我玩了ARC快要到兩年了, 在這網中, 我大大話話, 重覆了三數次談論有關ARC的墊材問題.

主要因為ARC的機身用料太單薄, 尤其係底殼板既厚度, 真係墊咩都死. 原廠設計佢既受力位就是膠腳位, 如真係好唔鍾意佢既膠腳, 唯一可做就係先將膠腳甩開, 將墊材用鑼絲上緊原裝腳位. 咁就會有所改變.

一直以黎, 我都想買塊墊板墊部CD8, 亦拎過好多牌子既墊板返屋企試聲! 說真的, 改善是有的, 但代價是10K起標.

當然, 萬幾兩萬蚊一塊墊板, 如果真係有大改善, 我都會入手.

但問題來了, 之前拎返屋企試果D墊板, 塊塊都好鬼厚身, 加上我的6.3的高度, 只能在頂層放上CD8, 再加墊板既話, 會阻住電視搖控既感應. 這我會被老闆秒殺唷! 由於這原因, 我部CD8一直都在沒墊板的日子中, 安定地坐穩在原裝SOLIDSTEEL的MDF板上.

直至最近換左對BRYSTON 7Bsstc, 講聲講樣, 本已經收晒貨 (詳情請看 – 一切從屏風開始 – BRYSTON 7B sstc) , 但望多佢兩個星期, 硬係覺得7B機身太薄, 唔夠霸氣.

咁啱有老友有兩塊SYMPOSIUM ULTRA厚板可以借黎試下墊對BRYSTON, 我心諗, 一來墊高D對BRYSTON, 外觀上加強霸氣, 二來, 我對SYMPOSIUM ULTRA都有著很好既聆聽經驗. 所以諗都唔諗都搬左佢返屋企試.

唔試尤自可, 一試就奶野! 邊個話SYMPOSIUM ULTRA墊CDP / PRE-AMP先大改善?! 我依家就係用兩塊ULTRA板墊後級, 佢既招牌提升如全頻線條, 寧靜度都有明顯改善.

第二日, 打個電話比代理, 問下依家一塊SYMPOSIUM ULTRA幾多錢啦. 佢報我街價每塊多謝六千幾蚊. 

大佬呀! 我今個月已經駛左好多錢, 有無D入門級(但有料到)既墊板介紹呀?!

代理就話SYMPOSIUM剛出了一塊入門級墊板, 名叫SEGUE. 厚度大約係ULTRA既三分一, 價錢又係大約相差三分一, 但說到功能, 起碼有ULTRA 八成功力.

第二日, 我立即去代理借塊SEGUE回家測試,

這塊SEGUE既尺寸係19 X 14, 板面更用一塊造功精美既鋁板, 鋁板既厚度, 比起ULTRA會薄身小小.

由於今次只係拎得一塊細SIZE既SEGUE, 所以我就用佢黎墊我部CD8.

很可惜, CD8既機身太大太深, 四粒膠腳只能啱啱好貼住板邊放. 不過好在, 改善都係明顯既, 大致上係寧靜度與全頻線條提升, 但估唔到佢墊CD8, 竟可改善埋音質密度及音場高度.

之後, 當然要試埋SYMPOSIUM ULTRA 與 SEGUE既分別啦.

無可否認, ULTRA在中低頻既厚度比SEGUE更靚, 分析力更佳, 但如以總表現黎睇, SEGUE真係有ULTRA既八成功力喎.

最緊要果樣野係 – 代價只需$1750一塊 (SIZE: 19 X 14).

之後, 仲有機會用這塊SEGUE板墊WEISS最新既MEDUS + JASON MKII. 今次既改善, 比用SEGUE墊CD8更為明顯, 可能由於WEISS既機身較細, 可以將四粒機腳墊在SEGUE中央, 使佢既功效能發揮得更強.

這次測試, 令我個銀包又唔見左幾千蚊, 因為我已訂左幾塊中SIZE既SEGUE (19 X 18).

鬼叫ARC & BRYSTON依D美國機身咁鬼深咩!  焗住我要買幾塊中板.

總結:

我使用這塊SYMPOSIUM SEGUE分別墊過我部CD8, WEISS JASON MKII + MEDUS, 以這樣價錢可以有咁大既改善, 我諗唔到有咩埋由唔推介比各位網友. 聽講下水貨要11月先到, 你地快D去落訂啦.

後話:

有好野, 我第一時間就打比豬賓, 叫佢拎塊板回家試試. 過左兩日後收到佢既電話, 叫我幫佢訂多兩塊SEGUE用黎墊CDP & INT.AMP! 哈哈. 又毒多個人.

學低音王個簽名話齋, 人人毒我, 我毒人人.

~~~完~~~