD機。

自已筆直又有限(窮人嘛，升完一件又唔知幾時再可以升其他嘢 )，又想將來有機會玩下CAS，亦想一部機攪掂唔使加多部DAC。而且我仲冇好似呢度D師兄咁好，有老虎乸送生日禮比自已咁幸福。做咗一段資料搜集好耐。終於得出以下選擇:
1)        DENON  DCD-SX1
2)        Marantz  SA11S3
3)        Yamaha  CD-S3000
4)        Esoteric  K-07

不過，Denon部機香港代理冇入，又唔想玩水貨機，因為怕要改機又或者加隻變壓牛，雖然最想係入手呢部。而Esoteric K-07雖然曾經諗過，而亦係Eso機裏唯一能負擔得起的，但始終係最入門機，總覺得間廠會留有一手，最怕係D師兄講話Eso機要加Clock先至靚聲， 我又唔想心郁郁比多舊錢再加多件嘢响度，所以剔出我嘅考慮。

最終，剩底SA11S3同CD-S3000兩部機，兩部機都算係Marantz同Yamaha裏面最top嘅CD機model (Marantz睇嚟都唔會有SA7S1嘅後繼機)，應該都會唔保留咁將最好嘅技術放响兩部機身上(只係自已認為)

等下等下，到咗聖誕新年前後，自已都淨係齋睇，最多問下價，又上網睇下人哋D報告，都未有任何進一步嘅舉動，包括去試下機，比較下，感得自已真失敗！但最 終响四月尾去完旅行返嚟之後發現部CD機傻咗，轉轉下READ唔到。咁就把心一橫，不如決心換咗部機！就當係預早送自己一份生日禮物比自己(再一次好羡慕 D師兄有咁好嘅老乸！)

選擇要求
未講落去之前，首先講下自已擇CD機嘅要求：
A)        高至低頻要平均，即係大家所講要夠平衡。
B)        各樂器形態不能太大。
C)        有空間感，有合理嘅深度同分隔度，音場不能太前。
D)        樂器形體好，要有質感。
E)        有分析力，聲音要有一定密度。
F)        最好聲音小小厚。
經過初步試機後發覺聲嘅平衡度如果唔係同場比較，原來唔係真係咁易試得真，因為試個套嘢跟本完全唔同，亦可以有好大分別。

最終响五月中終於同一位快閃師兄落旺角分別試下兩部機，得出以下聽感：
Yamaha  CD-S3000
音場較深、闊，有分析力，定位清晰，聲音密度滿意，低音明顯有彈力，低音量適中(後來再到另一間舖頭試時稍為確定)，鋼琴同結他的質感明顯，非常靜，而樂器較細件。
Marantz  SA11S3
有分析力，定位及聲音密度都滿意、樂器形體較大、低音量較多(但不能完全確定)、多方面平均，音場較前。

最終你哋都知我揀咗乜啦，唔知？睇下相咪知囉

部機六月頭嘅一個星期六終於送到屋企，不過原來黑色唔係太襯其他器材，但冇辦法自己揀，唯有心諗：靚聲咪得囉！ 經過一星期約30小時嘅煲練，總括以下感想：
1)        高低伸延較以前用開個部exposure s2010好，低音聽多咗，低音細節亦多咗，量亦比以前多了一點，但唔係太明顯，最緊要係低音比較之前更有彈力。中高音質感比以前更明顯，尤其結他同鋼琴按鍵嘅聲音。
2)        最驚喜係，唔知點解聽流行曲的表現進步較古典更為明顯，個份空氣感亦比較以前強，更耐聽。
3)        聲音較以前活潑，速度快咗些小。
4)        音場明顯比以前深同闊，深度尤其明顯。
5)        背景亦較從靜了一點。

希望以上升級後嘅改善唔係自己比咗錢之後嘅幻覺啦  。不過响煲機期間，發現開機後要run15至20分鐘左右先開始進入狀態。而最有趣係我老婆第一日開機時己經即時表示比以前感覺好咗，但又唔知好响邊樹，我當時心都笑出嚟，因為平時攪完套機後問親佢都比唔到咩嘢反應。

但印象中CD機都要一段較長時間開聲，唔知遲D會唔會繼續有驚喜呢？
如遲D聲穩定咗，可能會加下釘、塾(唔加塾落部機度煲係因為想聽真D部機D聲)，甚至試下交換下D線試下有幾大分別！希望到時可以再同大家分享！

(後感:我都未試過寫一篇咁長嘅報告，自已寫得唔好，唔敢再寫咁長，各位師兄唔鐘意嘅話千奇唔好打頭 )

https://www.hiendy.com/hififorum/forum.php?mod=viewthread&tid=74002&extra=&page=1